༢༠༡༡ ཟླ་ ༩ ཚེས་ ༡༦ རེས་གཟའ་པ་སངས།
༄༅། །སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པ་བོད་རྒྱལ་ལོ་ ༢༡༣༨ བོད་ཟླ་ ༧ ཚེས་ ༡༩ ཕྱི་ལོ་ ༢༠༡༡ ཟླ་ ༩ ཚེས་ ༡༦ ཕྱི་ཟླ་ ༡༠ ཚེས་ ༡ བར་ཉིན་གྲངས་བཅོ་ལྔའི་རིང་དབུས་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་ཀྱི་གྲོས་ཚོགས་ཁང་དུ་དངོས་སུ་དབུ་འཛུགས་གནང་ཡོད།
དེ་ཡང་ཕྱི་ཟླ་ ༩ ཚེས་ ༡༦ ཉིན་གྱི་སྔ་དྲོ་ཆུ་ཚོད་ ༡༠ པའི་ཐོག་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་། ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག དཔལ་ལྡན་བཀའ་བློན་ཁྲི་པ་བློ་བཟང་སེང་གེ་མཆོག ཆོལ་གསུམ་ཆོས་ལུགས་དང་བཅས་པའི་བོད་མི་མང་སྤྱི་འཐུས་རྣམ་པ། ཟུར་ཉན་པ། ལྷན་ཁང་ཁག་གི་དྲུང་ཆེ་རྣམ་པ། གསར་འགོད་པ་དང། ཟུར་ཉན་གཞན་རྣམས་བཅས་ཁྱོན་མི་གྲངས་ ༤༠ བརྒལ་བ་ཚང་འཛོམས་ཐོག་གྲོས་ཚོགས་ཚོགས་དུས་གཉིས་པ་དབུ་འཛུགས་ཀྱིས་ཐོག་མར་རྟེན་འབྲེལ་གསོལ་ཇ་དང་། འབྲས་སིལ་ཕུལ་གྲུབ་རྗེས་ཚང་མ་སྐུ་བཞེངས་ཀྱིས་བོད་རྒྱལ་ཁབ་ཆེན་པོའི་རྒྱལ་གླུ་བཏང་སྟེ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གྲོས་ཚོགས་དབུ་འཛུགས་ཀྱི་གསུང་བཤད་གནང་དོན།
དེ་རིང་ཕྱི་ལོ་ ༢༠༡༡ ཟླ་ ༩ ཚེས་ ༡༦ ཉིན་སྐབས་བཅོ་ལྔ་པའི་གྲོས་ཚོགས་ཚོགས་དུས་གཉིས་པ་འཚོགས་བཞིན་ཡོད། བཀའ་བློན་ཁྲི་པ་འོས་འདེམས་བྱུང་སྟེ་གྲོས་ཚོགས་ནང་ཕེབས་ཐེངས་དང་པོ་ཆགས་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མཚན་གསོལ་རས་སྩལ་བ་སྲིད་སྐྱོང་བཀའ་བློན་ཁྲི་པ་བློ་བཟང་སེང་གེ་མཆོག་ལ་སྐབས་ ༡༥ པའི་གྲོས་ཚོགས་སྤྱི་འཐུས་ལྷན་ཚོགས་ཀྱི་ངོས་ནས་ཕེབས་བསུ་དང་འཚམས་འདྲིའི་བཀྲིས་བདེ་ལེགས་ཞུ་རྒྱུ་ཡིན། གྲོས་ཚོགས་འདིའི་ནང་ལ་མདོ་སྨད་སྤྱི་འཐུས་སྒྲོལ་མ་མཚོ་མོ་ལགས་དགོངས་ཞུ་གནང་བའི་ཚབ་ཏུ་སྤྱི་འཐུས་སྨན་པ་མཁྱེན་རབ་ཕེབས་ཡོད། དེ་བཞིན་དབུས་གཙང་གི་ཁ་སྐོང་སྤྱི་འཐུས་གཉིས་ཀྱང་ཕེབས་ཡོད་པས་ཁྱེད་རྣམ་ལ་ཡང་འཚམས་འདྲིའི་བཀྲིས་བདེ་ལེགས་ཞུ་རྒྱུ་ཡིན། དེ་རིང་གྲོས་ཚོགས་འདིའི་ནང་ལས་འགན་ཆེ་ཤོས་ཤིག་བཀའ་བློན་ཁྲི་པ་མཆོག་གིས་འོས་མིག་བཏོན་པའི་བཀའ་བློན་རྣམས་འོས་འདེམས་བྱེད་རྒྱུ་རེད། འོས་ཐོབ་བཀའ་བློན་རྣམས་དེ་རིང་ཉིན་རྒྱབ་དམ་བཅའ་ཕུལ་རྗེས་སང་ཉིན་ནས་གྲོས་ཚོགས་ནང་ཕེབས་ཀྱི་རེད། ཚོགས་གཞོན་མཆོག་གིས་དབུས་སྤྱི་འཐུས་ཚང་མར་ཞུ་རྒྱུར་དེ་རིང་གི་གྲོས་ཚོགས་སྐབས་ ༡༥ པའི་ཚོགས་དུས་གཉིས་པའི་སྐབས་ལ་གྲོས་ཚོགས་ལ་བཅར་མ་ཐུབ་མཁན་སྤྱི་འཐུས་གཉིས་དང་གྲོས་ཚོགས་ཕྱེད་ཀར་བཅར་མ་ཐུབ་མཁན་གཅིག་མ་གཏོགས་གཞན་ཡོངས་སུ་རྫོགས་པ་འདི་གར་འཛོམས་ཐུབ་པར་ཚོགས་གཙོའི་ངོས་ནས་བསྔགས་བརྗོད་ཞུ་བཞིན་ཡོད། མ་འོངས་པར་ཡང་དེ་ལྟར་འཛོམས་ཐུབ་པའི་རེ་བ་ཞུ་རྒྱུ་ཡིན། ང་ཚོ་བཙན་བྱོལ་དུ་བསླེབས་པ་དང་མང་གཙོ་དབུ་བརྙེས་ནས་མི་ལོ་ ༥༡ ནང་འགྲོ་བཞིན་ཡོད།
སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་འཕྲལ་ཕུགས་རྒྱང་གསུམ་གྱི་དགོངས་པ་ཆེ་བཞེས་ཐོག་མགོན་པོ་གང་ཉིད་མཆོག་ལ་ཆབ་སྲིད་ཀྱི་སྐུ་དབང་གང་ཡོད་པ་རྣམས་མི་མང་གིས་འོས་འདེམས་བྱས་པའི་འགོ་ཁྲིད་ལ་རྩིས་སྤྲོད་མཛད་ཡོད། དེར་བརྟེན་འཛིན་སྐྱོང་བཀའ་ཤག་དང་སྤྱི་འཐུས། ཚོགས་སྡེ་སོགས་སུ་ཞིག་ཡིན་རུང་སྔར་དང་མི་འདྲ་བའི་ལས་འགན་འཕར་བ་མ་ཞིག་འཁྱེར་རྒྱུའི་དུས་ལ་སླེབས་ཡོད། བོད་མི་ཡོངས་སུ་རྫོགས་པར་གྲོས་ཚོགས་ཚོགས་དུས་གཉིས་པ་འདིའི་ཐོག་ནས་འཚམས་འདྲིའི་བཀྲིས་བདེ་ལེགས་ཞུ་རྒྱུ་དང་ཆབས་ཅིག་ང་ཚོ་སྤྱི་འཐུས་ཚོ་ཡིན་ཡང་ལས་འགན་སྤྲད་པ་ལྟར་འགན་འཁྱེར་ཐུབ་པའི་དམ་བཅའ་བརྟན་པོ་བཟུང་དགོས་རྒྱུ་ཧ་ཅང་གལ་ཆེན་པོ་རེད། དེ་བཞིན་སྤྱིར་བོད་དང་ཡང་སྒོས་བོད་དང་འབྲེལ་བའི་ས་ཁུལ་གཞན་ནང་རྒྱ་ནག་གཞུང་གིས་གདུག་རྩུབ་དང་གཉའ་གནོན་བྱེད་ཀྱི་ཡོད་པ་མ་གཏོགས་མི་མང་གི་དཀའ་ངལ་སེལ་རྒྱུའི་ཐབས་ཤེས་འཚོལ་གྱི་མེད་པ་ཧ་ཅང་གསལ་པོ་རེད།
རྒྱ་ནག་གཞུང་གི་འཛིན་བཞིན་པའི་སྲིད་བྱུས་དེ་དག་ནོར་འཁྲུལ་ཡིན་པ་དང། རྒྱ་ནག་གཞུང་ནས་ཤོད་བཞིན་པའི་རྒྱ་ནག་མི་རིགས་དང་གྲངས་ཉུང་མི་རིགས། ཁྱིམ་མཚེས་རྒྱལ་ཁབ། རྒྱལ་སྤྱིའི་ནང་འཆམ་མཐུན་ཡོང་རྒྱུ་ཞེས་པ་དེ་ནི་ཁོང་ཚོས་ད་ལྟ་འཛིན་བཞིན་པའི་སྲིད་བྱུས་དེའི་ཐོག་ནས་ཡོང་ཐབས་མེད། རྒྱ་གཞུང་ནས་བོད་ནང་གི་མཁས་དབང་དང་རྩོམ་པ་པོ། གཞས་པ་གཞས་མ་སོགས་ཀྱི་རེ་འདུན་ལ་བསམ་གཞིགས་བྱ་རྒྱུ་ལས་ལྡོག་སྟེ་སྡུག་སྦྱོང་གཏོང་རྒྱུའི་སྲིད་བྱུས་བཟུང་གི་ཡོད་པ་དེ་གསལ་པོ་རེད། དེ་བཞིན་བོད་ཀྱི་འབྲོག་ས་ཡོངས་རྫོགས་གཞིས་ཆགས་སུ་བསྒྱུར་རྒྱུ་དེ་དག་ནི་རྒྱ་གཞུང་གི་བོད་ཐོག་འཛིན་པའི་སྲིད་བྱུས་ངན་པོ་ཞིག་ཡིན་པ་ང་ཚོས་བརྗོད་ཆོག དེང་སྐབས་བོད་ནང་གཏེར་ཁ་སྔོག་འདོན་བྱེད་རྒྱུ་དེ་ཡང་གཞི་རྒྱ་ཆེ་རུ་བཏང་ཡོད་པ་མ་ཟད། མཐའ་ན་གཙང་པོ་ཡང་ཁ་བསྒྱུར་བྱེད་བཞིན་ཡོད་པའི་གནས་སྟངས་དེའི་འོག་ནས་བོད་ནས་ཡོང་བའི་ཆུ་བོ་དེ་དག་འབག་བཙོག་ཆགས་ན་རྒྱ་ནག་ཙམ་དུ་མ་ཟད། ཁྱིམ་མཚེས་རྒྱལ་ཁབ་ཚོར་ཡང་ཆུའི་དཀའ་ངལ་འཕྲད་ངེས་ཡིན། ད་ལྟའི་གནས་སྐབས་ལ་འཛམ་གླིང་ནང་ཆབ་སྲིད་ཀྱི་བཙན་བྱོལ་མང་པོ་ཡོད་ཀྱང་འབྱུང་འགྱུར་ལོ་བཅུ་ཕྲག་འགའ་ཤས་རྗེས་ཁོར་ཡུག་གི་བཙན་བྱོལ་བ་མང་བ་ཆགས་རྒྱུའི་ཉེན་ཁ་ཏན་ཏན་ཡོད། ད་ལྟའི་རྒྱ་ནག་སྤྱི་ཡོངས་ཀྱི་དཔལ་འབྱོར་དང་དམག་གི་ཐོག་ནས་ཡར་རྒྱས་ཕྱིན་ཡོད་ཀྱང་། གྲོང་ཁྱེར་དང་གྲོང་གསེབ་དབར་དབུལ་ཕྱུག་གི་དབྱེ་བ་ལྐོག་ཟ་རུལ་སུངས་ཀྱི་དཀའ་ངལ་རྒྱ་ནག་དམར་ཤོག་ཚོགས་པ་གནས་རྒྱུ་གཅིག་པུའི་ཆེད་དུ་ལས་གཞི་སྒྲིག་ཡོད་པའི་གནས་སྟངས་ཞིག་སླེབས་ཡོད། རྒྱ་ནག་ནང་འགྱུར་བ་འགྲོ་གི་ཡོད་ཀྱང་དེ་ལས་ཤུགས་ཆེ་ཙམ་ཞིག་འབྱུང་འགྱུར་ལོ་བཅུ་ཉི་ཤུའི་ནང་འགྲོ་གི་རེད་བསམ་གྱི་ཡོད། རྒྱ་ནག་ནང་གི་གནས་སྟངས་དང་ང་ཚོ་བཙན་བྱོལ་བའི་གནས་སྟངས་གཞི་བཅོལ་བའི་ཐོག་ནས་ང་ཚོས་ལས་གཞི་གང་ཞིག་བརྩམ་ཡང་དེའི་ནང་འཛིན་སྐྱོང་བཀའ་ཤག་དང་སྤྱི་འཐུས་ལྷན་ཚོགས་ཀྱི་འགན་འཁྱེར་ཏེ་བྱེད་དགོས་རྒྱུ་དེ་གལ་ཆེན་པོ་རེད། རང་བཙན་ཡོད་པའི་ཁྲིམས་བཟོ་ལྷན་ཚོགས་ཞིག་ཡིན་ན། ཁྲིམས་རྐྱང་པ་བཟོས་ཏེ་སོ་སོ་ས་ཁུལ་ག་ནས་འོས་འདེམས་བྱུང་བ་ཡིན་ནའང་། དེའི་མི་མང་གི་བདེ་སྡུག་ལྟ་རྒྱུར་བསམ་བློ་བཏང་ན་འགྲིག་གི་རེད། འོན་ཀྱང་ང་ཚོ་ད་ལྟའི་འཐབ་རྩོད་བྱེད་མཁན་གྱི་མི་སྣ་ཞིག་ཡིན་པར་བརྟེན།
སྤྱི་འཐུས་རྣམ་པ་ཚོ་ཡིན་ནའང་ཁྲིམས་བཟོའི་འཛིན་སྐྱོང་སྟངས་འཛིན་ཙམ་དུ་མ་ཡིན་པར་བོད་དོན་དེ་རྒྱལ་སྤྱིའི་ནང་ངོ་སྤྲོད་གནང་ཐུབ་པའི་ལས་འགན་ཞིག་ཆགས་ཡོད། ད་ལྟ་བར་བོད་མི་མང་སྤྱི་འཐུས་ལྷན་ཚོགས་ཀྱི་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་འདུ་གོ་སྒྲིག་ཞུ་རྒྱུ་མུ་མཐུད་འགན་འཁྱེར་གྱི་ཡོད་ལ་མ་འོངས་པར་ཞུ་འཆར་ཡོད། དེ་བཞིན་འཛིན་སྐྱོང་བཀའ་ཤག་ནས་ཀྱང་གནང་བཞིན་ཡོད། རྒྱལ་སྤྱིའི་ཐོག་ནས་གནད་ཡོད་མི་སྣ་མང་པོ་བོད་དོན་ཐོག་མངོན་གསལ་དོད་པོས་རྒྱབ་སྐྱོར་གནང་དང་གནང་མུས་རེད། ང་ཚོས་ཆབ་སྲིད་ཐད་ནས་རྒྱལ་ཁབ་ཀྱི་འགོ་ཁྲིད་སྲིད་འཛིན་དང་སྲིད་བློན་དེ་རིགས་མཇལ་ཐུབ་ཀྱི་ཡོད་མེད་དེ་ཚོར་ང་ཚོས་འབད་བརྩོན་བྱེད་དགོས་རྒྱུ་ཞིག་རེད། རྒྱལ་སྤྱིའི་སྤྱི་ཡོངས་ནས་བོད་པར་ལྟ་སྟངས་བཟང་པོ་ཡོད། ཇི་སྲིད་མང་ཚོགས་ནང་ནས་དབུ་མའི་ལམ་ལ་འགྱུར་བ་གཏོང་དགོས་པའི་བསམ་ཚུལ་ཤུགས་ཆེ་མ་བྱུང་བར་དུ་ཤར་སྐྱོད་བྱ་རྒྱུའི་གནས་སྟངས་ཆགས་ཡོད། གང་ལྟར་རྒྱ་ནག་གིས་འཇམ་རྩུབ་གང་བྱེད་ཀྱི་ཡོད་ཀྱང་ང་ཚོ་བོད་མིའི་ནུས་པ་དང་བཙན་བྱོལ་གྱི་ནུས་པ་དེ་ཚོར་གཞི་བཅོལ་ཏེ་གདོང་ལེན་བྱེད་རྒྱུ་གལ་ཆེན་པོ་རེད། ཅེས་སོགས་ཀྱི་གསུང་བཤད་གནང་བ་དང་ཆབས་ཅིག་ཚོགས་གཙོའི་ལས་ཚབ་དང་། ལས་རིམ་ཚོགས་ཆུང་གི་ཚོགས་མི་བསྐོ་གཞག་གནང། དེ་ནས་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་དང་། སྤྱི་འཐུས་མཁན་པོ་ནོར་བུ་ཚེ་རིང་ལགས། སྤྱི་འཐུས་ཨ་ཀྲུག་ཚེ་བརྟན་ལགས་བཅས་ནས་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་འཆར་རིམ་བཞིན་སྒྲོགས་སྦྱང་གནང་ནས་མྱ་ངན་མཚོན་ཆེད་ངག་བཅད་སྐར་མ་གཅིག་གནང་རྗེས་ལས་རིམ་དབུ་འཛུགས་གནང་སྟེ་བཀའ་བློན་ཁྲི་པ་བློ་བཟང་སེང་གེ་མཆོག་གིས་གསར་དུ་བསྐོ་གཞག་ཞུ་རྒྱུའི་བཀའ་བློན་དྲུག་གི་མཚན་དང་ལོ་རྒྱུས་གྲོས་ཚོགས་སུ་སྒྲོགས་སྦྱང་གནང་རྗེས་སྤྱི་འཐུས་རྣམས་ཀྱིས་སྤྱི་མོས་ཐོག་འོས་འདེམས་གནང་། དེ་ནས་བཀའ་ཁྲི་མཆོག་གིས་གྲོས་ཚོགས་སུ་བཀའ་ཤག་གི་གསུང་བཤད་ཐོག་མ་གནང་ཡོད་པ་བཅས། །
