༢༠༡༡ ཟླ་ ༩ ཚེས་ ༢༨ རེས་གཟའ་ལྷག་པ།
༄༅། །ཉེ་ལམ་བོད་མདོ་སྨད་རྔ་པ་ཀིརྟི་དགོན་པའི་དགེ་འདུན་པ་བློ་བཟང་སྐལ་བཟང་ལགས་དང་བློ་བཟང་དཀོན་མཆོག་ལགས་གཉིས་ཀྱིས་བོད་བསྟན་སྲིད་མི་རིགས་ཀྱི་དོན་དུ་རང་སྲོག་བློས་གཏོང་གིས་རང་ལུས་མེར་སྲེག་བཏང་བ་དང་ལྷན་༸གོང་ས་མཆོག་སྐུ་ཚེ་ཁྲི་ལོར་བརྟན་པ་དང་བོད་མི་ཚོར་ཆོས་དད་རང་དབང་དགོས་པའི་འབོད་སྒྲ་སྒྲོག་པར་བརྟེན་རྒྱ་ནག་གཞུང་གི་དྲག་ཆས་ཉེན་རྟོག་དམག་མིས་དགེ་འདུན་པ་གཉིས་པོ་བཙན་ཁྲིད་བྱས་པའི་གནས་ཚུལ་ཐོས་ཕྲལ། ཨ་རི་དང་ཡུ་རོབ་བཅས་ཀྱིས་རྒྱ་ནག་གཞུང་ལ་བོད་དུ་འཛིན་པའི་སྲིད་བྱུས་དེར་བསྐྱར་ཞིབ་ཐོག་བོད་མི་ཚོའི་དངོས་ཡོད་ཀྱི་དཀའ་ངལ་རྣམས་མྱུར་དུ་སེལ་ཐབས་དགོས་པའི་རེ་འདུན་བཏོན་ཡོད་པ་ལྟར། ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་ཚོགས་གཙོ་ལྕམ་སྐུ་མེ་རི་བྷེ་ཐི་མར་ཀེ་(Mary Beth Markey)མཆོག་གིས་བསྒྲགས་གཏམ་ཞིག་སྤེལ་བའི་ནང་འཁོད་དོན།
ཉེ་ལམ་ཀིརྟི་དགོན་པའི་དགེ་འདུན་པ་གཞོན་སྐྱེས་གཉིས་ཀྱིས་འུ་ཐུག་གི་བྱ་སྤྱོད་སྤེལ་ཏེ་རྒྱ་གཞུང་ལ་ངོ་རྒོལ་བྱས་པ་དེས་རྒྱ་ནག་གཞུང་གིས་རྔ་པའི་ཁུལ་དུ་དམ་བསྒྲགས་ཅན་གྱི་སྲིད་བྱུས་འཛིན་བཞིན་པ་དེ་མཚམས་འཇོག་དགོས་པའི་བརྡ་ལན་གསལ་པོ་བཏང་ཡོད། བོད་ཀྱི་ནང་ཆོས་ཀྱི་གཞུང་ནས་རང་སྲོག་རང་གིས་གཅོད་རྒྱུ་དེ་ཉེས་པ་ཚབས་ཆེ་ཤོས་ཤིག་ཏུ་བརྩིས་ཏེ་དེར་དགག་བྱ་གནང་མིན་ལ་མ་ལྟོས་པར་དགེ་འདུན་པ་ཚོས་རང་སྲོག་གཅོད་དགོས་པའི་གནས་སྟངས་ཆགས་པ་དེས་ཁོང་ཚོར་དཀའ་ངལ་ཇི་འདྲ་ཞིག་ཡོད་མེད་ཚོད་དཔག་བྱེད་ཐུབ། བོད་ཀྱི་དགོན་སྡེ་ཁག་གི་ནང་དམ་བསྒྲགས་ཤུགས་ཆེ་ཡོད་པའི་གནས་སྟངས་འོག་དགེ་འདུན་པ་ཚོས་རང་སྲོག་གཅོད་རྒྱུའི་འུ་ཐུག་གི་བྱ་ཐབས་དེ་རིགས་མཚམས་འཇོག་ཡོང་བར་རྒྱ་ནག་གཞུང་གིས་འཛིན་པའི་སྲིད་བྱུས་དེར་འགྱུར་བ་གཏོང་དགོས་ཞེས་སོགས་གསུངས་འདུག
དེ་བཞིན་རྡ་སར་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གསལ་བཤད་གནང་བའི་ནང་འཁོད་དོན། བོད་ནང་མུ་མཐུད་ཛ་དྲག་གི་གནས་སྟངས་ཆགས་རྒྱུ་ཡིན་པ་དང། ད་ཆ་རྒྱ་ནག་གཞུང་གིས་བོད་ནང་དམ་བསྒྲགས་ཧ་ཅང་ཤུགས་ཆེ་རུ་གཏོང་ཉེན་ཡོད་པར་བརྟེན་ང་ཚོར་སེམས་འཚབ་ཧ་ཅང་ཆེན་པོ་འདུག་ཅེས་གསུངས།
ཕྱོགས་མཚུངས་དབྱིན་ཇིའི་རྒྱལ་ས་ལོན་ཌོན་དུ་རྟེན་གཞི་བྱས་པའི་བོད་རང་དབང་ཚོགས་པའི་ཚོགས་གཙོ་སྐུ་ཞབས་སི་ཊེ་ཕན་ལགས་(Stephanie  Brigden)ཀྱིས་བོད་པའི་དགེ་འདུན་པ་གཉིས་ཀྱིས་འུ་ཐུག་ཐབས་ཟད་ཀྱི་བྱ་ཐབས་སྤེལ་དགོས་བྱུང་བ་དེས་བོད་ཀྱི་གནད་དོན་དེ་བཞིན་གྲོས་མོལ་གྱི་ལམ་ནས་མྱུར་དུ་སེལ་དགོས་པ་ཆགས་ཡོད། ཅེས་གསུངས་ཡོད་པ་བཅས།།