༢༠༡༡ ཟླ་ ༩ ཚེས་ ༡༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༩ ཚེས་ ༡༠ ཉིན་རྡ་ས་མེག་གྷན་བསྟན་དབང་མགྲོན་ཁང་ཞེས་པའི་ཡང་སྟེང་དུ་ཕ་རན་སིར་ནང་རྟེན་གཞི་བྱས་པའི་བོད་ཀྱི་ནང་བསྟན་སྲི་ཞུ་ཁང་གི་ཡན་ལག་རྡ་སའི་བོད་ཀྱི་ནང་བསྟན་སྲི་ཞུ་ཁང་གིས་དྲ་ཐོག་ནས་བོད་ཀྱི་སྐད་ཡིག་སློབ་ཁྲིད་ཁང་ཞིག་དབུ་འབྱེད་གནང་བ།
དེ་ཉིན་སྔ་དྲོ་ཆུ་ཚོད་ ༡༠ ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་། རྡ་ས་བོད་ཀྱི་ནང་བསྟན་སྲི་ཞུ་ཁང་གི་ཕ་རན་སི་བ་འགན་འཛིན་སྐུ་ཞབས་ངག་དབང་འཕྲིན་ལས་ལགས། སློབ་སྟོན་པ་ཁ་རག་མུ་ལེན་Craig Meulen ལགས། བོད་ཀྱི་དཔེ་མཛོད་ཁང་གི་སྐད་ཡིག་དགེ་རྒན་བདེ་སྐྱིད་ལགས་སོགས་གསར་དུ་བསྡུ་སྐོང་ཞུས་པའི་ཚོགས་པ་དེའི་དགེ་རྒན་ཁག་གཅིག་བཅས་མི་གྲངས་ ༢༠ བརྒལ་བ་ལྷན་འཛོམས་ཐོག་སྐུ་མགྲོན་གཙོ་བོ་མཆོག་གིས་དབུ་འབྱེད་དར་ཚོན་གཅོད་བྲེག་གནང་རྗེས་རྟེན་འབྲེལ་གྱི་གསོལ་ཇ་འབྲས་སིལ་ཕུལ། འགན་འཛིན་སྐུ་ཞབས་ངག་དབང་འཕྲིན་ལས་ལགས་ཀྱི་ངོ་སྤྲོད་གསུང་བཤད་གནང་སྒྲུབ་བསྟུན་ཕ་རན་སིའི་བོད་ཀྱི་ནང་བསྟན་སྲི་ཞུ་ཁང་གི་འགན་འཛིན་སྐུ་ཞབས་ཧེ་ལོ་སི་ Helios ལགས་ཀྱིས་དྲྭ་ཐོག་ནས་ཚོགས་པ་དེའི་ལས་འཆར་སྐོར་ངོ་སྤྲོད་གསུང་བཤད་གནང་རྗེས་སྐུ་མགྲོན་གཙོ་བོ་མཆོག་གིས་གསུང་བཤད་གནང་དོན། ཐོག་མར་འཚམས་འདྲིའི་བཀྲིས་བདེ་ལེགས་ཞུ་བ་ཆབས་ཅིག་ང་ཚོའི་སྤྱི་ཚོགས་ནང་འགྱུར་བ་ཆེན་པོ་ཕྱིན་ཏེ་ལོ་བཅུའི་སྔོན་ཡུ་རོབ་ནང་བོད་མི་ཉུང་ཉུང་ཞིག་ལས་མེད་ཀྱང་དེང་སང་ཁྲི་གཅིག་ཙམ་དང་། དེ་བཞིན་བྱང་ཨ་རིའི་ཁུལ་དུ་བོད་མི་སྟོང་ ༢༥ ཙམ་བཤད་ཀྱི་ཡོད། མི་རབས་དང་པོ་དང་ཕྲུ་གུ་ལོ་བདུན་བརྒྱད་ཕ་མ་བོད་སྐད་དོ་སྣང་ཅན་ཕར་འགྲོ་མཁན་ཚོར་དེ་ཙམ་དཀའ་ངལ་མེད་ཀྱང་། ཕྱིས་སུ་ཕྱི་རྒྱལ་ཁག་ཏུ་སྐྱེས་པ་དང་འཚར་ལོངས་བྱུང་བ་ཚོར་བོད་རིགས་ཚོགས་པ་ཁག་གི་རེས་གཟའ་ཉི་མའི་འཛིན་གྲྭ་ཚོགས་ཏེ་སློབ་ཁྲིད་བྱེད་ཀྱི་ཡོད་ཀྱང་དུས་ཚོད་འདང་མིན་སོགས་ཀྱི་དཀའ་ངལ་ཡོད་མུས་སོང་རྗེས་ལུས་མ་ཐེབས་པར་དེང་རབས་ཀྱི་དུས་ཚོད་དང་མཐུན་པ་བྱས་ཏེ་དྲྭ་རྒྱ་བརྒྱུད་བོད་སྐད་སྦྱངས་རྒྱུའི་གནས་སྟངས་ཞིག་སྐྲུན་པ་དེས་ཕན་ཐོགས་ཆེན་པོ་ཡོང་བ་དང་། བོད་པའི་སྐད་ཡིག་ནས་འགོ་བཙུགས་པ་དེས་བོད་པའི་རིག་གཞུང་མཐའ་དག་གི་སྲོག་རྩ་དེ་སྐད་ཡིག་ཆགས་དུས་སྤྱི་ཚོགས་ལ་ཕན་རླབས་ཆེན་པོ་དང་ཚོགས་པ་རྒྱུན་འཁྱོང་གི་ཁྱེད་རྣམ་པའི་ལས་འཆར་དེ་དག་ཚད་དང་ལྡན་པ་ཡོང་བའི་རེ་བ་ཞུ་གི་ཡོད། ཅེས་སོགས་གསུང་བཤད་གནང་སྒྲུབ་བསྟུན་སློབ་སྟོན་པ་ཁ་རག་མུ་ལེན་ལགས་ཀྱིས་སློབ་ཁྲིད་མྱོང་བའི་སྐོར་ངོ་སྤྲོད་གནང་རྗེས་ཐུགས་རྗེ་ཆེ་ཞུས་ཏེ་མཛད་སྒོ་གྲོལ། རྡ་སར་བོད་ཀྱི་ནང་བསྟན་སྲི་ཞུ་ཁང་ཡན་ལག་ཁང་དེའི་དམིགས་དོན་ནི་བོད་ཀྱི་སྐད་ཡིག་མི་ཉམས་གོང་འཕེལ་དང་། བོད་ཡིག་གནས་ཚད་གང་ལེགས་ཡོད་པ་ཚོར་ལས་གནས་གོ་སྐབས་སྐྲུན་ཆེད་ཡིན་འདུག རྡ་སའི་བོད་ཀྱི་རིག་གཞུང་སྲི་ཞུ་ཁང་ཞེས་པའི་དྲྭ་ཐོག་བོད་སྐད་སློབ་ཁྲིད་ཁང་དེའི་ཁ་བྱང་ནི། www.esukhia.org  ཡིན་འདུག་པ་བཅས།