༢༠༡༡ ཟླ་ ༩ ཚེས་ ༣༠ རེས་གཟའ་པ་སངས།
༄༅། །འདི་གར་ཐེ་ཝན་སྐུ་ཚབ་དོན་ཁང་གིས་ཕྱི་ལོ་ ༢༠༡༡ ཟླ་ ༩ ཚེས་ ༣༠ ཉིན་བཏང་གནས་ནང་འཁོད་དོན། ཐེ་ཝན་མང་གཙོ་ཡར་ཐོན་ཚོགས་པ་དབུ་བརྙེས་ནས་ལོ་ ༢༥ འཁོར་བ་དང་དུས་མཉམ། མང་གཙོ་ཡར་ཐོན་ཚོགས་པ་རྒྱལ་སྤྱིའི་འབྲེལ་ལམ་སྡེ་ཚན་ནས་གོ་སྒྲིག་གིས་ཕྱི་ལོ་ ༢༠༡༡ ཟླ་ ༩ ཚེས་ ༢༨ ཉིན་རྟེན་འབྲེལ་གྱི་མཛད་སྒོ་ཞིག་སྐོང་ཚོགས་གནང་ཡོད། ཐེངས་འདིའི་མཛད་སྒོའི་སྐུ་མགྲོན་གཙོ་བོ་ཐེ་ཝན་དུ་བཅའ་སྡོད་ཕྱིའི་རྒྱལ་ཁབ་ཁག་གི་གཞུང་ཚབ་ཁག་དང་། སྐུ་ཚབ་དོན་གཅོད་ཁག་ལ་མགྲོན་ཤོག་ཕུལ་ཡོད་པ་ལྟར། ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ལ་ཡང་སྤྱི་མཚུངས་ཀྱི་མགྲོན་ཤོག་གནང་བ་བཞིན་དོན་གཅོད་གཞུང་དོན་ཕྱོགས་བསྐྱོད་སུ་ཕེབས་བརྟེན།  དོན་ཁང་གི་དྲུང་ཆེ་བསོད་ནམས་རྡོ་རྗེ་ལགས་མཛད་སྒོར་བཅར་ཡོད་པ་རེད།  མཛད་སྒོའི་ཐོག་ཕྱི་རྒྱལ་རྒྱལ་ཁབ་ཁག་གི་གཞུང་ཚབ་དང་སྐུ་ཚབ་དོན་གཅོད་སོགས་མི་གྲངས་ལྔ་བཅུ་ལྷག་མཉམ་འཛོམས་བྱུང་ཡོད་པ་དང་། མགྲོན་གྱི་བདག་པོ་མང་གཙོ་ཡར་ཐོན་ཚོགས་པའི་ཚོགས་གཙོ་ཕྱི་ལོ་ ༢༠༡༢ ལོའི་ཐེ་ཝན་སྲིད་འཛིན་གྱི་འོས་མི་ལྕམ་ཚའེ་དབྱིང་ཝིན་ལགས་དང་། གྲོས་ཚོགས་འཐུས་མི་སོགས་ནས་སྐུ་མགྲོན་རྣམས་ལ་སྣེ་ལེན་ཞུས་ཡོད། དྲུང་ཆེ་བསོད་ནམས་རྡོ་རྗེ་ལགས་ཀྱིས་ལྕམ་ཚའེ་དབྱིང་ཝིན་ལགས་ལ་རྒྱུན་དུ་བོད་མིར་རྒྱབ་སྐྱོར་གནང་བ་དང་། ལྷག་པར་ཕྱི་ཟླ་ ༨ ཚེས་ ༨ ཉིན་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པའི་ཁྲི་འདོན་མཛད་སྒོར་མང་གཙོ་ཡར་ཐོན་ཚོགས་པ་ནས་གྲོས་ཚོགས་ཀྱི་འཐུས་མི་སོགས་ཆེད་དུ་བཞུགས་སྒར་རྡ་སར་རྟེན་འབྲེལ་མཛད་སྒོར་མངགས་གཏོང་གནང་བར་ཐུགས་རྗེ་ཆེ་ཞུས་ཡོད། ལྕམ་ཚའེ་དབྱིང་ཝིན་ལགས་ཀྱིས་གསུངས་དོན། ཁྱེད་རྣམ་པའི་བཀའ་བློན་ཁྲི་པའི་འོས་བསྡུའི་སྐབས་ལོ་ན་གཞོན་པའི་ཤེས་ཡོན་ཅན་འདེམས་ཐོན་བྱུང་བར་བཀྲ་ཤིས་བདེ་ལེགས་ཞུ་རྒྱུ་དང་། ཐེ་ཝན་དང་བོད་མིའི་གནས་སྟངས་འདྲ་པོ་ཡོད་པས་ཚང་མས་འབད་བརྩོན་བྱེད་དགོས་ཞེས་གསུངས། དེ་བཞིན་དྲུང་ཆེ་བསོད་ནམས་རྡོ་རྗེ་ལགས་ཀྱིས་ཚོགས་བཅར་ཁོངས་སུ་ཡོད་པའི་རྒྱུན་གཏན་ནས་བོད་དོན་ཐོག་རྒྱབ་སྐྱོར་གནང་མཁན་གྲོས་ཚོགས་འཐུས་མི་དང་དཔོན་རིགས་རྣམས་མཇལ་འཕྲད་ཀྱིས་བོད་མིར་གདུང་སེམས་མཉམ་སྐྱེའི་རྒྱབ་སྐྱོར་གནང་བར་ཐུགས་རྗེ་ཆེ་སོགས་ཞུས་ཡོད་པ་བཅས།།