༢༠༡༡ ཟླ་ ༩ ཚེས་ ༡༧ རེས་གཟའ་སྤེན་པ།
༄༅། །བོད་རྒྱལ་ལོ་ ༢༡༣༨ ཟླ་ ༧ ཚེས་ ༢༠ ཕྱི་ལོ་ ༢༠༡༡ ཟླ་ ༩ ཚེས་ ༡༧ ཉིན་སྐབས་ ༡༤ ་བཀའ་ཁྲིའི་ཕྱག་རོགས་བཀའ་བློན་ཚེ་རིང་དོན་གྲུབ་མཆོག་གིས་ཆེས་མཐོའི་ཁྲིམས་ཞིབ་ཁང་གི་ཡང་སྟེང་ཚོགས་ཁང་དུ་་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་གི་དྲུང་དུ་ལས་ཁུར་དམ་བཅའ་དང་གསང་རྒྱའི་དམ་བཅའ་ཕུལ་ཡོད།
དེ་ཡང་ཕྱི་ཚེས་ ༡༧ ཉིན་སྔ་དྲོ་ཆུ་ཚོད་ ༩ ཐོག་བཀའ་ཁྲིའི་ཕྱག་རོགས་བདམས་ཐོན་བཀའ་བློན་ཚེ་རིང་དོན་གྲུབ་མཆོག་གིས་ཆེས་མཐོའི་ཁྲིམས་ཞིབ་པ་ཆེ་བ་མཆོག་དང་ཁྲིམས་ཞིབ་པ་རྣམས་པ། བོད་མི་མང་སྤྱི་འཐུས་ཚོགས་གཙོ་མཆོག བཀའ་བློན་ཁྲི་པ་མཆོག སྤྱི་འཐུས་ཚོགས་གཞོན་མཆོག དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་མཆོག རྩིས་ཞིབ་སྤྱི་ཁྱབ་འགན་འཛིན་མཆོག་བཅས་ཆེས་མཐོའི་ཁྲིམས་ཞིབ་ཁང་གི་ཡང་སྟེང་ཚོགས་ཁང་དུ་ཕེབས་སྐབས་ཁྲིམས་ཞིབ་ཁང་གི་སྡེ་འགན་འཇིགས་མེད་ཚེ་བརྟན་ལགས་ནས་སྣེ་ལེན་གྱི་ཕེབས་བསུ་ཞུས་ཡོད། དེ་རྗེས་བདམས་ཐོན་བཀའ་བློན་རྣམ་པ་སོགས་བཞུགས་གྲལ་དུ་འཁོད་མཚམས་བཀྲ་ཤིས་རྟེན་འབྲེལ་མཚོན་ཆེད་གྲོ་སོ་ཕྱེ་མར་དང་ཆང་ཕུད་ཕུལ། དེ་ནས་ཆུ་ཚོད་ ༩།༡༠ ཐོག་ཁྲིམས་ཞིབ་པ་ཆེ་བ་མཆོག་གིས་སྤྱི་ནོར་༸གོང་ས་༉༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས། དེ་རྗེས་བདམས་ཐོན་བཀའ་བློན་ཚེ་རིང་དོན་གྲུབ་མཆོག་གིས་སྤྱི་ནོར་༸གོང་ས་༸སྐྱབས་མཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས། དེ་རྗེས་བདམས་ཐོན་བཀའ་བློན་མཆོག་གིས་དཔལ་ལྡན་ཁྲིམས་ཞིབ་པ་ཆེ་བ་མཆོག་གི་དྲུང་ནས་ལས་ཁུར་དམ་བཅའ་དང་གསང་རྒྱའི་དམ་བཅའ་ཕུལ་རྗེས་རྟེན་འབྱུང་གསོལ་ཇ་དང་འབྲས་སིལ་ཕུལ་ཡོད། དེ་ནས་མཛད་གཙོ་རྣམ་པས་བདམས་ཐོན་བཀའ་བློན་མཆོག་ལ་རིམ་བཞིན་རྟེན་འབྱུང་མཇལ་དར་བསྒྲོན་ཏེ་བཀའ་བློན་དམ་འབུལ་གྱི་མཛད་སྒོ་རྒྱལ་ཁའི་ངང་ནས་གྲོལ་བཅས།།