༢༠༡༡ ཟླ་ ༩ ཚེས་ ༦ རེས་གཟའ་མིག་དམར།

༄༅། །རྒྱ་གར་རྒྱལ་ས་ལྡིར་རྟེན་གཞི་བྱས་པའི་(Indira Gandhi National Open University)ཨིན་དྷི་ར་གྷན་དྷི་རྒྱལ་ཡོངས་གཙུག་ལག་སློབ་གྲྭ་ཆེན་མོའི་སློབ་ཁང་དེ་ནས་བསླབ་པ་ཐར་སོན་རྣམས་པ་ལག་འཁྱེར་སྤྲོད་རྒྱུའི་ལོ་འཁོར་ཐེངས་ ༢༤ མཛད་སྒོའི་སྐུ་མགྲོན་གཙོ་བོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ་ཆིབས་སྒྱུར་བསྐྱངས་ཡོད་པ་ལྟར་ཕྱི་ལོ་ ༢༠༡༡ ཟླ་ ༩ ཚེས་ ༥ ཉིན་གཙུག་ལག་སློབ་གྲྭ་ཆེན་མོ་དེ་ནས་མགོན་པོ་གང་ཉིད་མཆོག་ལ་ཆེ་བསྟོད་ཀྱི་ཕྱག་འཁྱེར་(Honoris Causa)ཞེས་པ་འབུལ་ལམ་ཞུས་ཡོད།
དེ་ཡང་མཛད་སྒོའི་ཐོག་རྒྱ་གར་དབུས་གཞུང་གི་མིའི་ནུས་པའི་འབྱུང་ཁུངས་ཀྱི་བློན་ཆེན་གཞོན་པ་ལྕམ་སྐུ་ཌོག་ཊར་ཌེ་པར་ཌེ་ཤི་ཝ་རི་མཆོག་དང་། དེ་བཞིན་རྒྱ་གར་དབུས་གཞུང་གི་ཕྱི་འབྲེལ་དང་མིའི་ནུས་པའི་འབྱུང་ཁུངས་ཀྱི་ལས་འགན་གཅིག་ལྕོགས་བཞེས་མཁན་བློན་ཆེན་གཞོན་པ་ཨི་ཨེ་མན་ཧི་ངྷི་མཆོག་བཅས་ཀྱིས་གཙོས་གཙུག་ལག་སློབ་ཁང་དེའི་སློབ་དཔོན་དང་ལས་བྱེད་སློབ་ཕྲུག་སོགས་ཁྱོན་མི་གྲངས་ ༡༠༠༠ བརྒལ་བ་འདུ་འཛོམས་བྱུང་བའི་ཐོག་གཙུག་ལག་སློབ་ཁང་དེའི་ཉེ་བའི་རིགས་བདག་སློབ་དཔོན་ཝི་ཨེམ་ཝར་པི་ལཱ་མཆོག་གིས་གསུང་བཤད་གནང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་འཛམ་གླིང་ཞི་བདེ་དང་ཆོས་ལུགས་ཕན་ཚུན་མཐུན་སྒྲིལ། དེ་བཞིན་མིའི་ཀུན་སྤྱོད་སོགས་ཀྱི་ཐོག་རླབས་ཆེན་མཛད་འཕྲིན་རྒྱ་ཆེ་བསྐྱངས་དང་སྐྱོང་བཞིན་ཡིན་པར་བརྟེན་ངས་བླ་མེད་ཀྱི་གུས་བཀུར་ཞུ་རྒྱུ་ཡིན། ༸གོང་ས་ཏཱ་ལའི་བླ་མ་སྐུ་ཕྲེང་བཅུ་བཞི་པ་ཆེན་པོ་མཆོག་ལ་ཆེ་བསྟོད་ཀྱི་ཕྱག་འཁྱེར་འབུལ་རྒྱུའི་གོ་སྐབས་བྱུང་བར་ང་རང་ཧ་ཅང་དགའ་པོ་བྱུང་། ཕྱག་འཁྱེར་འདི་ནི་སྐུ་ཉིད་མཆོག་གིས་ད་བར་འཛམ་གླིང་ཞི་བདེའི་ཆེད་ལེགས་སྐྱེས་ཕུལ་ཡོད་པ་མ་ཟད། ལྷག་པར་སྐུ་ངལ་འཛེམས་མེད་ཐོག་འཛམ་གླིང་འདིའི་སྟེང་འཚེ་མེད་ཞི་བདེའི་ལྟ༌གྲུབ་གོང་འཕེལ་གཏོང་སླད་རླབས་ཆེན་གྱི་མཛད་འཕྲིན་རྒྱ་ཆེ་སྐྱོང་བཞིན་པར་ངོ་འཛིན་གྱིས་ཆེ་བསྟོད་ཞུ་སླད་ཕུལ་བ་ཞིག་ཡིན་པས་ངས་སྐུ་ཉིད་མཆོག་ལ་དགའ་བསུ་དང་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་།
དེ་ནས་ཁོང་གིས་༸གོང་ས་མཆོག་ལ་ཆེ་བསྟོད་ཀྱི་ཕྱག་འཁྱེར་(Honoris Causa) ཞེས་པ་འབུལ་ལམ་ཞུ་སྐབས་མགོན་པོ་གང་ཉིད་མཆོག་གིས་ཕྱག་འཁྱེར་དགྱེས་བཞེས་མཛད་དེ་བཀའ་སློབ་སྩལ་དོན། དེ་རིང་འདིར་དམིགས་བསལ་གཙུག་ལག་སློབ་གྲྭ་འདི་ནས་ངོས་ལ་གཟེངས་བསྟོད་ཀྱི་ཕྱག་འཁྱེར་གནང་བར་ཧ་ཅང་དགའ་པོ་བྱུང་། ཐུགས་རྗེ་ཆེ་ཟེར་གྱི་ཡིན། དེ་རིང་སླར་ཡང་ངོས་རང་གཙུག་ལག་སློབ་གཉེར་ཁང་འདིར་བཅར་རྒྱུ་བྱུང་བ་མ་ཟད། ཆེ་བསྟོད་ཀྱི་ཕྱག་འཁྱེར་ཞུ་རྒྱུ་བྱུང་བར་ཧ་ཅང་དགའ་པོ་བྱུང་། ངོས་རང་སློབ་ཕྲུག་ལེ་ལོ་ཅན་ཞིག་ལ་ངོས་འཛིན་བྱེད་བཞིན་ཡོད། འོན་ཀྱང་དཀའ་ལས་དེ་ཙམ་བརྒྱབ་མི་དགོས་པར་ཡང་བསྐྱར་ཕྱག་འཁྱེར་ཞིག་ཐོབ་བྱུང་། དེ་དང་ཆབས་ཅིག་བསླབ་པ་ཐར་སོན་པའི་སློབ་ཕྲུག་རྣམས་ལ་འཚམས་འདྲི་ཡོད། དེ་བཞིན་ཁྱེད་རང་ཚོས་སློབ་སྦྱོང་དེ་ལག་ཆ་ལྟ་བུར་བེད་སྤྱོད་བྱེད་དགོས། ལག་ཆ་དེ་སྤྱི་ཚོགས་ལ་ཕན་གནོད་ཀྱི་བེད་སྤྱོད་བྱེད་མིན་དེ་ཁྱེད་རང་ཚོའི་རྒྱུད་ལ་ཡོད་པའི་བྱམས་བརྩེའི་བསམ་བློར་རག་ལུས་ཡོད། དེར་བརྟེན་ནང་སེམས་ཀྱི་ཡོན་ཏན་ལ་དོ་སྣང་མང་ཙམ་སྤྲོད་དགོས། དུས་རབས་ཉེར་གཅིག་པ་འདི་ཞི་བདེའི་དུས་རབས་ཤིག་བཟོ་དགོས། ཞི་བདེའི་དུས་རབས་བརྗོད་སྐབས་དཀའ་ངལ་རྩ་བ་ནས་མེད་པ་ཞིག་ལ་ཤོད་ཀྱི་མེད། དཀའ་ངལ་ཡོང་ངེས་ཡིན། འོན་ཀྱང་རྩ་བའི་ཞི་བདེ་ལྡན་པའི་འཛམ་གླིང་ཞེས་བརྗོད་སྐབས་དཀའ་ངལ་གང་འདྲ་ཞིག་བྱུང་ཡང་དེ་དག་ཞི་བའི་ཐོག་ནས་ཕན་ཚུན་བསམ་ཤེས་དང་གྲོས་མོལ་བརྒྱུད་དེ་སེལ་དགོས་ཀྱི་རེད། ཅེས་བརྗོད་ཀྱི་ཡོད། རྒྱ་གར་ལ་གནའ་སྔ་མོ་ནས་ཞི་བདེ་དང་ཆོས་ལུགས་ཕན་ཚུན་མཐུན་སྒྲིལ་གྱི་ལམ་སྲོལ་བཟང་པོ་ཞིག་ཡོད། དེ་བཞིན་རྒྱལ་ཁབ་འདིར་འཛམ་གླིང་གི་ཡུལ་གྲུ་གཞན་རྣམས་ཞི་བདེའི་ལམ་ཕྱོགས་སུ་སྣེ་ཁྲིད་བྱ་རྒྱུའི་ནུས་པ་ཡོད། སྨོན་ལམ་གསོལ་འདེབས་དང་སྒོམ་སྒྲུབ་སོགས་དེའི་ཆ་ཤས་ཤིག་ཡིན། འོན་ཀྱང་དེ་ལས་གལ་ཆེ་བ་ནི་སློབ་སྦྱོང་རེད། ལྷག་པར་སློབ་གཉེར་ཁང་འདི་ལྟ་བུར་ཆ་མཚོན་ན། གཞོན་སྐྱེས་ཧ་ཅང་མང་པོར་སློབ་སྦྱོང་གི་གོ་སྐབས་སྤྲོད་ཀྱི་ཡོད་སྟབས། རྒྱལ་ཁབ་འདིའི་སྤྱི་ཡོངས་ཀྱི་འཕེལ་རྒྱས་ལ་ལེགས་སྐྱེས་ཧ་ལས་པ་ཞིག་རེད། ཕྱོགས་མཚུངས་རྒྱལ་ཁབ་འདི་ཡང་འཛམ་གླིང་གི་ཆ་ཤས་གལ་ཆེན་ཞིག་ཡིན་པར་བརྟེན། ཁྱེད་རང་ཚོར་འཛམ་གླིང་ཡར་རྒྱས་གཏོང་རྒྱུར་འོས་འགན་ཆེན་པོ་ཞིག་བསྒྲུབ་རྒྱུའི་ནུས་པ་ཡོད། གཞོན་སྐྱེས་ཁྱེད་རང་ཚོར་འཆར་སྣང་ཞིག་དགོས་ཀྱི་རེད། སོ་སོའི་ས་གནས་གཅིག་པུ་མ་ཡིན་པར་རྒྱལ་ཁབ་འདིའི་ས་མཚམས་ལས་བརྒལ་ཏེ་ཨེ་ཤི་དང་འཛམ་གླིང་སྤྱི་ལ་འགན་ཁུར་གྱི་བསམ་བློ་ཞིག་ངེས་པར་དུ་དགོས་པ་ཡིན།  བོད་ཀྱི་རིག་གནས་ཀྱི་ནང་དོན་གཙོ་བོ་ཁག་རྒྱ་གར་ནས་བྱུང་བ་ཞིག་ཡིན་པ་དང་། དེ་བཞིན་བོད་དུ་ནང་ཆོས་དར་འགོ་ཚུགས་རྗེས་རྒྱ་གར་ནང་ལེགས་སྦྱར་དང་པཱ་ལི་སྐད་དུ་ཡོད་པའི་ནང་པའི་དཔེ་ཆ་པོད་སུམ་བརྒྱ་ལྷག་ཙམ་ཞིག་བོད་ཡིག་ཐོག་ཕབ་སྒྱུར་ཞུས་ཡོད། དཔེ་ཆ་དེ་དག་ནང་འགྲེལ་བརྗོད་བྱས་པའི་ཁྲོད་བོད་པའི་བསླབ་པ་སློབ་གཉེར་བ་རྣམས་ཀྱིས་གང་སྦྱང་ཡོད་པ་རྣམས་དངོས་སུ་ལག་ལེན་བསྟར་ཡོད་སྟབས། རྒྱ་གར་དང་བོད་མི་ཚོའི་དབར་དགེ་སློབ་ཀྱི་འབྲེལ་བ་ཆགས་ཡོད། ད་ཆ་དེ་སྔ་རྒྱ་གར་ནས་བོད་དུ་དར་བའི་ནང་ཆོས་ཀྱི་རིག་གནས་རྣམས་རྒྱ་གར་དུ་ཕྱིར་ལོག་བྱ་རྒྱུའི་དུས་ལ་བབས་ཡོད། ནང་ཆོས་ཀྱི་རིག་གནས་དེ་དག་ལ་ཚན་རིག་དང་ལྟ་གྲུབ་ནང་ཆོས་བཅས་དབྱེ་བ་གསུམ་དུ་འབྱེད་དགོས། ནང་ཆོས་ཀྱི་ཚན་རིག་ནི་སེམས་ཀྱི་རྣམ་གཞག་སྐོར་དང་། ལྟ༌གྲུབ་ནི་རྟེན་འབྱུང་གིས་རྣམ་གཞག་སྐོར། ཆོས་ཀྱིས་སྐྱབས་འགྲོ་གསོལ་འདེབས་དང་སྐྱེ་བ་སྔ་ཕྱི་སོགས་ཀྱི་སྐོར་གསུང་གི་ཡོད། དེར་བརྟེན་ད་ཆ་མཐོ་སློབ་འདིའི་ནང་བོད་ཀྱི་རིག་གནས་སློབ་གཉེར་ཁང་ཞིག་གསར་འཛུགས་བྱས་པ་དེ་བརྒྱུད་ནས་ནང་ཆོས་ཀྱི་ཚན་རིག་དེས་ནང་སེམས་ཀྱི་འགྲོ་སྟངས་སྐོར་ལ་སློབ་གཉེར་གྱིས་ཕན་ཐོགས་ཡོང་རྒྱུར་རེ་བ་བྱེད་བཞིན་ཡོད།
སྤྱིར་བཏང་ཤེས་ཡོན་གྱིས་ཕན་གནོད་གཉིས་ཀར་ཡོང་གི་ཡོད་སྟབས། ཤེས་ཡོན་བེད་སྤྱོད་ཡག་པོ་ཡོང་རྒྱུར་བློ་སྟོབས་དང་རང་སེམས་རང་གིས་སྣོན་ཐུབ་པ་ཞིག་དགོས། མི་སྒེར་དང་ཁྱིམ་ཚང་དེ་བཞིན་སྤྱི་ཚོགས་བཅས་ཀྱི་ནང་བདེ་སྐྱིད་ཡོང་རྒྱུའི་རྨང་གཞི་གཙོ་བོ་ནི་སྤྱོད་ཚུལ་ལ་རག་ལུས་ཡོད། ཅེས་སོགས་ཀྱི་བཀའ་སློབ་སྩལ་ཡོད།
དེ་བཞིན་མགོན་པོ་གང་ཉིད་མཆོག་གིས་ཨིན་དྷི་ར་གྷན་དྷི་རྒྱལ་ཡོངས་གཙུག་ལག་སློབ་ཁང་དེའི་ནང་བོད་རིག་པའི་སྡེ་ཚན་ཞིག་ཟུར་འཛུགས་གནང་བ་དེ་དབུ་འབྱེད་བསྐྱངས་ཡོད་པ་བཅས། །