༢༠༡༡ ཟླ་ ༩ ཚེས་ ༢༥ རེས་གཟའ་ཟླ་བ།
༄༅། །རང་རིགས་དང་སློབ་རྣམས་ནས་ལོ་ལྟར་མཧཱ་གུ་རུའི་འབུམ་ཚོགས་འབུལ་ཤོམ་ཞུས་དང་ཞུ་མུས་ལྟར་འདི་ལོ་བོད་རྒྱལ་ལོ་ ༢༡༣༨ རབ་གནས་ལྕགས་མོ་ཡོས་ལོའི་བོད་ཟླ་ ༧ ཚེས་ ༢༠ ནས་ ༢༤ བར་དང་ཕྱི་ལོ་ ༢༠༡༡ ཟླ་ ༩ ཚེས་ ༢༣  ནས་ཚེས་ ༢༧ བར་ཉིན་གྲངས་ལྔའི་རིང་༸རྒྱལ་བའི་སྐུ་ཕྱྭ་དང་། བོད་དོན་བདེན་མཐའ་གསལ་ཐབས་སུ་དམིགས་ཏེ་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་མཆོད་སྤྲིན་སྟོང་ཚར་འབུལ་བཤམས་ཐོག་མཧཱ་གུ་རུའི་འབུམ་ཚོགས་འཚོགས་བཞིན་ཡོད།
དེ་ཡང་རང་རིགས་དང་སློབ་རྣམས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ་ཕྱི་ཚེས་ ༢༦ ཉིན་གྱི་སྔ་དྲོ་ཆུ་ཚོད་ ༧།༣༠ པའི་ཐོག་མགོན་པོ་གང་ཉིད་མཆོག་ཕོ་བྲང་ནས་དང་སློབ་ཀྱི་རུ་དཔོན་གྲགས་པ་བསྟན་འཛིན་ལགས་དང་དཀར་རྒྱུགས་ཆོས་འཕེལ་རྣམས་གཉིས་ཀྱིས་སྤོས་སྣེས་སྔོན་བསུས་ཏེ་གདན་ཞུས་ཀྱིས་མཧཱ་གུ་རུའི་འབུམ་ཚོགས་ཀྱི་མགོན་དུ་དབུ་བཞུགས་ཐོག་རྣམ་རྒྱལ་གྲྭ་ཚང་གི་མཁན་རིན་པོ་ཆེ་མཆོོག་དང་། རྣམ་གྲྭ་འདུས་ཚོགས། དེ་བཞིན་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་དང་ཁྲིམས་ཞིབ་པ་གཞན་གཉིས་མཆོག ལྷན་ཁང་ཁག་གི་བཀའ་བློན་རྣམ་པས་དབུས་དྲུང་ཆེ་ཆུང་ཁག་གཅིག བཞུགས་སྒར་ཁུལ་གནས་རིས་མེད་ཆོས་སྡེ་ཁག་གི་དགེ་བཙུན་སྔགས་གསུམ། གཞན་ཡང་གཉུག་མར་གནས་པ། གློ་བུར་ལྷགས་པའི་དགེ་བཙུན་སྔགས་གསུམ་བཅས་ཁྱོན་མི་གྲངས་ ༡༠༠༠ བརྒལ་བ་རྣམས་ནས་བྱང་གཏེར་རིག་འཛིན་གདུང་སྒྲུབ་ཀྱི་སྒོ་ནས་མཧཱ་གུ་རུའི་ཚོགས་མཆོད་འབུམ་ཐེར་སྨིན་སྒྲུབ་འཚོགས་བཞིན་ཡོད། ཉིན་ལྔའི་རིང་གི་མཧཱ་གུ་རུའི་འབུམ་ཚོགས་སྨིན་སྒྲུབ་ཞུ་སྐབས་ཞིང་མཆོག་འདུས་པ་རྒྱ་མཚོར་བསྙེན་བཀུར་གསོལ་ཇ་དང་། བཞེས་བག གུང་ཚིགས་དཀར་སྐྱོང་། དགེ་བཙུན་སྔགས་གསུམ་ལ་སྐུ་འགྱེད་འབུལ་བཞིན་ཡོད་པ་བཅས། །