༢༠༡༡ ཟླ་ ༩  ཚེས་ ༩ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༩ ཚེས་ ༨ ཉིན་༸གོང་ས་༸སྐྱབས་མགོན་ཆེན་པོ་མཆོག་ཁེ་ཎ་ཌའི་ཁུལ་གྱི་མཛད་འཕྲིན་རྣམས་ལེགས་པར་གྲུབ་སྟེ་མེཀ་སི་ཀོར་ཆིབས་སྒྱུར་བསྐྱངས་ཏེ་མོན་ཊེ་རིའི་གནམ་ཐང་དུ་༸ཞབས་སོར་བདེ་བར་འཁོད་སྐབས་ལྷོ་ཨ་མི་རི་ཀའི་འབྲེལ་མཐུད་པ་ཚེ་དབང་ཕུན་ཚོགས་ལགས་དང་མེཀ་སི་ཀོ་བོད་ཁང་ཚོགས་གཙོ་སྐུ་ཞབས་ཨེན་ཊོ་ནིའོ་ཀ་རམ་ལགས།(Antonio Kara) མོན་ཊེ་རི་བོད་ཁང་འགན་འཛིན་སྐུ་ཞབས་ཀར་མེན་ཊེ་ཝི་ནོ་(Carmen Trevino)བཅས་ཀྱིས་ཕེབས་བསུ་གཟབ་རྒྱས་ཞུས་ཡོད་པ་མ་ཟད། གནམ་ཐང་གི་གལ་ཆེའི་མི་སྣ་ངལ་གསོ་ཁང་དུ་མེཀ་སི་ཀོ་ནང་སྲིད་ལས་དོན་ཁང་གི་སྐུ་ཚབ་འཐུས་མི་ལྕམ་སྐུ་མ་རི་ཡ་ཕར་ནན་ཌ་ཧེ་རལ་ཌེ་སི་རོ་སི་(Maria Fernanda Heraldez  Rios) མཆོག་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད།
དེ་རྗེས་བཞུགས་གནས་མགྲོན་ཁང་དུ་༸ཞབས་སོར་འཁོད་མཚམས་བོད་ཁང་གི་སློབ་ཕྲུག་ཁག་གཅིག་དང་བཞུགས་གནས་མགྲོན་ཁང་གི་འགན་འཛིན། དེ་བཞིན་ཡུལ་ཁྲིམས་ལ་སྲུང་བརྩི་ཞུ་རྒྱུའི་གོམས་བཤིས་དང་འགྲོ་བ་མིའི་རིན་ཐང་གོང་མཐོར་གཏོང་རྒྱུར་དམིགས་ཏེ་བཙུགས་པའི་ཚོགས་པའི་(Council for the promotion of Human Values and Culture of Law Abiding)ལས་བྱེད་པ་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད།
དེ་ཡང་ཕྱི་ཚེས་ ༩ སྔ་དྲོ་མགོན་པོ་གང་ཉིད་མཆོག་གིས་གཞན་ཕན་དང་བྱམས་བརྩེའི་བསམ་པས་ཀུན་ནས་བླང་སྟེ་མཐུན་སྒྲིལ་གོང་མཐོར་གཏོང་ཐབས། ཞེས་པའི་བརྗོད་གཞིའི་ཐོག་བཀའ་སློབ་སྩལ་ཡོད་པ་དང། གསར་འགོད་པ་ཚོར་བཀའ་སློབ་སྩལ་གྲུབ་བསྟུན།  མེཀ་སི་ཀོ་སི་ཊིར་(Mexico City)ཆིབས་ཞལ་སྒྱུར་གནང་མཛད་ཡོད་པ་བཅས།།