༢༠༡༡ ཟླ་ ༨ ཚེས་ ༨ རེས་གཟའ་ཟླ་བ།
༄༅། །འདི་གར་ཁུངས་ལྡན་གནས་ཚུལ་འབྱོར་བར་གཞིགས་ན། ཕྱི་ལོ་ ༢༠༡༡ ཟླ་ ༨ པའི་ཚེས་ ༨ ཉིན་བཙན་བྱོལ་ནང་མང་ཚོགས་ཀྱིས་འོས་འདེམས་བྱས་པའི་བཀའ་ཁྲི་སྐབས་གསུམ་པའི་ལས་འཁུར་འགོ་འཛུགས་ཀྱི་དམ་འབུལ་ཞུས་ཡོད་པ་ལྟར། བོད་ཀྱི་ས་ཁུལ་གང་སར་རྒྱ་ནག་གཞུང་ཕྱོགས་ནས་བོད་མི་ཚོས་རྟེན་འབྲེལ་ཞུ་རྒྱུར་དོགས་གཞི་ཆེན་པོ་བྱས་ཏེ་དམག་མི་འགྲེམས་འཇོག་དང་སོ་ལྟ་ནན་པོ་བྱས་ཏེ་དམ་བསྒྲགས་ཤུགས་ཆེ་བྱེད་བཞིན་ཡོད་པ་མ་ཟད། ལྷག་པར་དུ་ཨ་མདོ་བླ་བྲང་ཁུལ་དུ་དམ་བསྒྲགས་ཆེན་པོ་བྱས་ཏེ། བླ་བྲང་དགོན་པའི་མཐའ་བསྐོར་དུ་ཚན་པ་མི་འདྲ་བ་ཁག་ཁ་ཤས་ཀྱིས་ལས་བྱེད་དང་དམག་མི་སོགས་ཡོང་སྟེ་དགོན་པའི་མཐའ་ཡོངས་སུ་བསྐོར་ཏེ་དམ་བསྒྲགས་ཆེན་པོ་བྱས་ཡོད་འདུག་པ་དང་། དགེ་འདུན་པ་གྲངས་ ༡༥༠ ཙམ་ལམ་ཁ་སྲུང་མཁན་དང་ལྟ་རྟོགས་བྱེད་མཁན་སོགས་སུ་བཀོད་སྒྲིག་བྱེད་བཅུག་ཡོད་འདུག་ཅིང་། དེ་ལྟར་དམ་བསྒྲགས་བྱེད་དགོས་པའི་རྒྱུ་མཚན་གཞན་ཞིག་ཀྱང་ཡོད་པ་ནི་རིང་མིན་ཟླ་བ་འདིའི་ཚེས་ ༡༡ ཉིན་རྒྱ་ནག་གཞུང་གི་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་དངོས་སུ་བླ་བྲང་ཁུལ་དུ་འབྱོར་གཏན་འཁེལ་ཡོད་གནས་དང་། པཎ་ཆེན་རྒྱལ་མཚན་ནོར་བུས་བླ་བྲང་སོགས་སུ་ལྟ་སྐོར་རྗེས་རྔ་པ་ས་ཁུལ་ཛམ་ཐང་རྫོང་ཁོངས་སུའང་དགོན་པ་ཞིག་ནས་གདན་ཞུ་བྱ་རྒྱུའི་གྲ་སྒྲིག་བྱེད་བཞིན་ཡོད་ནའང་ས་གནས་མང་ཚོགས་དང་དགོན་པ་དེའི་དགེ་འདུན་པས་དེ་ཙམ་འདོད་མོས་མ་བྱས་པར་ངོ་རྒོལ་གྱི་རྣམ་འགྱུར་ཤུགས་ཆེ་བཏོན་གྱི་ཡོད་པའི་གནས་ཚུལ་ཡང་ཐོན་བཞིན་ཡོད་འདུག་པ་བཅས། །
རྒྱ་ནག་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་བླ་བྲང་ཁུལ་དུ་ཡོང་གཏན་འཁེལ་ཏེ་ས་གནས་སུ་དམ་བསྒྲགས་ཤུགས་ཆེ་བྱེད་བཞིན་པ།
གསར་གནས།
འབྲེལ་གནས།
