༢༠༡༡ ཟླ་ ༨ ཚེས་ ༢༥ རེས་གཟའ་ཕུར་བུ།
༄༅། །འདི་གར་འདི་ཟླའི་ཚེས་ ༢༥ ཉིན་ཁུངས་ལྡན་གནས་ཚུལ་འབྱོར་གསལ་ལྟར་ན། ཕྱི་ལོ་ ༢༠༡༠ ཟླ་ ༤ ཚེས་ ༡༤ མཚོ་སྔོན་ཡུལ་ཤུལ་ས་ཁུལ་དུ་ས་ཡོམ་གྱི་གོད་ཆག་ཚབས་ཆེན་བྱུང་རྗེས་མི་སྣ་མང་པོ་ཤི་རྨས་བྱུང་བ་མ་ཟད། ཁྱིམ་གཞིས་རྩ་གཏོར་དང་འཚོ་བའི་རྟེན་ཡུལ་གྱི་ས་ཁང་དང་ས་ཞིང་ཁག་ཀྱང་གནས་སྐབས་བེད་མེད་དུ་གྱུར་བའི་གནས་ཚུལ་ཐོན་ཡོད། རྒྱ་ནག་གཞུང་ཕྱོགས་ནས་ཕྱི་ཕྱོགས་སུ་ས་གནས་དེར་བསྐྱར་བསྐྲུན་ལས་གཞི་ཁག་ཧ་ཅང་ཡག་པོ་སྤེལ་གྱི་ཡོད་པའི་ཁྱབ་བསྒྲགས་ཤུགས་ཆེ་བྱེད་བཞིན་ཡོད།
འོན་ཀྱང་ས་གནས་བོད་མི་ཚོར་འདོད་བློ་ཁེངས་པའི་བསྐྱར་བསྐྲུན་གྱི་ཕན་ཐོགས་ཡོང་གི་མེད་སྟབས་ད་ལོའི་ཟླ་ ༤ ཚེས་ ༡ ཉིན་ཡུལ་ཤུལ་གྲོང་ཁྱེར་དུ་བོད་མི་ཧ་ཅང་མང་པོ་འདུ་འཛོམས་ཀྱིས་ རང་གི་ས་ཆ་རང་ལ་བདག་དབང་དགོས་སོགས་བྲིས་པའི་འབོད་ཚིག་འཕྲེད་དར་འཁྱེར་ཏེ་རྒྱ་ནག་གཞུང་ལ་ངོ་རྒོལ་བྱས་པའི་གནས་ཚུལ་ཐོན་འདུག ངོ་རྒོལ་བྱེད་མཁན་དེ་དག་གིས་ཚེས་ ༡ ནས་ཚེས་ ༣ བར་མུ་མཐུད་ངོ་རྒོལ་བྱས་ཡོད་པ་དང་། དེ་ལྟར་བྱེད་བྱེད་དགོས་པའི་རྒྱུ་མཚན་གཙོ་བོ་ནི། ཕྱི་ལོ་ ༢༠༡༠ ཟླ་ ༤ ཚེས་ ༡༤ ཉིན་ཡུལ་དེར་ས་ཡོམ་གྱི་གོད་ཆག་ཚབས་ཆེ་བྱུང་རྗེས་རྒྱ་ནག་གཞུང་ནས་གྲོང་ཁྱེར་བསྐྱར་སྐྲུན་དང་།
ལྷག་པར་བོད་རིགས་མང་ཚོགས་ཀྱི་སྡོད་ཁང་གསར་རྒྱག་གི་ལས་འཆར་ཐད་ས་ཆའི་བདག་དབང་དང་བགོས་འགྲེམས་བྱེད་ཕྱོགས་ཐད་དྲང་བདེན་ཡོང་གི་མེ་པའི་བསམ་ཚུལ་ཤུགས་ཆེ་ཡོད་པར་བརྟེན་ནས་བྱུང་བ་ཞིག་ཡིན་པ་མ་ཟད། ས་གནས་བོད་རིགས་མང་ཚོགས་ཀྱི་ས་བབ་ལེགས་པའི་ས་ཆ་རྣམས་རྒྱ་ནག་གཞུང་ཕྱོགས་ནས་བདག་བཟུང་བྱས་པར་མང་ཚོགས་ཁྲོད་བློ་ཁ་མ་ཁེངས་པའི་བསམ་ཚུལ་ཤུགས་ཆེ་ཡོད་བཞིན་པ་སོགས་ཡིན་པ་རེད།་ དེང་སྐབས་ད་དུང་ཡུལ་ཤུལ་ཁུལ་གྱི་བྱ་ཆུ་ཁོག་ཅེས་པའི་ས་གནས་སོགས་སུ་རྒྱ་རིགས་ཁྱོན་ཆེ་གནས་སྤོ་བྱས་ཏེ་བོད་མི་ཚོའི་འཚོ་རྟེན་ས་ཞིང་ཁག་གཅིག་ཕྱི་ནས་ཡོང་བའི་རྒྱ་རིགས་ཚོས་བདག་གཉེར་བྱས་ཏེ་སྔོ་ཚལ་འདེབས་ལས་བྱས་པ་མ་ཟད། རྒྱ་རིགས་དེ་ཚོས་བོད་མིའི་ཐོན་སྐྱེད་བྱེད་ཡུལ་བདག་བཟུང་གིས་ལོ་རྒྱུས་སྟེང་གི་ས་གནས་ཀྱི་བདག་པོ་བོད་མི་རྣམས་ལ་ཐོན་སྐྱེད་བྱེད་ཡུལ་མེད་པར་གྱུར་ཏེ་འཚོ་རྟེན་ལ་དཀའ་ངལ་འཕྲད་གཞིར་གྱུར་ཡོད་པ་དང་། དེ་ལས་ལྡོག་སྟེ་རྒྱ་རིགས་ཚལ་ཞིང་འདེབས་ལས་བྱེད་མཁན་དེ་ཚོས་ལོ་བསྟུད་མར་ལས་ཀ་བྱེད་མཁན་བསྡུ་རྒྱུའི་བརྡ་ཁྱབ་སྤེལ་ཏེ་ཕྱི་ནས་ཡོང་བའི་རྒྱ་རིགས་གང་མང་ས་གནས་དེ་གར་གཏན་སྡོད་བྱ་རྒྱུའི་ཁོར་ཡུག་བསྐྲུན་ཏེ་ཡུལ་གྱི་བདག་པོ་ས་གནས་བོད་རིགས་རྣམས་འཚོ་བའི་རྟེན་གཞི་མེད་པར་འགྱུར་རྒྱུའི་ཉེན་ཁ་འཕྲད་བཞིན་པའི་གནས་ཚུལ་ཐོན་འདུག །།
