༢༠༡༡ ཟླ་ ༨ ཚེས་ ༢༢ རེས་གཟའ་ཟླ་བ།
༄༅། །འདི་གར་ཐེ་ཝན་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༨ ཚེས་ ༢༡ ཉིན་ཐའེ་ཝན་བོད་ཀྱི་སྐུ་ཚབ་དོན་གཅོད་ཁང་དང་། ཐེ་ཝན་དུ་གནས་སྡོད་བོད་རིགས་ཚོགས་པ་ཐུན་མོང་གིས་གོ་སྒྲིག་ཐོག་བོད་རང་དབང་གི་ཆེད་དུ་སྐུ་ལུས་མཆོད་འབུལ་གནང་བའི་བོད་ཀྱི་དཔའ་བོ་ཚེ་དབང་ནོར་བུ་སོགས་ཀྱི་ཆེད་དུ་མཆོད་འབུལ་སྨོན་ལམ་ཞིག་གོ་སྒྲིག་གནང་འདུག
དེ་ཡང་བོད་ཁམས་རྟའུ་ཉ་མཚོ་དགོན་པའི་དགེ་འདུན་ཚེ་དབང་ནོར་བུ་ཞུ་བས་༼བོད་ཀྱི་རྩ་བའི་བླ་མ་༸གོང་ས་མཆོག་བོད་ལ་གདན་འདྲེན་ཞུ་དགོས་༽སོགས་ཀྱི་ཡིག་ཆ་བཀྲམ་པ་དང་།
རང་གི་ལུས་ཐོག་ཏུ་ས་སྣུམ་བྱུགས་ཏེ་མེ་ལྕེ་རབ་ཏུ་འབར་བའི་ཁྲོད་བོད་མི་རིགས་དང་བསྟན་པ་ཆབ་སྲིད་དོན་དུ་རྩ་ཆེའི་ལུས་སྲོག་བློས་གཏོང་གནང་བར་དམ་པ་གང་དེའི་བདུན་ཚིགས་དང་པོ་འདི་ཚེས་ ༢༡ ཉིན་འཁེལ་བ་དང་སྟབས་བསྟུན། ཕྱི་ལོ་ ༡༩༩༨།༤།༢༩ ཉིན་རྒྱ་གར་རྒྱལ་སར་ལྡི་ལིར་བོད་མི་ཐུབ་བསྟན་དངོས་གྲུབ་ལགས་དང་།
ཕྱི་ལོ་ ༢༠༠༩།༢།༢༧ ཉིན་བོད་རྔ་པ་ཀིརྟི་དགོན་གྱི་དགེ་འདུན་བཀྲ་བྷེ། ༢༠༡༡།༣།༡༦ ཉིན་ཀིརྟི་དགོན་གྱི་དགེ་འདུན་ཕུན་ཚོགས༌སོགས་ཀྱིས་བོད་མིའི་རྩ་དོན་ཆེད་རང་ལུས་མེར་སྲེག་བློས་བཏང་བར་ཤ་ཁྲག་གཅིག་གི་བོད་མི་རྩམ་ཟན་ཡོངས་ནས་དཔའ་བོ་དེ་དག་གི་ཞུམ་པ་མེད་པའི་སྙིང་སྟོབས་ལ་བཀའ་དྲིན་རྗེས་དྲན་དང་།
ཁོང་རྣམས་ལ་གདུང་སེམས་མཉམ་སྐྱེ་མཚོན་སླད་སྐྱབས་རྗེ་བཀའ་ཟུར་ཀིརྟི་རིན་པོ་ཆེ་མཆོག་དབུ་བཞུགས་ཐོག་བོད་ཀྱི་བླ་སྤྲུལ་དགེ་བཤེས་དང་། ཐེ་ཝན་དུ་གནས་སྡོད་བོད་མི། བོད་དོན་ལ་རྒྱབ་སྐྱོར་གནང་མཁན་སོགས་མཉམ་འཛོམས་ཀྱིས་སྔ་དྲོ་བསྔོ་བ་སྨོན་ལམ་དང་། ལྷ་བླ་མ་རྣམས་ལ་གསོལ་འདེབས། དཀར་ཕྱོགས་སྐྱོང་བའི་སྲུང་མ་རྣམས་ལ་འཕྲིན་བཅོལ་གནང་ཡོད།
དེ་ཡང་ཐོག་མར་སྐུ་ཚབ་དོན་གཅོད་ཀྱིས་སྨོན་ལམ་གོ་སྒྲིག་ཞུ་དགོས་པའི་དགོས་པ་རྒྱུ་མཚན་ངོ་སྤྲོད་གནང་དོན། དེ་རིང་ང་ཚོས་རྗེས་དྲན་ཞུ་བ་ནི་སྨོན་ལམ་འདོན་པ་ཙམ་མ་ཡིན་པར། ཁོང་རྣམ་པས་འདུན་པ་དང་དམིགས་ཡུལ་གང་གི་ཆེད་དུ་རང་སྲོག་བློས་བཏང་བ་དེ་ཤེས་དགོས་པ་དང་། བོད་མི་སྟོང་ཕྲག་མང་པོ་བཙོན་འཇུག་དམ་བསྒྲགས་འོག་ཉིན་མ་ལོ་ལས་རིང་བའི་སྡུག་སྦྱོང་འོག་མིག་ཅེ་རེར་ཕྱི་སྡོད་བོད་མི་རྣམས་ལ་རེ་ལྟོས་བྱེད་བཞིན་ཡོད་པས། ཁོང་ཚོའི་རེ་བ་སྟོང་ཟད་དུ་མི་འགྲོ་བ་བྱེད་དགོས་པ་མ་ཟད།
ང་ཚོས་བོད་ནང་གི་བོད་མི་ཚོའི་མགྲིན་ཚབ་བྱས་ཏེ་བོད་དོན་འཛམ་གླིང་ཐོག་ཁྱབ་བསྒྲགས་དང་། ཁོང་རྣམ་པའི་རེ་བ་རྣམས་འགྲུབ་ཐུབ་པའི་ལས་འགུལ་སྣ་མང་སྤེལ་དགོས་པའི་གསུང་བཤད་གནང་བ་དང་། 
དུས་མཚུངས་ཐེ་ཝན་དུ་གནས་སྡོད་བོད་རིགས་ཚོགས་པའི་གྲོས་ཆོད་ལྟར་ཐེ་ཝན་དུ་གནས་སྡོད་བོད་མི་བཀྲ་ཤིས་ཚེ་རིང་སོགས་ཀྱིས་རྐང་འཁོར་བཞོན་ཏེ་ཐེ་ཝན་གྱི་རྒྱལ་ས་ཐའེ་པེ་གྲོང་ཁྱེར་ནང་བོད་དོན་དང་། བོད་ཀྱི་དཔའ་བོ་རྣམ་པའི་བྱས་རྗེས་ངོ་སྤྲོད་ཁྱབ་བསྒྲགས་ཀྱིས་ལས་འགུལ་སྤེལ་བཞིན་པར་བསྔགས་བརྗོད་དང་། ལས་འགུལ་དེའི་ཐོག་བོད་མི་གང་མང་མཉམ་ཞུགས་ཡོང་བའི་འབོད་སྐུལ་ཡང་ཞུས་ཡོད།
དེ་རྗེས་སྐྱབས་རྗེ་བཀའ་ཟུར་ཀིརྟི་རིན་པོ་ཆེ་མཆོག་གིས་གསུང་བཤད་གནང་དོན། བོད་ནང་གི་བོད་མི་རྣམས་ཉིན་མཚན་འཁྱོལ་དཀའ་བའི་དཀའ་སྡུག་འོག་གནས་ཡོད་པ་དང་། ང་ཚོས་ད་ལྟ་འདས་པོ་དེ་དག་ལ་རྗེས་དྲན་ཞུ་སྐབས། ཁོང་ཚོས་རང་གི་གཅེས་པའི་ལུས་སྲོག་ཚུན་ཆད་བློས་གཏོང་གནང་བའི་དམིགས་ཡུལ་དང་། འདུན་པ་གང་ཡིན་པ་དེ་ང་ཚོས་གསལ་པོ་ཤེས་པ་བྱེད་དགོས། ང་ཚོ་བོད་མི་མི་རེ་ངོ་རེས་འགན་ཞིག་བླངས་ཏེ་ལས་དོན་སྒྲུབ་དགོས་པ་མ་ཟད། བོད་མི་རྣམས་མཐུན་སྒྲིལ་རྡོག་རྩ་ཆིག་སྒྲིལ་གྱིས་ནུས་ཤུགས་གཅིག་ཏུ་བསྒྲིལ་རྒྱུ་དེ་གལ་ཆེ་ཡིན་སྐོར་སོགས་ཀྱི་གསུང་བཤད་གནང་། མཐར་སྨོན་ལམ་གསུང་འདོན་གྲུབ་རྗེས་ཐེ་ཝན་གནས་སྡོད་བོད་རིགས་ཚོགས་པའི་ཚོགས་གཙོས་རྗེས་དྲན་མཆོད་འབུལ་ལ་མཉམ་ཞུགས་གནང་མཁན་ཡོངས་ལ་ཐུགས་རྗེ་ཆེ་ཞུས་པ་དང་། དེ་ནས་དོན་གཅོད་ལས་ཁུངས་ནས་བོད་དོན་ལས་འགུལ་དང་སྨོན་ལམ་སྐབས་གསོལ་ཚིགས་སོགས་རྒྱུ་སྦྱོར་མཐུན་རྐྱེན་སྐྲུན་མཁན་བོད་མི་དགྲ་བཅོམ་པ་དང་། བཀྲ་ཤིས་ཚེ་རིང་། འཆི་མེད་རྒྱ་མཚོ། སྐལ་བཟང་ལྷུན་གྲུབ་སོགས་ལ་ཐུགས་རྗེ་ཆེ་ཞུའི་མཇལ་དར་གནང་སྟེ་ཚང་མ་སྐུ་བཞེངས་ཐོག་དཔའ་བོའི་བརྙན་པར་ལ་ཁ་ཕྱོགས་ཏེ་བོད་རྒྱལ་ཁབ་ཆེན་པོའི་རྒྱལ་གླུ་དབྱངས་སུ་གྱེར་ནས་མཆོད་འབུལ་མཇུག་སྒྲིལ་གནང་ཡོད་པ་བཅས།།
