༢༠༡༡ ཟླ་ ༨ ཚེས་ ༡༦ རེས་གཟའ༌མིག་དམར།
༄༅། །ཕྱི་ལོ་ ༢༠༡༡ ཟླ་ ༨ ཚེས་ ༡༣ ཉིན་༸གོང་ས་མཆོག་གིས་ལྷོ་ཕྱོགས་ཕ་རན་སི་ཊོ་ལོ་སིའི་ནང་སློབ་དཔོན་ཀ་མ་ལ་ཤི་ལས་མཛད་པའི་སྒོམ་རིམ་བར་མའི་ཆོས་འབྲེལ་དབུ་འཛུགས་མཛད་ཡོད། དེ་ཡང་སྔ་དྲོ་ཐོག་མར་༸གོང་ས་མཆོག་གིས་ཧོ་ལེན་ཌིའི་རྒྱལ་ཡོངས་བརྙན་འཕྲིན་ (Dutch Television) ནང་ཧོལ་ལེན་ཌིའི་གྲོས་ཚོགས་འཐུས་མི་ལྕམ་སྐུ་ཨེ་རི་ཀ་ཊེ་པི་སི་ཊ་མཆོག་གི་ཆེད་དོན་དྲི་བར་བཀའ་ལན་སྩལ། དེ་ནས་ཆོས་འབྲེལ་མཛད་ཡུལ་ཛེ་ནི་ཐི་ཞེས་པའི་ས་གནས་སུ་ཆིབས་སྒྱུར་བསྐྱངས། དེ་ཡང་ཐོག་མར་ནང་ཆོས་ངོ་སྤྲོད་དང་འབྲེལ་བའི་བཀའ་སློབ་སྩལ། སྐབས་དེར་༸གོང་ས་མཆོག་གིས་སྤྱིར་འཛམ་གླིང་ནང་ཆོས་ལུགས་འདྲ་མིན་ཡོད་པ་རྣམས་ཕན་ཚུན་མཐུན་སྒྲིལ་བྱེད་རྒྱུ་ཧ་ཅང་གལ་ཆེ་ཡིན་པ་དང་།  ལྷག་པར་རྒྱ་གར་ནང་ཆོས་ལུགས་མི་འདྲ་བ་མང་པོ་ལོ་ངོ་སྟོང་ནས་ཕན་ཚུན་འཆམ་མཐུན་ཐོག་མཉམ་གནས་ཐུབ་པ་དེར་ཡུལ་གྲུ་གཞན་ཚོས་མིག་དཔེ་བཟང་པོ་ལེན་དགོས་པའི་ལམ་སྟོན་མཛད། གཞན་ཡང་སྐབས་དེར་ཡེ་ཤུའི་ཆོས་པ་དྲུག་ཀྱང་ཚོགས་ཁང་དུ་ཕེབས་ཡོད་པ་རྣམས་ལ་མགོན་པོ་གང་ཉིད་མཆོག་གིས་ཁོང་རྣམས་ལ་འཚམས་འདྲི་མཛད་པ་དང་སྦྲགས། ཡེ་ཤུ་དང་ནང་པ་གཉིས་དབར་ཕན་ཚུན་ལེགས་ཆ་བརྗེ་ལེན་བྱེད་རྒྱུ་ཡོད། དཔེར་ན། ནང་པ་ཚོས་ཡེ་ཤུའི་ཆོས་པ་ཚོའི་སར་ནས་སྦྱིན་པའི་ཉམས་ལེན་བྱེད་ཚུལ་དང་། དེ་བཞིན་ཡེ་ཤུའི་ཆོས་པ་ཁག་གཅིག་གིས་ནང་པའི་སྒོམ་ཉམ་ལེན་བྱེད་སྟངས་ལ་དོ་སྣང་སྤྲོད་ཀྱི་ཡོད་སྐོར་བཀའ་སློབ་སྩལ།
ཉིན་གུང་ལྗགས་སྨིན་སྐབས་གསར་འགོད་པ་ཁག་གཅིག་ལ་མཇལ་ཁ་དང་བཀའ་སློབ་སྩལ། སྐབས་དེར་༸གོང་ས་མཆོག་གིས་བཙན་བྱོལ་བོད་མིའི་མང་གཙོའི་འཕེལ་རིམ་ཐོག་ཡར་རྒྱས་གཏོང་གནང་མཛད་ཚུལ་དང་མགོན་པོ་གང་ཉིད་མཆོག་སྐུ་གཞོན་ནུའི་དུས་ནས་མང་གཙོའི་རིང་ལུགས་ལ་རྗེས་སུ་ཡི་རང་དང་བསྔགས་བརྗོད་མཛད་བཞིན་ཡོད། དེ་བཞིན་མགོན་པོ་གང་ཉིད་མཆོག་ཕྱི་ལོ་ ༡༩༥༤ ལོར་རྒྱ་ནག་དང་ཕྱི་ལོ་ ༡༩༥༦ ལོར་རྒྱ་གར་སོ་སོར་ཆིབས་སྒྱུར་སྐྱོང་སྐབས་ཡུལ་འདི་གཉིས་ཀྱི་སྲིད་གཞུང་ལམ་ལུགས་ཐོག་མི་འདྲ་བའི་ཁྱད་པར་ཆེན་པོ་གཟིགས་ཡོོད་པ་དང་། རྒྱ་ནག་རྒྱལ་ཡོངས་འཐུས་མིའི་ཚོགས་ཆེན་དང་རྒྱ་གར་གྱི་གྲོས་ཚོགས་གཉིས་དབར་མི་འདྲ་བའི་ཁྱད་པར་ཧ་ཅང་ཆེན་པོ་གཟིགས་ཡོད་སྐོར།  དཔེར་ན། རྒྱ་ནག་རྒྱལ་ཡོངས་འཐུས་མིའི་ཚོགས་ཆེན་ཚོགས་སྐབས་རྒྱ་ནག་དཔོན་རིགས་ཚོས་གང་བཤད་པར་ཁུ་སིམ་ངང་ཉན་བསྡད་པ་ལས་དེར་བགྲོ་གླེང་དང་བསམ་ཚུལ་མི་མཐུན་པར་རྣམས་བརྗེ་ལེན་གྱིས་འཁྲུག་ཆ་དོད་པོ་མེད་པ་དང། དེ་ལས་ལྡོག་སྟེ་རྒྱ་གར་གྱི་མང་གཙོའི་གྲོས་ཚོགས་ཀྱི་ལམ་ལུགས་ནང་གཞུང་གི་དབུ་ཁྲིད་ཚོར་སྐྱོན་བརྗོད་བྱེད་ཆོག་པ་ཙམ་མ་ཟད། རང་དབང་ཐོག་གྲོས་ཚོགས་ནང་རང་གི་སྨྲ་བརྗོད་རང་དབང་ཆ་ཚང་ལོངས་སུ་སྤྱོད་རྒྱུའི་ཐོབ་ཐང་ཡོད་པ་དེ་གཟིགས་སྐབས་མགོན་པོ་གང་ཉིད་མཆོག་ཧ་ཅང་ཐུགས་ཡིད་འཕྲོག་པོ་དང་ཐུགས་དགྱེས་ཚོར་ཆེན་པོ་བྱུང་ཡོད་སྐོར་བཀའ་སྩལ། གཞན་ཡང་སྐབས་དེར་༸གོང་ས་མཆོག་གིས་ཕྱི་ལོ་ ༢༠༠༡ ནས་ཕྱེད་བགྲེས་ཡོལ་མཛད་ཡོད་པ་དང་ད་ཆ་དུས་དེ་ནས་ལོ་ངོ་བཅུ་ཏག་ཏག་བསླེབས་པའི་འཚམས་འདིར་འགྲེས་ཡོལ་ཆ་ཚང་ཞུས་ཡོད་སྐོར་འདི་ལོའི་ཕྱི་ཟླ་ ༣ ཚེས་ ༡༠ ཉིན་བཀའ་སློབ་སྩལ་ཡོད་པར་བརྟེན། བཙན་བྱོལ་བོད་མིའི་ཆབ་སྲིད་ཀྱི་འཕོ་འགྱུར་དེ་༸གོང་ས་ལྔ་པ་ཆེན་པོ་མཆོག་གིས་ལོ་ངོ་ ༤༠༠ ཙམ་གྱི་གོང་ནས་སྲོལ་གཏོད་པའི་དགའ་ལྡན་ཕོ་བྲང་གི་གཞུང་དེ་ད་ཆ་རྒྱལ་ཁའི་ངང་ནས་༸གོང་ས་སྐུ་ཕྲེང་ ༡༤ ཆེན་པོ་མཆོག་སྐུ་ཉིད་ཀྱིས་ཐུགས་འདུན་ལྟར་མཇུག་སྒྲིལ་བ་ལས་དེར་གཞན་གྱིས་གནོན་ཤུགས་སོགས་གང་ཡང་མེད་པར་མང་གཙོའི་རིང་ལུགས་ཐོག་ཆབ་སྲིད་ཀྱི་སྐུ་དབང་མི་མང་གིས་འོས་འདེམས་བྱས་པའི་བཀའ་བློན་ཁྲི་པར་རྩིས་སྤྲོད་མཛད་པ་ཞིག་ཡིན་སྐོར་བཀའ་སློབ་སྩལ། ཕྱོགས་མཚུངས་༸གོང་ས་མཆོག་གིས་རྒྱུན་དུ་ཆོས་སྲིད་གཉིས་ཀྱི་དབུ་ཁྲིད་ཐ་དད་དགོས་པ་དང་རྒྱལ་ཁབ་གང་ཞིག་ཡིན་རུང་བླ་མ་དང་རྒྱལ་པོས་སྐྱོང་རྒྱུའི་དུས་ཚོད་ད་ཆ་ཡོལ་ཟིན་པར་ཡིད་ཆེས་ཐོགས་གཞན་ལ་དེ་ལྟར་བཀའ་སྩོལ་བཞིན་དུ་མགོན་པོ་གང་ཉིད་མཆོག་གིས་བོད་ཀྱི་ཆབ་སྲིད་ཀྱི་དབུ་ཁྲིད་འགན་དབང་བཞེས་ཚེ་ཁ་དན་ཚིག་ལ་མ་གནས་པ་ལྟ་བུ་ཆགས་རྒྱུ་ཡིན་སྟབས།  ད་ཆ་བོད་མིའི་ཆབ་སྲིད་ཀྱི་འགན་དབང་ཡོངས་རྫོགས་མི་མང་གིས་འོས་འདེམས་བྱས་པའི་བཀའ་བློན་ཁྲི་པར་རྩིས་སྤྲོད་མཛད་པར་བརྟེན། མགོན་པོ་གང་ཉིད་མཆོག་ཐུགས་ཡིད་བདེ་པོ་བྱུང་ཚུལ་བཀའ་སྩལ། དེ་བཞིན་སྐབས་དེར་གསར་འགོད་པ་གཅིག་གིས་༸གོང་ས་མཆོག་གི་ཡང་སྲིད་སྐོར་དྲི་བ་ཕུལ་བར་མགོན་པོ་གང་ཉིད་མཆོག་གིས་འབྱུང་འགྱུར་༸རྒྱལ་བ་རིན་པོ་ཆེའི་ཡང་སྲིད་ཡོང་མིན་ནི་གཙོ་བོ་བོད་མི་ཚོར་རག་ལུས་ཡོད་པ་དང། ཡང་སྲིད་སྐོར་དེ་སྔ་ཕྱི་ལོ་ ༡༩༦༩ ཙམ་ནས་གསལ་པོ་བཟོས་གནང་མཛད་ཡོད་སྐོར་བཀའ་སྩལ་བ་མ་ཟད། དེ་སྔ་ཡང་སྲིད་སྐོར་གྱི་ཚོགས་འདུའི་སྐབས་གསལ་བཤད་མཛད་ཡོད་པ་དང་འབྱུང་འགྱུར་ཕྱི་ཟླ་ ༩ ནང་ཡང་བསྐྱར་ཡང་སྲིད་སྐོར་གྱི་ཚོགས་འདུ་འཚོགས་འཆར་ཡོད་པ་བཞིན་སྐབས་དེར་དགོངས་འཆར་འདོན་གནང་མཛད་རྒྱུ་ཡིན་སྐོར་དང་༸གོང་ས་མཆོག་གིས་ཡང་སྲིད་སྐོར་གྱི་གནད་དོན་ཐག་གཅོད་མཛད་རྒྱུའི་ཐོབ་ཐང་དེ་མགོན་པོ་གང་ཉིད་མཆོག་ཁོ་ན་ལས་གཞན་སུ་ལའང་མེད་ཅེས་ཚིག་ཐག་ཆོད་པོས་བཀའ་ལན་ཕེབས་ཡོད།  གཞན་ཡང་བོད་ཀྱི་བླ་སྤྲུལ་ཡང་སྲིད་ཐོག་རྒྱ་ནག་གཞུང་གིས་ཐེ་བྱུས་བྱས་ཚུལ་དང་འབྲེལ་བའི་ཐོག་བཀའ་སྩལ་དོན། འདས་པའི་སྐབས་གཉིས་སུ་རྒྱ་ནག་གཞུང་གིས་ཏཱ་ལའི་བླ་མའི་སྐྱེ་སྤྲུལ་ཐོག་ཐེ་བྱུས་བྱས་ཡོད་ཀྱང་སྐབས་དེར་རྒྱ་ནག་གི་འབྲེལ་ཡོད་རྒྱལ་པོ་རྣམས་ནང་པ་ཡིན་པ་མ་ཟད། ༸གོང་ས་ཏཱ་ལའི་བླ་མ་དང་པཎ་ཆེན་རིན་པོ་མཆོག་ལ་དད་གུས་ཞུ་མཁན་གྱི་སློབ་མ་ཡིན་པར་བརྟེན་བླ་སློབ་ཀྱི་འབྲེལ་བ་ཡོད་པ་དང། ད་ཆ་རྒྱ་ནག་གཞུང་གི་དཔོན་རིགས་ཚོས་ཆོས་དུག་ཏུ་རྩི་བཞིན་ཡོད་པ་མ་ཟད། ཏཱ་ལའི་བླ་མ་བདུད་ལ་རྩི་བཞིན་ཡོད། དེར་བརྟེན་བདུད་ཀྱི་ཡང་སྲིད་རྩད་གཅོད་བྱེད་དགོས་པའི་དགོས་པ་རྒྱུ་མཚན་གང་ཡོད། ངོས་ཀྱི་བསམ་པར་གལ་ཏེ་རྒྱ་ནག་གཞུང་གིས་སྐྱེ་སྤྲུལ་ཡང་སྲིད་རྩད་གཅོད་བྱ་རྒྱུའི་ཐོག་དངོས་གནས་སེམས་འཚབ་ཡོད་ན་ཐོག་མར་ཡང་སྲིད་ལ་ཡིད་ཆེས་བསླེབས་ཏེ་ཐོག་མར་མའོ་ཙེ་ཏུང་དང་ཏེང་ཞའོ་ཕིང་གི་ཡང་སྲིད་རྩད་གཅོད་བྱེད་འགོ་འཛུགས་དགོས་ཞེས་སོགས་ཀྱི་བཀའ་སློབ་སྩལ།།