༢༠༡༡ ཟླ་ ༨ ཚེས་ ༣༠ རེས་གཟའ་མིག་དམར།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལྷོ་ཤར་ཨེ་ཤི་ཡའི་དད་ལྡན་པ་ཁག་གཅིག་ནས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་ཕྱི་ལོ་ ༢༠༡༡ ཟླ་ ༨ ཚེས་ ༣༠ ཉིན་མགོན་པོ་གང་ཉིད་མཆོག་གིས་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ལྷོ་ཤར་ཨེ་ཤི་ཡ་གཙོ་བོ་གྱུར་བའི་ཕྱི་ནང་གི་དད་ལྡན་མི་མང་རྣམས་ལ་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོ་འཇུག་ཆེན་མོའི་ཆོས་འབྲེལ་དབུ་འཛུགས་མཛད་ཡོད།
དེ་ཉིན་སྔ་དྲོ་ཆུ་ཚོད་ ༩།༣༠ ཐོག་ལྷོ་ཤར་ཨེ་ཤི་ཡའི་དད་ལྡན་རྣམ་པའི་འཐུས་མིས་སྤོས་སྣེས་སྔོན་བསུས་ཏེ་༸གོང་ས་མཆོག་ཕོ་བྲང་ནས་གདན་ཞུས་ཀྱིས་ཐེག་ཆེན་ཆོས་གླིང་གཙུག་ལག་ཁང་གི་བཞུགས་ཁྲིར་༸ཞབས་སོར་འཁོད་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་དེར་འདུས་ལྷོ་ཤར་ཨེ་ཤི་ཡའི་ཆོས་ཞུ་བ་གྲངས་ ༣༥༠ དང་། ཕྱི་རྒྱལ་ཡུལ་གྲུ་ ༥༤ ནས་བཅར་བའི་ཆོས་ཞུ་བ་གྲངས་ ༡༣༠༠ དེ་བཞིན་རང་རིགས་བཅས་ཁྱོན་མི་གྲངས་ ༥༠༠༠ བརྒལ་བ་རྣམས་ལ་ཐོག་མར་ནང་ཆོས་ངོ་སྤྲོད་མཛད་དོན།
དེ་རིང་ང་ཚོ་འདིར་འདུས་པའི་དགོས་པ་གཙོ་བོ་དེ་བདེ་སྐྱིད་དོན་དུ་གཉེར་བ་ཞིག་ཡིན་པ་ངོས་ཀྱིས་བསམ་བཞིན་ཡོད། དཔལ་འབྱོར་དང་དབང་ཤུགས་སོགས་ཕྱི་དངོས་པོའི་ཡུལ་གཟུགས་སྒྲ་དྲི་རོ་རེག་བྱ་སོགས་ལས་བྱུང་བའི་བདེ་བ་དེ་དག་གཙོ་བོ་དབང་ཤེས་ལ་རྟེན་པའི་ཚོར་བ་བདེ་བ་ཡིན། བདེ་བ་དེ་དག་ཕྲལ་སེལ་ཙམ་ཡིན། དཔེར་ན། ཡུལ་མཛེས་པོས་མིག་གི་དབང་ཤེས་ལ་བདེ་བ་སྦྱིན་པ་དང་། སྒྲ་སྙན་པོས་རྣ་བའི་དབང་ཤེས་ལ་བདེ་བ་སྦྱིན་པ་སོགས་ཡོང་བཞིན། དབང་ཤེས་ལ་རྟེན་པའི་ཚོར་བ་བདེ་བ་དེ་ཇི་ཙམ་ཤུགས་ཆེ་ནའང་མི་སེམས་ཁྲལ་ཧ་ཅང་ཆེན་པོ་ཡོད་མཁན་ཞིག་གི་སྡུག་བསྔལ་དེ་ཟིལ་གྱི་གནོན་མི་ཐུབ་པ་དེ་གསལ་པོ་རེད། དེ་ལས་ལྡོག་སྟེ་ཡིད་ཤེས་སམ་སེམས་ཀྱི་ཚོར་བ་ཞི་བདེ་བག་ཕེབས་ངང་གནས་པའི་མི་དེར་ལུས་ལ་སྡུག་བསྔལ་ཕྲན་བུ་བྱུང་ནའང་བཟོད་སྒོམ་བྱེད་ཐུབ་པ་མ་ཟད། མཚམས་རེ་ང་ཚོས་ཡིད་ཀྱི་ཤེས་པར་བདེ་སྐྱིད་བསྐྲུན་སླད་ཆེད་དུ་མངགས་ནས་ལུས་ཀྱི་སྡུག་བསྔལ་དང་དུ་ལེན་གྱི་ཡོད་པའི་གནས་ཚུལ་དེ་རིགས་ང་ཚོའི་ཉམས་མྱོང་ཐོག་ནས་ཀྱང་བརྗོད་ཐུབ། དེར་བརྟེན་ང་ཚོས་འདོད་རྒྱུའི་བདེ་བར་དབང་ཤེས་དང་ཡིད་ཤེས་ལ་རྟེན་པའི་བདེ་བ་སོ་སོར་ཡོད་པ་ལས་དབང་ཤེས་ལ་རྟེན་པའི་བདེ་བ་དེ་ལས་ཡིད་ཤེས་ལ་རྟེན་པའི་བདེ་བ་དེ་ནུས་པ་དང་གལ་ཆེ་བ་ཆགས་ཡོད་ཅེས་སོགས་ཀྱི་བཀའ་སློབ་སྩལ་ཡོད།
སྤྱིར་བཏང་ལྷོ་ཤར་ཨེ་ཤི་ཡའི་དད་ལྡན་ཆོས་ཞུ་བ་རྣམས་ཀྱི་ཆེད་ཕྱི་ལོ་ ༢༠༠༧ ལོ་ནས་ཆོས་འབྲེལ་འདི་དབུ་འཛུགས་བསྐྱངས་བ་མ་ཟད། ད་ཐེངས་ཆོས་འབྲེལ་ཐེངས་ ༥ པ་དེ་ཡིན་འདུག དེ་རིང་༸གོང་ས་མཆོག་གིས་སྔ་དྲོ་ཆོས་ཐུན་གཅིག་དང་ཕྱེད་ཡོལ་ཆོས་ཐུན་གཅིག་སྩལ་ཡོད་པ་བཅས། །
