༢༠༡༡ ཟླ་ ༨ ཚེས་ ༢༣ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༨ ཚེས་ ༢༢ ཉིན་༸གོང་ས་མཆོག་གིས་ཕིན་ལན་ཌིའི་ཁུལ་གྱི་མཛད་འཕྲིན་རྣམས་ལེགས་པར་གྲུབ་སྟེ་ཇར་མན་ཧེ་སེ་(Hesse State Government)མངའ་སྡེའི་གཞུང་ནས་ཇི་ལྟར་གསོལ་འདེབས་ཞུས་དོན་བཞིན་བཀའ་བཞེས་བཟང་པོ་ཐོབ་སྟེ་རྒྱལ་ས་ཝེ་སི་བྷ་ཌན་(Wiesbaden)དུ་༸ཞབས་སོར་བདེ་བར་འཁོད་ཡོད།  དེ་ཡང་ཕྱི་ཚེས་ ༩ ཉིན་ཧེ་སེ་མངའ་སྡེའི་གཞུང་གིས་གསར་འགོད་གསལ་བསྒྲགས་ཤིག་སྤེལ་བའི་ནང་མངའ་སྡེའི་སྤྱི་ཁྱབ་དྲུང་ཆེས་གསལ་བཤད་གནང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་ཧེ་སེ་མངའ་སྡེའི་སྲིད་འཛིན་སྐུ་ཞབས་བོལ་ཀར་བྷུ་ཕེར་(Volker Bouffier)མཆོག་དང་ཧེ་སེ་མངའ་སྡེའི་གྲོས་ཚོགས་ཀྱི་ཚོགས་གཙོ་སྐུ་ཞབས་ནོར་བྷ་ཌི་ཀ་ཊི་མན་(Norbert Kartmann)མཆོག་རྣམ་གཉིས་ནས་མགྲོན་འབོད་ཞུས་པ་བཞིན་འདི་གར་ཆིབས་སྒྱུར་བསྐྱང་གཏན་འཁེལ་ཡོད་ཅིང། ཕྱི་ཚེས་ ༢༢ ཉིན་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་འདི་ག་ཧེ་སེ་མངའ་སྡེས་གསོལ་སྟོན་འབུལ་ལམ་ཞུ་རྒྱུ་ཡིན། སྐབས་དེར་ཧེ་སེ་མངའ་སྡེའི་གྲོས་ཚོགས་ཀྱི་ཚོགས་གཙོ་མཆོག་དང་མངའ་སྡེའི་བཀའ་ཤག་གི་མཛད་གཙོ་རྣམ་པ་ཚོས་ཀྱང་མཉམ་ཞུགས་གནང་རྒྱུ་ཡིན་ཞེས་སོགས་འཁོད་ཡོད།
ཕྱོགས་མཚུངས་ཉིན་རྒྱབ་༸གོང་ས་མཆོག་ཕ་རན་ཕོཌ་(Frankfurt)དུ་རྟེན་གཞི་བྱས་པའི་གྷོ་ཐེ་གཙུག་ལག་སློབ་གྲྭར་(Goethe University) ཆིབས་སྒྱུར་བསྐྱང་སྟེ་དགེ་ལས་སློབ་ཕྲུག་རྣམས་ལ་འགྲོ་བ་མིའི་བཟང་སྤྱོད་ཀྱི་རིན་ཐང་དང་དབུ་ཁྲིད་ཀྱི་ཐབས་ལམ་ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་ཡིན་འདུག  གཙུག་ལག་སློབ་གྲྭ་དེ་ནི་ཕ་རན་ཕོཌ་ནང་གཙུག་ལག་སློབ་གྲྭ་རྙིང་ཤོས་དེ་ཡིན་འདུག ཕྱི་ཚེས་ ༢༣ ཉིན་ཧེ་སེ་མངའ་སྡེའི་གྲོས་ཚོགས་ཀྱི་ཚོགས་གཙོ་མཆོག་གིས་ཇི་ལྟར་གསོལ་འདེབས་ཞུ་དོན་ལྟར་༸གོང་ས་མཆོག་གིས་ཧེ་སེ་མངའ་སྡེའི་གྲོས་ཚོགས་ནང་ཆིབས་སྒྱུར་བསྐྱང་སྟེ་བཀའ་སློབ་སྩལ་གནང་མཛད་རྒྱུ་ཡིན་འདུག   དབྱར་དུས་ཀྱི་བར་མཚམས་གྲོལ་རྗེས་སླར་ཡང་གྲོས་ཚོགས་འཚོགས་རྒྱུའི་ཚོགས་དུས་ཉིན་དང་པོ་འགོ་མ་འཛུགས་གོང་གི་དུས་སྐབས་དང་བསྟུན་ནས་༸གོང་ས་མཆོག་གིས་བཀའ་སློབ་གོ་སྒྲིག་གནང་བ་ཞིག་ཡིན་འདུག ཕྱི་ཚེས་ ༢༤ ཉིན་གྱི་སྔ་དྲོ་༸གོང་ས་མཆོག་མིག་གི་དབང་པོ་སྐྱོན་ཅན་གྱི་སློབ་གྲྭ་ཇོ་ཧན་པི་ཊར་ཤི་ཕཌ་ཏུ་ (Johann-Peter Shepherd) ཆིབས་སྒྱུར་བསྐྱང་རྒྱུ་ཡིན་འདུག་པ་བཅས།།