༢༠༡༡ ཟླ་ ༨ ཚེས་ ༡༦ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༨ ཚེས་ ༡༤ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཕ་རན་སིའི་གྲོང་ཁྱེར་ཏོའོ་ལོ་སི་(Toulouse)ནང་ཆོས་འབྲེལ་ཉིན་གཉིས་པའི་ཉིན་གུང་ལྗགས་སྨིན་བར་སེང་སྐབས་ཕ་རན་སི་བརྙན་འཕྲིན་གྱི་ཆེད་དོན་དྲི་བར་བཀའ་ལན་མཛད་ཡོད། སྐབས་དེར་༸གོང་ས་མཆོག་གིས་བཀའ་ཁྲི་བློ་བཟང་སེང་གེ་མཆོག་གི་ཤེས་ཡོན་གྱི་ཐོག་ལྟ་ཚུལ་དང་། འབྱུང་འགྱུར་ལོ་ཉི་ཤུའི་ནང་བོད་མི་ཁྱད་ལས་པ་ཆིག་ཁྲི་ཐོན་ཐུབ་པའི་དམིགས་ཚད་བཟུང་བ་དེར་ཡི་རང་བསྔགས་བརྗོད་མཛད་ཡོད། དེ་ཡང་མགོན་པོ་གང་ཉིད་མཆོག་གིས་སྲིད་དབང་རྩིས་སྤྲོད་མཛད་པ་ནས་བཟུང་བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས་ཐད་ཁྱད་པར་ཕྱིན་ཡོད་མེད་ཐུགས་སྣང་ཇི་བྱུང་སྐོར་གྱི་དྲི་བ་ཞུས་པར་བཀའ་ལན་སྩལ་དོན། ད་ལྟ་དེའི་ཐོག་བརྗོད་རྒྱུ་སྔ་དྲགས་རེད་བཅས་བཀའ་ལན་སྩལ།
ཡང་གསར་འགོད་པ་གཅིག་ནས་༸གོང་ས་མཆོག་གིས་འབྱུང་འགྱུར་ཆབ་སྲིད་ཀྱི་གོམ་པ་གསར་པ་ཞིག་སྤོ་འཆར་ཡོད་མེད་ཀྱི་དྲི་བ་ཕུལ་བར་མགོན་པོ་གང་ཉིད་མཆོག་གིས་བཀའ་ལན་སྩལ་དོན། ངོས་ཀྱིས་ཤེས་ཀྱི་མེད། དེ་ནི་རྒྱ་ནག་གཞུང་གི་བྱེད་ཕྱོགས་ལ་རག་ལུས་ཡོད། བོད་ནང་དཀའ་ངལ་ཡོད་པ་འཛམ་གླིང་མི་ཚང་དམངས་ཤེས་ཀྱི་ཡོད། རྒྱ་ནག་གཞུང་གིས་དེ་ལྟར་ཁས་ལེན་མ་བྱས་པའི་ཁར་ཁོང་ཚོས་དངོས་ཡོད་གནས་ཚུལ་འགེབས་སྲུང་བྱེད་བཞིན་ཡོད། བོད་ཙམ་མིན་པར་རྒྱ་ནག་མི་དམངས་སྤྱི་འཐུན་རྒྱལ་ཁབ་འོག་ཡོད་པའི་གྲངས་ཉུང་མི་རིགས་ཚང་མའི་ནང་འདོད་བློ་མ་ཁེངས་པའི་གནས་ཚུལ་ཡོད་པ་དེ་གསལ་པོ་རེད། ཉེ་ལམ་ལྷ་སར་རྒྱ་ནག་གིས་བོད་ཞི་བའི་བཅིངས་འགྲོལ་བཏང་ནས་ལོ་ངོ་ ༦༠ འཁོར་བ་ཟེར་བའི་རྟེན་འབྲེལ་གྱི་མཛད་སྒོའི་ཐོག་རྒྱ་གཞུང་གི་དཔོན་རིགས་ཚོས་མཉམ་ཞུགས་བྱས་ཡོད། མཛད་སྒོའི་རིང་རྒྱ་ནག་གཞུང་གི་སྐོར་སྲུང་དམག་མི་དང་དྲག་ཆས་ཉེན་རྟོག་པ་རྣམས་ལྷ་སའི་ཁྲོམ་གཞུང་དང་སྲང་ལམ་གང་སར་བཀྲམ་ཡོད་པ་མ་ཟད། གསང་ཉུལ་བ་ས་ཁུལ་གང་སར་བཀྲམ་ཡོད། དེ་བཞིན་མཛད་སྒོ་དེའི་རིང་ཡུལ་སྐོར་སྤྲོ་འཆམ་པ་རྣམས་བོད་ནས་ཕྱིར་ལོག་དགོས་པའི་བཙན་བཀའ་བཏང་བ་དང། མཛད་སྒོ་དེར་རྒྱ་ནག་གཞུང་གིས་འདེམས་སྒྲུག་བྱས་པའི་བོད་མི་ཁག་གཅིག་མ་གཏོགས་བོད་མི་བྱིངས་རྣམས་སོ་སོའི་ཉལ་ཁང་ནས་ཕྱིར་ཐོན་མི་ཆོག་པའི་བཙན་བཀའ་བཏང་ཡོད།
ཉེ་ཆར་རྒྱ་ནག་ནང་རྒྱལ་ཡོངས་མི་མང་འཐུས་མི་ཚོགས་ཆེན་སྐབས་རྒྱལ་ཁབ་ཀྱི་བདེ་འཇགས་ལས་རྒྱལ་ནང་གི་སྲུང་ཆའི་འགྲོ་གྲོན་ཆེ་བ་གཏོང་དགོས་པ་ཆགས་པའི་གནས་ཚུལ་ར་སྤྲོད་བྱུང་ཡོད། མཉམ་འབྲེལ་རྒྱལ་ཚོགས་ཀྱི་གཏན་འཇགས་རྒྱལ་ཁབ་ལྔ་ཡོད་པ་རྣམས་ནས་གནས་ཚུལ་དེ་འདྲ་བྱུང་བ་རྒྱ་ནག་གཅིག་པུ་རེད།
ཕྱི་ལོ་ ༡༩༨༠ ལོར་ཧུའུ་ཡོ་པང་ལྷ་སར་གཞུང་འབྲེལ་ལྟ་སྐོར་བསྐྱོད་སྐབས་སུ་རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས་དེ་ནོར་འཁྲུལ་ཡིན་པ་ངོས་ལེན་གནང་ཐོག་རྒྱ་ནག་གཞུང་གིས་བོད་མི་ཚོར་མིང་དོན་མཚུངས་པའི་རང་སྐྱོང་སྤྲོད་དགོས་ཞེས་བརྗོད་ཡོད། དེར་བརྟེན་རེ་བ་ཏན་ཏན་ཡོད། ཉེ་ཆར་རྒྱ་ནག་གི་སྲིད་བློན་ཝུན་ཅ་པོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆབ་སྲིད་ལངས་ཕྱོགས་དེ་རིམ་བཞིན་བསྒྱུར་བཅོས་བཏང་སྟེ་ནུབ་ཕྱོགས་མང་གཙོའི་ལམ་ལུགས་ཕྱོགས་ལ་བསྐྱོད་དགོས་པའི་བསམ་ཚུལ་ཡང་བཏོན་ཡོད་ཅེས་སོགས་བཀའ་ལན་མཛད།
ཡང་གསར་འགོད་པ་གཅིག་གིས་༸གོང་ས་མཆོག་གི་ཆབ་སྲིད་ཀྱི་སྐུ་དབང་ཡོངས་རྫོགས་མི་མང་གིས་འོས་འདེམས་བྱས་པའི་འགོ་ཁྲིད་ལ་རྩིས་སྤྲོད་མཛད་རྗེས་རྒྱལ་སྤྱིའི་ནང་བོད་དོན་རྒྱབ་སྐྱོར་ཤུགས་ཆུང་དུ་འགྲོ་ཉེན་ཡོད་མེད་སྐོར་གྱ༝་དྲི་བ་ཕུལ་བར་མགོན་པོ་གང་ཉིད་མཆོག་གིས་བཀའ་ལན་སྩལ་དོན། ངོས་ཀྱིས་དེ་ལྟར་བསམ་གྱི་མེད། མི་མང་པོ་ཞིག་གིས་བོད་ཀྱི་ཐུན་མོང་མིན་པའི་ཆོས་དང་རིག་གཞུང་ཙམ་མ་ཟད། འཚེ་མེད་ཞི་བའི་ལྟ་གྲུབ་ལ་གཞི་བཅོལ་བའི་བོད་ཀྱི་བདེན་པའི་འཐབ་རྩོད་ལའང་གདུང་སེམས་མཉམ་སྐྱེ་དང་རྒྱབ་སྐྱོར་བྱེད་བཞིན་ཡོད་ཅེས་བཀའ་ལན་སྩལ།
ཡང་གསར་འགོད་པ་ཞིག་གིས་ཆབ་སྲིད་ཀྱི་སྐུ་དབང་རྩིས་སྤྲོད་མཛད་རྗེས་༸གོང་ས་མཆོག་ལ་ཐུགས་ཀྱི་ཚོར་སྣང་ཇི་བྱུང་སྐོར་གྱི་དྲི་བར་བཀའ་ལན་སྩལ་དོན། ངོས་རང་ལྷོད་ལྷོད་དང་སྐྱིད་པོ་འདུག ངོས་ཀྱིས་དུས་རྒྱུན་ཆོས་སྲིད་གཉིས་ཐ་དད་དགོས་པར་ཡིད་ཆེས་བྱེད་ཀྱི་ཡོད་པ་ལྟར་དེ་མཚུངས་དངོས་སུ་ལག་བསྟར་དོན་འཁྱོལ་བྱུང་བར་ངོས་རང་དགའ་པོ་བྱུང་ཞེས་སོགས་བཀའ་ལན་སྩལ་ཡོད་པ་མ་ཟད། མགོན་པོ་གང་ཉིད་མཆོག་གིས་གཞི་རྩའི་མཛད་འགན་གསུམ་ཡོད་པ་རྣམས་ཀྱི་སྐོར་བཀའ་སློབ་ཟབ་རྒྱས་སྩལ་ཡོད་པ་བཅས།།
༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ཁྲི་བློ་བཟང་སེང་གེ་མཆོག་གི་བོད་མིའི་ཁྱད་ལས་པའི་དམིགས་ཚད་ལ་བསྔགས་བརྗོད་མཛད་པ།
གསར་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)
འབྲེལ་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)