༢༠༡༡ ཟླ་ ༨ ཚེས་ ༡༦ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༨ ཚེས་ ༡༣ ཉིན་༸གོང་ས་༸སྐྱབས་མགོན་ཆེན་པོ་མཆོག་སུད་སི་གྲོང་ཁྱེར་ཇི་ནི་ཝ་ནས་ཕ་རན་སིའི་གནམ་ཐང་དུ་༸ཞབས་སོར་འཁོད་སྐབས་སྐུ་ཚབ་སྐལ་བཟང་རྒྱལ་མཚན་མཆོག་དང་ཆོས་ཚོགས་ཀྱི་གཙོ་འཛིན་བཅས་ཀྱིས་ཕེབས་བསུ་གཟབ་རྒྱས་ཞུས། གནམ་ཐང་དུ་ཕ་རན་སིའི་གསར་འགོད་པ་ཁག་གཅིག་ལ་བཀའ་སློབ་སྩོལ་སྐབས་མགོན་པོ་གང་ཉིད་མཆོག་སླར་ཡང་ལྷོ་ཕྱོགས་ཕ་རན་སིར་ཆིབས་སྒྱུར་བསྐྱངས་ཐུབ་པར་ཐུགས་དགྱེས་ཚོར་ཆེན་པོ་བྱུང་ཡོད་སྐོར་དང་སྦྲགས་ཕ་རན་སིའི་མི་མང་རྣམས་ལ་འཚམས་འདྲི་མཛད། གཞན་ཡང་སྐབས་དེར་༸གོང་ས་མཆོག་གིས་ཡུལ་དེར་ཆིབས་སྒྱུར་བསྐྱངས་དགོས་པའི་དམིགས་ཡུལ་གཙོ་བོ་ནི་འགྲོ་བ་མིའི་རིན་ཐང་དང་ཆོས་ལུགས་མཐུན་སྒྲིལ་གོང་འཕེལ་གཏོང་གནང་མཛད་རྒྱུའི་མཛད་ཁུར་གཙོ་བོ་དེ་དག་གི་ཆེད་དུ་ཡིན་སྐོར་བཀའ་སློབ་སྩལ་བ་དང། གཞན་ཡང་གསར་འགོད་པ་ཁག་གཅིག་གིས་ཐེངས་འདིའི་ཆིབས་སྒྱུར་དེ་བཞིན་དེ་སྔའི་ཆིབས་སྒྱུར་དང་མི་འདྲ་བའི་ཁྱད་པར་ཇི་ཡོད་ཀྱི་དྲི་བ་ཕུལ་བར་༸གོང་ས་མཆོག་གིས་ད་ཐེངས་ཆིབས་སྒྱུར་འདི་ནི་ཆབ་སྲིད་ཀྱི་སྐུ་དབང་མེད་པའི་ཐོག་ཡུལ་དེར་ཆིབས་སྒྱུར་བསྐྱངས་ཐེངས་དང་པོ་དེ་ཆགས་ཡོད་སྐོར་བཀའ་ལན་སྩལ་བ་མ་ཟད།
འདི་ལོ་ཕྱི་ཟླ་ ༨ ཚེས་ ༨ ཉིན་༸གོང་ས་མཆོག་གིས་ཆབ་སྲིད་ཀྱི་སྐུ་དབང་མང་ཚོགས་ཀྱིས་འོས་འདེམས་བྱས་པའི་བཀའ་ཁྲི་བློ་བཟང་སེང་གེར་རྩིས་སྤྲོད་མཛད་ཐུབ་པར་ཧ་ཅང་ཐུགས་ཡིད་ཚིམས་པོ་བྱུང་ཡོད་སྐོར་བཀའ་སྩལ། ཕྱོགས་མཚུངས་རྒྱ་ནག་ནང་དེང་སྐབས་མང་གཙོ་དང་ཕྱི་གསལ་ནང་གསལ་སོགས་དགོས་པའི་རེ་འདུན་འདོན་མཁན་ཤུགས་ཆེ་རུ་འགྲོ་བཞིན་ཡོད་པ་མ་ཟད། ཉེ་ལམ་རྒྱ་ནག་གི་སྲིད་བློན་ཝུན་ཅ་པ་འོས་རྒྱ་ནག་གཞུང་གི་ཆབ་སྲིད་ལ་བསྒྱུར་བཅོས་གཏོང་རྒྱུ་གལ་ཆེ་ཡིན་སྐོར་བརྗོད་ཡོད་པ་སོགས་ལུང་འདྲེན་ཡང་མཛད་ཡོད། དེ་རྗེས་གནམ་ཐང་ནས་བཞུགས་གནས་མགྲོན་ཁང་དུ་༸ཞབས་སོར་འཁོད་སྐབས་བོད་མི་མང་སྤྱི་འཐུས་སྐུ་ཞབས་ཐུབ་བསྟན་དབང་ཆེན་ལགས་དང་ས་གནས་བོད་རིགས་སོགས་ནས་ཕེབས་བསུ་གཟབ་རྒྱས་ཞུས་ཡོད་པ་བཅས།།
