༢༠༡༡ ཟླ་ ༨ ཚེས་ ༤ རེས་གཟའ་ཕུར་བུ།
༄༅། ཕྱི་ལོ་ ༢༠༡༡ ཟླ་ ༨ ཚེས་ ༣ ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་བོད་ཀྱི་དཔེ་མཛོད་ཁང་གི་ཚོགས་ཁང་གསར་པའི་ནང་དཔལ་ལྡན་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་དབུ་བཞུགས་ཐོག་དཔལ་ལྡན་དཔལ་འབྱོར་བཀའ་བློན་ཚེ་རིང་དོན་གྲུབ་མཆོག་དང་བོད་རིགས་གསར་འགོད་པ་དེ་བཞིན་དོན་གཉེར་ཅན་བཅུ་ཕྲག་གསུམ་བརྒལ་བ་ལྷན་འཛོམས་ཐོག་སྤོས་དཀར་གྱི་རྒྱུ་ལས་བཞེངས་པའི་བོད་མིའི་བློ་གྲོས་ཀྱི་ཉིང་བཅུད་ཕོ་བྲང་ཆེན་པོ་པོ་ཏ་ལའི་དྲན་རྟེན་སྣང་བརྙན་གསར་བཞེངས་ལེགས་གྲུབ་ཟིན་པ་བཀའ་ཁྲི་མཆོག་གིས་དབུ་འབྱེད་གནང་ཡོད།
དེ་ཡང་ཐོག་མར་ལས་གཞི་འདིའི་འགན་ཁུར་བྱེད་པོ་བློ་གྲོས་བཟང་པོ་ལགས་ཀྱིས་སྣང་བརྙན་འདི་འདྲ་ཞིག་བཞེངས་དགོས་པའི་རྒྱུ་མཚན་ངོ་སྤྲོད་གནང་དོན།
ལས་གཞི་འདི་ཐོག་མར་ཕྱི་ལོ་ ༢༠༠༥ ནས་འགོ་འཛུགས་བྱས་པ་དང་ལས་གཞི་འདི་གོ་སྒྲིག་བྱེད་སྐབས་རྣམ་གྲྭ་ཐུབ་བསྟན་ཡར་འཕེལ་ལགས་དང་བསྟན་འཛིན་ཉི་མ་ལགས་རྣམ་གཉིས། སྐུ་སྒེར་ཡིག་ཚང་གི་སྐུ་ཞབས་བློ་ཆོས་ལགས་སོགས་ནས་ལམ་སྟོན། དེ་བཞིན་སྲི་ཞུ་བའི་ལས་ཀྱི་སྣེ་མོ་བ་མང་དག་ཅིག་ལ་ལམ་སྟོན་དགོངས་སྐོར་ཞུས་ཐོག་འགོ་འཛུགས་ཞུས་པར་བརྟེན་ད་ཆ་གྲུབ་འབྲས་ཐོན་པ་འདི་ལྟར་བྱུང་ཡོད་སྐོར་དང་།
མ་འོངས་རང་རིགས་སོན་རྩ་རྣམས་ནས་རང་ཉིད་བོད་མི་ཞིག་ཡིན་པ་དང་བོད་ཀྱི་ཆོས་རིག་ཁག་ལ་སློབ་སྦྱོང་བྱེད་དགོས་པར་དྲན་སྐུལ་དང་། རང་ཉིད་ཀྱི་སྡོད་ཁང་དུ་དྲན་གསོའི་དད་རྟེན་སོགས་ཀྱི་དགོས་དམིགས་དུ་མར་དམིགས་པ་ཞིག་ཡིན་པའི་ངོ་སྤྲོད་གྲུབ་མཚམས་རྣམ་གྲྭ་སྐུ་ཞབས་ཐུབ་བསྟན་ཡར་འཕེལ་ལགས་ཀྱིས་རྗེས་སུ་པོ་ཏ་ལའི་སྣང་བརྙན་འདི་དང་ལྷན་དུ་པོ་ཏ་ལའི་ལོ་རྒྱུས་རྒྱས་འབྲིང་བསྡུས་གསུམ་ལྡན་པའི་དཔེ་དེབ་ཅིག་འདོན་སྤེལ་ཞུ་རྒྱུའི་ཆེད་ད་ལྟ་ཉམས་ཞིབ་དང་ཕྱོགས་སྒྲིག་གནང་བཞིན་ཡོད་པ་ངོ་སྤྲོད་གནང་ཡོད།
དེ་ནས་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་གི་སྣང་བརྙན་དབུ་འབྱེད་དང་པོ་ཏ་ལའི་སྣང་བརྙན་གྱི་ལས་གཞི་རྩོམ་མཁན་དང་ལོ་རྒྱུས་ཕྱོགས་སྒྲིག་གནང་མཁན་བཅས་ལ་ཐོག་མར་འཚམས་འདྲི་དང་སྦྲགས་གསུང་བཤད་གནང་དོན། པོ་ཏ་ལའི་སྣང་བརྙན་སྔོན་མ་གང་ཡོད་པ་ཇི་བཞིན་ད་རེས་བཞེངས་ཐུབ་པ་དེ་ཧ་ཅང་ཡག་པོ་བྱུང་འདུག་པས་རྗེས་སུ་ཡི་རང་ངང་ནས་ཐུགས་རྗེ་ཆེ་ཞུ་རྒྱུ་ཡིན། གྲུ་འཛིན་གཉིས་པའི་གཞལ་མེད་ཁང་ཕོ་བྲང་ཆེན་པོ་པོ་ཏ་ལ་ཞུ་བ་དེ་བོད་ཀྱི་རྒྱལ་ཁབ་དང་མི་རིགས་གཉིས་ཀར་གལ་གནད་ཆེ་བའི་ཕོ་བྲང་ཞིག་ཡིན། ཆོས་དང་ཆབ་སྲིད། སྤྱི་ཚོགས་གནས་བབ། ཁང་བཟོའི་སྒྱུ་རྩལ་སོགས་གང་གི་ཆ་ནས་བལྟས་ཀྱང་ངོ་མཚར་རྨད་དུ་བྱུང་བ་ཞིག་དང་བློ་ཡུལ་དུ་མི་ཤོང་བ་ཞིག་ཡིན། དེས་གང་མཚོན་གྱི་ཡོད་དམ་ཞེ་ན། བོད་མི་རིགས་ཀྱི་འབྱུང་རབས་ནང་མི་རབས་གོང་མ་དེ་དག་གི་ཤེས་རབ་དང་ལག་རྩལ། བརྩོན་འགྲུས། འབད་པ། གཏོང་ཕོད་སོགས་མཚོན་པའི་གཞལ་མེད་ཁག་ཞིག་ཡིན།
དེ་སྔ་བོད་རང་དབང་མ་ཤོར་བའི་སྐབས་སུ་ཕོ་བྲང་འདི་༸གོང་ས་༸སྐྱབས་མགོན་ཆེན་པོ་མཆོག་གི་དགུན་དུས་ཀྱི་བཞུགས་གནས་དང་། གཞུང་གི་ལས་ཁུངས་ཁག དེ་བཞིན་མཛད་སྒོ་གལ་ཆེ་ཁག་གནང་ས་ཆགས་ཡོད། ཆོས་ཕྱོགས་ནས་བསམ་བློ་བཏང་ན་བོད་འདི་ཆོས་ལྡན་ཞིང་ཁམས་ཆགས་རྗེས་རྟེན་གྱི་གཙོ་བོ་ཞིག་བཞུགས་ཡུལ་དང་། ༸རྒྱལ་མཆོག་སྐུ་ཕྲེང་ལྔ་པ་ནས་བཅུ་གསུམ་བར་གྱི་གདུང་རྟེན་གསེར་གདུང་ཆེན་མོ་བཞུགས་ཡུལ། ༸རྒྱལ་མཆོག་སྐུ་ཕྲེང་ན་རིམ་གྱི་ཐུགས་དམ་གྱི་ནང་རྟེན་སྐུ་གསུང་ཐུགས་རྟེན། དཀྱིལ་འཁོར་བློས་བླངས་སོགས་ཆོས་ཕྱོགས་ནས་བལྟས་ན་ཧ་ཅང་རྩ་ཆེའི་གནས་ཤིག་དང་བྱིན་རླབས་ཅན་གྱི་རྟེན་ཕུན་སུམ་ཚོགས་པ་མང་པོ་ཞིག་བཞུགས་པའི་ལྷ་ཁང་ཞིག་ཆགས་ཡོད། ཆབ་སྲིད་ནས་བལྟས་ན་ཆོས་རྒྱལ་རྣམ་པ་ཚོའི་དུས་ནས་རྣོ་ངར་ལྡན་པའི་རང་བཙན་གྱི་རྒྱལ་ཁབ་གཅིག་གི་རྒྱལ་ས་དང་རྒྱལ་པོའི་ཕོ་བྲང་། དམར་པོ་རིའི་ཕོ་བྲང་བཞེངས་པ་ནས་བཟུང་བོད་སིལ་བུར་མ་ཐོར་བར་དུ་ཆོས་རྒྱལ་རིམ་བྱོན་གྱི་བཞུགས་གནས་ལྟེ་བ་བཙན་རྫོང་ལྟ་བུ་ཆགས་ཡོད། རང་བྱུང་བཀོད་པའི་ཆ་ནས་སྐྱིད་ཤོད་ཀྱི་མཚོ་ཆེན་པོ་དེའི་ནང་ནས་ཐོག་མར་འབུར་དུ་ཐོན་པའི་རི་གསུམ་མ་གཏོགས་མེད། དེ་གསུམ་ནི་ཕོ་བྲང་པོ་ཏ་ལ་བཞུགས་སུ་གསོལ་བའི་དམར་པོ་རི་དང་ལྕགས་པོ་རི། བར་མ་རི་འདི་གསུམ་ཡིན། ཆོས་དད་པ་ཚོས་དེ་གསུམ་ལ་སྤྱན་རས་གཟིགས་དང་འཇམ་དཔལ་དབྱངས། ཕྱག་ན་རྡོ་རྗེ་བཅས་ཀྱི་གནས་རི་ཡིན་པར་ངོས་འཛིན་བྱེད་ཀྱི་ཡོད། དེ་ལྟ་བུའི་གྲུ་འཛིན་གྱི་ཕོ་བྲང་དེ་ནི་ང་ཚོའི་སྤྱི་ཚོགས་ཀྱི་འབྱུང་རབས་དང་དཔལ་ཡོན་མང་པོ་ཞིག་མཚོན་གྱི་ཡོད་པར་སོང་ད་རེས་སྣང་བརྙན་འདི་ལྟ་བུ་བཞེངས་པར་རྗེས་སུ་ཡི་རང་ཡོད།
ཅེས་སོགས་ཀྱི་གསུང་བཤད་གནང་གྲུབ་རྗེས་རྣམ་གྲྭ་སྐུ་ཞབས་ཐུབ་བསྟན་ཡར་འཕེལ་ལགས་ཀྱིས་ཐུགས་རྗེ་ཆེ་ཞུ་དང་སྦྲགས་དབུ་འབྱེད་མཛད་སྒོ་ལེགས་གྲུབ་བྱུང་ཡོད། ཐེངས་འདིར་དབུ་འབྱེད་མཛད་སྒོའི་ཐོག་པོ་ཏ་ལའི་སྣང་བརྙན་གསུམ་ཡོད་པ་རྣམས་ནས་གཅིག་༸རྒྱལ་བའི་གཟིམ་ཆུང་ལ་པར་ཕུད་དུ་འབུལ་ལམ་ཞུ་རྒྱུ་དང་། གཅིག་རང་གཞུང་བཀའ་ཤག་ལ་འབུལ་ལམ་ཞུ་རྒྱུ། གཅིག་སྐུ་བཅར་རྣམ་རྒྱལ་གྲྭ་ཚང་ལ་འབུལ་རྒྱུ་ཡིན་འདུག རྗེས་སུ་ཕྱི་ནང་མི་རིགས་ཚོའི་ཆེད་ཚོང་ཁེ་མི་ལེན་པར་མ་གནས་ཐོག་ཚོང་འགྲེམས་གནང་འཆར་ཡོད་འདུག་པ་བཅས།།
