༢༠༡༡ ཟླ་ ༨ ཚེས་ ༡༠ རེས་གཟའ་ལྷག་པ།
༄༅། །བསོད་ནམས་རྡོ་རྗེ་ལགས་རྡ་ས་ས་གནས་འགོ་འཛིན་དུ་འོས་ཐོབ་བྱུང་བ་ལྟར་དབུས་འོས་བསྡུ་ལས་ཁང་ནས་འཚམས་འདྲི་གནང་བ་དང་ཆབས་ཅིག་ས་གནས་འགོ་འཛིན་དུ་བསྐོ་གཞག་གནང་འདུག
དེ་ཡང་རྡ་ས་ས་གནས་འོས་བསྡུ་ལས་ཁང་ནས་ཕྱི་ལོ་ ༢༠༡༠ ཟླ་ ༨ ཚེས་ ༢ ཉིན་དབུས་འོས་བསྡུ་ལས་ཁང་ལ་ས་གནས་འགོ་འཛིན་གྱི་འོས་བསྡུའི་གྲུབ་འབྲས་ཕུལ་འབྱོར་བྱུང་བའི་ནང། བསོད་ནམས་རྡོ་རྗེ་ལགས་རྡ་ས་ས་གནས་མང་ཚོགས་ཀྱིས་བཅའ་སྒྲིག་དགོངས་དོན་ལྟར་ས་གནས་འགོ་འཛིན་དུ་འོས་འདེམས་བྱུང་ལ་གསལ་དོན་ལྟར། དབུ་འོས་བསྡུ་ལས་ཁང་ནས་འཚམས་འདྲི་གནང་བ་སྦྲགས་འོས་བསྡུའི་སྒྲིག་དོན་ ༨༠།༡ དགོངས་དོན། ཕྱི་ལོ་ ༢༠༡༡ ཟླ་ ༨ ཚེས་ ༢༢ ནས་ལོ་གསུམ་རིང་རྡ་སའི་མང་ཚོགས་ནས་མང་མོས་འོས་འདེམས་ཟིན་དོན་བཞིན་རྡ་ས་ས་གནས་འགོ་འཛིན་དུ་བསྐོ་གཞག་གནང་འདུག འབྱུང་འགྱུར་སྒྲིག་གསལ་ས་གནས་འགོ་འཛིན་གྱི་ལས་ཡུན་མ་རྫོགས་གོང་སྒྲིག་གཞི་ནང་གསལ་ཉིན་གྲངས་ ༣༠ ནང་ཚུན་བསྐྱར་དུ་འོས་བསྡུའི་ལས་རིམ་འགོ་འཛུགས་བྱེད་འཐུས་དབུས་འོས་བསྡུ་ལས་ཁང་ནས་ཆོག་མཆན་བཀའ་འཁྲོལ་ཞུས་ཟིན་པ་དགོས་རྒྱུ་དམ་འཛིན་གནང་དགོས་དང་། འཛིན་སྐྱོང་ལས་དོན་དང་འབྲེལ་བའི་ཐོག་འབྲེལ་ཡོད་གོང་རིམ་ནས་བཀོད་ཁྱབ་ལམ་སྟོན་ཕེབས་རྒྱུར་ས་གནས་མང་ཚོགས་ཀྱི་རེ་འདུན་སྙིང་བཅངས་ཀྱི་སྤྱི་དོན་ལྷག་བློ་ཆེ་བསྐྱེད་ཞུ་དགོས་བསྐུལ་མ་གནང་ཡོད་པ་བཅས། །
རྡ་ས་ས་གནས་འགོ་འཛིན་བསྐོ་གཞག་གནང་བ།
གསར་གནས།
འབྲེལ་གནས།
