༢༠༡༡ ཟླ་ ༨ ཚེས་ ༢༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༨ ཚེས་ ༢༠ ཉིན་བཞུགས་སྒར་རྡ་སའི་ཉེ་འགྲམ་དཔལ་ལྡན་རྒྱུད་སྟོད་གྲྭ་ཚང་དུ་རྒྱལ་བ་ཀརྨ་པ་རིན་པོ་ཆེ་མཆོག་དབུ་བཞུགས་ཐོག་ར་མོ་ཆེ་རྒྱུད་སྟོད་གཉིས་པའི་དགེ་འདུན་འདུས་མང་ཡོངས་ཀྱིས་བོད་མདོ་ཁམས་རྟའུ་ཉ་མཚོ་དགོན་པའི་དགེ་འདུན་ཚེ་དབང་ནོར་བུ་ལགས་ཀྱིས་བོད་ཀྱི་བདེན་དོན་དང་རང་དབང་གི་ཆེད་སྐུ་སྲོག་ལ་ཞུགས་མེར་སྒྲོན་ཏེ་འདས་གྲོངས་སུ་གྱུར་བར་མཆོད་འབུལ་སྨོན་ལམ་རྒྱ་ཆེ་ཞིག་ཚོགས་པ།
སྤྱིར་བོད་རྒྱལ་ཁབ་དང་མི་རིགས་ཀྱི་དོན་དུ་སྐུ་སྲོག་ཤོར་བའི་རྒྱལ་གཅེས་དཔའ་བོ་དཔའ་མོ་རྣམས་དང་། ཡང་སྒོས་ཉེ་ཆར་བོད་མདོ་ཁམས་རྟའུ་དགོན་པའི་དགེ་འདུན་ཚེ་དབང་ནོར་བུ་ལགས་ཀྱིས་བོད་མི་རིགས་ཀྱི་བདེན་དོན་ཆེད་རང་ལུས་མེར་བསྲེགས་བཏང་སྟེ་འདས་གྲོངས་སུ་གྱུར་བར་བརྟེན། གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་དཔལ་རྒྱལ་བ་ཀརྨ་པ་རིན་པོ་ཆེ་མཆོག་དབུ་བཞུགས་ཐོག་རྒྱུད་སྟོད་གྲྭ་ཚང་གི་མཁན་བླ་གཉིས་ཀྱིས་དབུས་དགེ་འདུན་འདུས་མང་གྲངས་ ༣༠༠ བརྒལ་བ་ལྷན་ཚོགས་ཐོག་དམ་པ་ཁོང་གིས་ཚེ་རབས་འཁོར་བར་བྱས་བསགས་སྡིག་སྒྲིབ་བག་ཆགས་དང་བཅས་པ་ཐམས་ཅད་བྱང་ཞིང་དག་ནས་དད་ལྡན་རིམ་བརྒྱུད་ས་ལམ་གྱི་སྒྲུབ་པ་ཟུང་འཇུག་རྡོ་རྗེ་འཆང་གི་གོ་འཕང་རིམ་བརྒྱུད་ཐོབ་ཆེད། རྟེན་གཙོ་ཇོ་བོ་མི་བསྐྱོད་རྡོ་རྗེའི་དྲུང་དུ་སྙན་ཤལ་ནང་མཛོད་དང་། ཞིང་མཆོག་འདུས་པ་རྒྱ་མཚོར་བསྙེན་བཀུར་གསོལ་ཇ། དགེ་འདུན་རེར་སྐུ་འགྱེད་སྒོར་ཉི་ཤུ་རེར་ཕུལ་ཏེ་མཆོད་འབུལ་སྨོན་ལམ་རྒྱ་ཆེ་ཞིག་ཚོགས་ཡོད་པ་བཅས། །