༢༠༡༡ ཟླ་ ༧ ཚེས་ ༡༦ རེས་གཟའ་སྤེན་པ།

༄༅། །ཨ་རིའི་སྲིད་འཛིན་གྱི་ཕོ་བྲང་དཀར་པོའི་མགྲིན་ཚབ་པས་གསར་འགོད་གསལ་བསྒྲགས་གནང་བའི་ནང་གསལ་ལྟར་ན་ཕྱི་ལོ་ ༢༠༡༡ ཟླ་ ༧ ཚེས་ ༡༦ རེས་གཟའ་སྤེན་པའི་ཉིན་ཨ་རིའི་སྲིད་འཛིན་སྐུ་ཞབས་བྷ་རཀ་ཨོ་བྷ་མ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་སྲིད་འཛིན་གྱི་ཕོ་བྲང་དཀར་པོའི་ནང་གདན་ཞུ་ཐོག་མཇལ་འཕྲད་ཞུ་གཏན་འཁེལ་ཡོད་འདུག  སྲིད་འཛིན་ཨོ་བྷ་མ་མཆོག་གིས་སྔ་ལོའི་ཕྱི་ཟླ་ ༢ ནང་༸གོང་ས་༸སྐྱབས་མགོན་ཆེན་པོ་མཆོག་ཕོ་བྲང་དཀར་པོའི་ནང་མཇལ་འཕྲད་ཞུས་ཡོད།     ཕྱི་ཚེས་ ༡༤ ཉིན་རྒྱབ་དུས་འཁོར་དབང་ཆེན་གྱི་ཆོས་ཐུན་གཅིག་ལ་ཨ་རིའི་བོད་དོན་དམིགས་བསལ་འབྲེལ་མཐུད་མ་ལྕམ་སྐུ་མ་རི་ཨོ་ཏེ་རོ་མཆོག་(Maria Otero) ཀྱང་ཆེད་བཅར་ཞུས་ཡོད་པ་བཅས།།