༢༠༡༡ ཟླ་ ༧ ཚེས་ ༢༢ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༢༡ ཉིན་བོད་ཤར་ཕྱོགས་མདོ་སྨད་ཀིརྟི་དགོན་པའི་དགེ་འདུན་པ་ ༣༠༠ ལྷག་རྒྱ་གཞུང་གི་མི་སྣས་འཛིན་བཟུང་བཙན་ཁྲིད་ཀྱིས་དུས་ད་ལྟ་ཡང་གར་སོང་ཆ་མེད་ཀྱི་གནས་སྟངས་སུ་གྱུར་ཡོད་སྟབས། ཕྱི་ལོ་ ༢༠༡༡ ཟླ་ ༧ ཚེས་ ༢༠ ཉིན་སུད་བོད་མཛའ་འབྲེལ་ཚོགས་པ་སོགས་ནས་སུད་སི་མི་མང་ཚོར་མདོ་སྨད་རྔ་པ་ཀིརྟི་དགོན་པ་ནས་རྒྱ་ནག་གཞུང་གིས་བཙན་ཁྲིད་བྱས་ཏེ་གར་སོང་ཆ་མེད་དུ་གྱུར་བའི་དགེ་འདུན་པ་རྣམས་ཀྱི་ཆེད་དྲིལ་བསྒྲགས་ཀྱི་ལས་འགུལ་ཞིག་སྤེལ་འདུག ལས་འགུལ་དེ་བརྒྱུད་སུད་སི་གཞུང་ཕྱོགས་ནས་རྒྱ་ནག་གཞུང་ལ་གནད་དོན་དེའི་ཐོག་གླེང་སློང་བྱེད་དགོས་པའི་འབོད་སྐུལ་ཞུས་འདུག དེ་བཞིན་ཁོང་རྣམས་ཀྱིས་གར་སོང་ཆ་མེད་དུ་གྱུར་བའི་དགེ་འདུན་པ་རྣམས་ཀྱི་ཆེད་སུད་སིའི་གྲོང་ཁྱེར་ཆེ་ཁག་ནང་ལས་འགུལ་སྤེལ་ཡོད་པ་མ་ཟད། དེ་བཞིན་ཁོང་རྣམས་ཀྱིས་དྲ་རྒྱ་བརྒྱུད་ས་རྟགས་བསྡུ་རུབ་ཀྱི་ལས་འགུལ་ཡང་སྤེལ་འདུག་པ་བཅས། །