༢༠༡༡ ཟླ་ ༧ ཚེས་ ༡༡ རེས་གཟའ་ཟླ་བ།
༄༅། །འདི་གར་སེར་བྱེས་ཏྲེ་ཧོར་དཀར་མཛེས་བ་པདྨ་ཚེ་དབང་ལགས་ཀྱིས་ཕྱི་ལོ་ ༢༠༡༡ ཕྱི་ཟླ་ ༧ པའི་ཚེས་ ༩ ཉིན་བཏང་གནས་ནང་འཁོད་དོན། རྒྱ་གཞུང་གིས་ཁམས་དཀར་མཛེས་རྫོང་ཁུངས་སུ་ཡུལ་དགོན་གཉིས་ལ་དམ་བསྒྲགས་ཤུགས་ཆེན་བྱེད་བཞིན་ཡོད་པ་མ་ཟད། བོད་མི་རྣམས་གང་བྱུང་འཛིན་བཟུང་བཙོན་ཁྲིད་བྱས་འདུག དེ་ཡང་འདི་ལོ་ཕྱི་ཟླ་ ༧ པའི་ཚེས་ ༥ ཉིན་མདོ་ཁམས་ཏྲེ་ཧོར་བཀྲ་ཤིས་དར་རྒྱས་དགོན་གྱི་དགེ་འདུན་པ་བློ་བཟང་ཆོས་འབྱོར་དང་། བྱམས་པ་དབང་ཕྱུག་གཉིས་དཀར་མཛེས་རྫོང་གི་ཉེན་རྟོག་ལས་ཁུངས་སུ་ཁྲིད་ནས་བཙན་འཇུག་བྱས་པ་མ་ཟད།
ད་ལྟའི་ཆར་གང་དུ་ཡོད་ཤེས་རྟོགས་བྱུང་མི་འདུག་ལ་ཁོང་གཉིས་ལ་ནག་ཉེས་ཅི་ཡོད་གསལ་ཁ་གང་ཡང་མི་འདུག་ཀྱང་གོང་ཚེས་ཉིན་ཞི་གསེར་ཤང་ཏུ་དཀར་མཛེས་རྫོང་གི་ཉེན་རྟོག་པ་དང་། ལས་བྱེད་མང་པོ་ཞིག་ཡོང་སྟེ། བཀྲ་ཤིས་དར་རྒྱས་དགོན་དུ་ཡོད་པའི་རྒྱ་གར་ནས་ཕྱིར་ཕེབས་པའི་དགེ་འདུན་པ་རྣམས་བསྡུ་རུབ་བྱས་རྗེས་ཁོང་གཉིས་མ་གཏོགས་དགེ་འདུན་པ་གཞན་རྣམས་རེ་རེ་བཞིན་ཕྱི་ལ་བཏང་ཡོད་འདུག རང་ལོ་ ༣༥ཡིན་པ་བློ་བཟང་ཆོས་འབྱོར་ནི། སྐྱེས་ཡུལ་དཀར་མཛེས་རྫོང་། ཞི་གསེར་ཤང་། རུ་མདའ་གྲོང་ཚོར་ཕ་བློ་བཟང་ཆོས་དར་དང་།
མ་རྡོ་རྗེ་མཁའ་འགྲོ་གཉིས་སུ་ཕྱི་ལོ་ ༡༩༧༦ ལོར་སྐྱེས། བྱམས་པ་དབང་ཕྱུག་ནི། སྐྱེས་ཡུལ་དཀར་མཛེས་རྫོང་། ཞི་གསེར་ཤང་། ཟིན་བེན་གྲོང་ཚོར་ཕ་བསོད་རྒྱལ་དང་། མ་ཚེ་རིང་དབྱངས་མཚོ་གཉིས་སུ་ཕྱི་ལོ་ ༡༩༦༣ ལོར་སྐྱེས་ཤིང་། ད་ལྟ་རང་ལོ་ ༤༨ ཡིན་འདུག ཁོང་གཉིས་ཕྱི་ལོ་ ༡༩༩༠ ཡས་མས་ལ་རྒྱ་གར་ལ་བཙན་བྱོལ་དུ་བསྐྱོད་ནས་རྒྱ་གར་ལྷོ་ཕྱོགས་སེར་བྱེས་གྲྭ་ཚང་དུ་ལོ་ ༨/༩ ཙམ་སློབ་སྦྱོང་བྱས་ནས་ཕ་ཡུལ་དུ་ཕྱིརལོག་ཕེབས་པ་ཞིག་ཡིན་འདུག་པ་བཅས།།
