༢༠༡༡ ཟླ་ ༧ ཚེས་ ༡༦ རེས་གཟའ་སྤེན་པ།
༄༅། །ཕྱི་ལོ་ ༢༠༡༡ ཟླ་ ༧ ཚེས་ ༡༦ ཉིན་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས་གོ་སྒྲིག་ཐོག་ཟློས་གར་ཚོགས་པའི་མཆོད་ཁང་དུ་ཟློས་དགེའི་འོས་སྦྱོང་བསླབ་པ་མཐར་སོན་པའི་མཇུག་བསྡོམས་མཛད་སྒོ་ཚོགས་ཡོད།
དེ་ཉིན་སྔ་དྲོ་ཆུ་ཚོད་ ༡༠།༣༠ ཐོག་སྐུ་མགྲོན་གཙོ་བོ་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས་དང་། ཤེས་ཡོན་འགན་འཛིན་ཚེ་རིང་བསམ་གྲུབ་ལགས། དྲུང་ལས་སྐལ་བཟང་རིན་ཆེན་ལགས། ཟློས་གར་དྲུང་ཆེ་བསྟན་འཛིན་ལྷག་བསམ་ལགས། ཟློས་དགེ་བསམ་གཏན་དོན་གྲུབ་ལགས། རོལ་དབྱངས་དགེ་རྒན་ཚེ་རིང་དཔལ་སྒྲོན་ལགས། བསླབ་པ་མཐར་སོན་གྱི་སློབ་ཕྲུག་མི་གྲངས་ ༢༠ བཅས་ལྷན་འཛོམས་ཐོག་ཤེས་ཡོན་འགན་འཛིན་ཚེ་རིང་བསམ་གྲུབ་ལགས་ཀྱིས་ཟློས་དགེ་འོས་སྦྱོང་གི་ལས་བསྡོམས་སྒྲོགས་སྦྱང་གནང་མཚམས་ཟློས་དགེ་བསམ་གཏན་དོན་གྲུབ་ལགས་ཀྱིས་འོས་སྦྱོང་སློབ་ཁྲིད་དང་འབྲེལ་བའི་གསུང་བཤད་གནང་། དེ་ནས་སྐུ་མགྲོན་གཙོ་བོས་སློབ་ཁྲིད་གནང་མཁན་ཟློས་དགེ་རྣམ་པར་ཐུགས་རྗེ་ལེགས་འབུལ་དང་བསླབ་པ་མཐར་སོན་པ་རྣམས་ལ་ཕྱག་འཁྱེར་གནང་གྲུབ་བསྟུན་གསུང་བཤད་གནང་བའི་སྙིང་དོན། དེ་རིང་བོད་ཀྱི་ཟློས་དགེའི་འོས་སྦྱོང་ལེགས་གྲུབ་ཀྱི་མཛད་སྒོའི་ཐོག་ཕེབས་པའི་ཟློས་གར་དྲུང་ཆེས་དབུས་དགེ་རྒན་རྣམ་པ། འོས་སྦྱོང་བ་རྣམ་པ། ཤེས་རིག་ལས་ཁུངས་ཀྱི་ལས་རོགས་རྣམ་པ་ཚང་མར་ཤེས་རིག་ལས་ཁུངས་དང་ང་རང་སྒེར་ངོས་ནས་འཚམས་འདྲིའི་བཀྲ་ཤིས་བདེ་ལེགས་ཞུ་གི་ཡོད། ཁྱེད་རྣམས་པའི་ལོ་གཅིག་ལྷག་རིང་ལས་བསྡོམས་ནང་ཐོན་པ་ལྟར། འབྲེལ་ཡོད་ཤེས་ཡོན་འགན་འཛིན་བརྒྱུད་ཤེས་རྟོགས་འཐུས་ཚང་ཡག་པོ་བྱུང་བར་ཧ་ཅང་དགའ་པོ་བྱུང་། ལྷག་པར་འོས་སྦྱོང་ལོ་གཅིག་རིང་སློབ་གཉེར་རྒྱུན་མི་ཆད་པར་གནང་བར་དམིགས་བསལ་བསྔགས་བརྗོད་ཀྱི་ཐུགས་རྗེ་ཆེ་ཞུ་རྒྱུ་དང་། ཟློས་གར་ཚོགས་པའི་ངོས་ནས་འོས་སྦྱོང་རབ་དང་རིམ་པར་མཉམ་རུབ་གནང་དང་གནས་མུས་རེད། དེ་བཞིན་ཟློས་གར་ཚོགས་པ་འདི་ཡང་བོད་ཀྱི་རིག་གནས་རྐང་འཛིན་གྱི་བསྟི་གནས་གལ་ཆེན་ཞིག་ཆགས་ཡོད། ཟློས་གར་ནི་བོད་ཀྱི་ཐུན་མིན་རིག་གནས་ཤིག་ཡིན་པ་དང་ང་ཚོས་བཙན་བྱོལ་དུ་སླེབས་རྗེས་ཆབ་དཔལ་རིག་གསུམ་དང་། འཚེ་མེད་ཞི་བའི་ལྟ་གྲུབ་སོགས་ལ་ཟློས་གར་རིག་གནས་ཀྱིས་ཞབས་འདེགས་ཡག་པོ་སྒྲུབ་ཡོད་པ་རེད་སྙམ་གྱི་ཡོད། དེང་རབས་ཀྱི་གསར་གཏོད་དང་ཡར་རྒྱས་གང་འདྲ་ཞིག་བྱས་ཀྱང་། ཐུན་མིན་རིག་གཞུང་རྒྱུན་འཛིན་བྱེད་དགོས་རྒྱུ་དེ་ཁྱེད་རྣམ་སློབ་དགེ་གནང་མཁན་ཡིན་སྟབས་ཐུགས་འགན་ཆེན་པོ་ཞིག་ཡོད། ཟློས་གར་གྱི་ཆེད་ལས་དང་རིགས་གཅིག་རྐང་འཛིན་ཐུབ་རྒྱུར་སྦྱོང་བརྡར་དང་འབད་བརྩོན་མུ་མཐུད་གནང་ཐོག་སྔར་ལྷག་གོང་འཕེལ་གཏོང་རྒྱུ་དེ་གལ་ཆེན་ཡིན། བོད་ཀྱི་གཉའ་འཕྲང་ཅན་གྱི་དུས་སྐབས་འདིར་ང་ཚོ་མི་རེ་ངོ་རེའི་ཤེས་འཇོན་ཙམ་མིན་པར་སྤྱི་སེམས་དང་ལྷག་བསམ་རྣམ་དག་གིས་ཕྱག་ལས་གནང་རྒྱུ་དེ་ཧ་ཅང་གལ་ཆེན་པོ་རེད། ཅེས་སོགས་ཀྱི་གསུང་བཤད་གནང་རྗེས་དྲུང་ལས་སྐལ་བཟང་རིན་ཆེན་ལགས་ཀྱིས་ཐུགས་རྗེ་ཆེ་ཞུས་ཏེ་མཛད་སྒོ་མཇུག་བསྡོམས་གནང་ཡོད་པ་བཅས། །