༢༠༡༡ ཟླ་ ༧ ཚེས་ ༡༩ རེས་གཟའ་མིག་དམར།
༄༅། །འདི་གར་ཤ་ཝ་ར་གསུམ་གྱི་ཁྱབ་ཁོངས་ཁ་འཐོར་གཞིས་ཆགས་ཁག་གཅིག་གི་ས་གནས་འགོ་འཛིན་ལས་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༧ ཚེས་ ༦ ཉིན་ཤར་ཁུམ་བདེ་གླིང་གཞིས་ལས་བདུན་དུ་དར་ཆེན་དང་རི་རྩེ་སོགས་ལ་༸གོང་ས་མཆོག་གི་སྐུ་ཁམས་དང་མཐུན་པའི་རླུང་དར་བརྒྱ་དང་བརྒྱད་སྒྲེང་འཛུགས་ཞུས་རྗེས་ཆུ་ཚོད་ ༧ ཐོག་གཞིས་དགོན་ཐུབ་བསྟན་བཤད་སྒྲུབ་གླིང་མཁན་པོས་དབུས་དགེ་འདུན་རྣམས་དང་སློབ་ཕྲུག་མི་མང་བཅས་ཀྱིས་ལྷ་སྲུང་ལ་འཕྲིན་བཅོལ་གྲུབ་བསྟུན་གཞིས་ལས་ཁང་ནས་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་མཁན་བླ་དགེ་འདུན་རྣམས་དང་། ས་གནས་འགོ་འཛིན་དང་ལས་བྱེད་དགེ་ལས་སློབ་ཕྲུག མང་ཚོགས་རྣམས་ཀྱིས་གསེར་སྦྲེངས་སྤོས་སྣེ་ཐོག་ཏེ་དགོན་པར་གདན་ཞུས་ཀྱིས་བཞུགས་ཁྲིར་མངའ་གསོལ་རྗེས་བལ་བོད་གཉིས་ཀྱི་རྒྱལ་གླུ་དང། དྲུག་ཅུའི་དབྱངས་སྙན་ཕུལ་ཏེ་ས་གནས་འགོ་འཛིན་དང་མཁན་པོ་དགེ་ཆེ་རང་བདེན་ཚོགས་གཙོ་བཅས་ཀྱིས་མཎྜལ་རྟེན་གསུམ་འདེགས་འབུལ་རྗེས་གསོལ་ཇ་འབྲས་སིལ་ཕུལ། ས་གནས་འགོ་འཛིན་གྱིས་དུས་ཆེན་དང་འབྲེལ་བའི་ལམ་སྟོན་གསུང་བཤད་གནང་རྗེས་༸རྒྱལ་བའི་སྐུ་ཚེ་ཞབས་པད་བརྟན་པའི་གསོལ་འདེབས་སྨོན་ལམ་འདོན་བཞིན་སྐུ་དཔར་ལ་མཇལ་དར་ཕུལ། ཉིན་རྒྱབ་གཞིས་ཆགས་ཚོགས་ཁང་དུ་ཇོ་མོ་གླང་མའི་སློབ་ཕྲུག་རྣམས་ནས་བོད་བལ་ཞབས་གཞས་དང་། དེ་བཞིན་ལས་བྱེད་དང་ན་གཞོན་མི་མང་ནས་གཞས་སྣ་འཁྲབ་སྟོན་ཞུས། ཐུབ་བསྟན་བཤད་སྒྲུབ་གླིང་དགོན་པ་ནས་སྐུ་མགྲོན་རྣམ་པ་དང་མི་མང་གྲངས་ ༦༥༠ བརྒལ་བར་གསོལ་ཇ་ཞལ་ཏོག་ཕུལ། དགོང་དྲོ་ཚོགས་ཁང་དུ་སྔར་ལུགས་ལྟར་སྒོར་གཞས་འཁྲབ་སྟོན་ཞུས་པ་བཅས།
རྫ་རོང་ཐུབ་བསྟན་ཆོས་གླིང་དུ་སྐུའི་འཁྲུངས་སྐར་སྲུང་བརྩི་ཞུས་པ།
དེ་ཉིན་སྔ་དྲོ་ཆུ་ཚོད་ ༦།༣༠ ཐོག་དགེ་འདུན་བཙུན་མ་རྣམས་ལྷན་འཛོམས་ཀྱི་དར་ཆེན་དང་སྐུ་རླུང་དར་འཛུགས་ལྷ་བསངས་ཆོས་སྐུ་རྣམ་དག་དང་སྲུང་མའི་འཕྲིན་བཅོལ་སྒྲུབ་མཚམས་༸རྒྱལ་བའི་སྐུ་དཔར་མཐོང་གྲོལ་རིན་པོ་ཆེ་འཕྲུལ་རྗེ་རིན་པོ་ཆེའི་གཟིམ་ཆུང་ནས་སྤོས་སྣེས་དགོན་པའི་འདུ་ཁང་ནང་བཞུགས་ཁྲིར་མངའ་གསོལ་རྗེས་འཕྲུལ་རྗེ་རིན་པོ་ཆེས་རབ་གནས་མཎྜལ་རྟེན་གསུམ་འདེགས་གནང་མཚམས་གསོལ་ཇ་འབྲས་སིལ་ཕུལ། དེ་ནས་གྲྭ་བཙུན་དམངས་ནས་སྐུ་དཔར་ལ་མཇལ་དར་སྒྲོན་འབུལ་དང་༸རྒྱལ་བའི་སྐུ་ཚེ་ཞབས་པད་བསྐལ་བརྒྱར་བརྟན་པའི་ཞབས་བརྟན་གསོལ་འདེབས་སོགས་ཉིན་གང་སྐུ་ཕྱྭའི་ཞབས་རིམ་འབད་སྒྲུབ་ཞུས་པ་བཅས།
ནགས་ཆེ་ཁ་འཐོར་རང་བདེན་ཚོགས་ཆུང་གི་ཁུམ་ཆུང་ཡུལ་མིའི་མཐོ་རིམ་སློབ་གྲྭའི་ཚོགས་ཁང་དུ་སྐུའི་འཁྲུངས་སྐར་སྲུང་བརྩི་ཞུས།
ཚེས་ ༥ ཉིན་ནགས་ཆེ་ལྷ་རར་སེར་སྐྱ་མི་མང་འདུ་འཛོམས་ཀྱིས་དར་ཆེན་དང་སྐུ་རླུང་དར་འཛུགས་དང་། བསང་གསོལ་ལེགས་པར་སྒྲུབ་རྗེས་ལྷ་མོ་འཁྲབ་སྟོན་པ་རྣམས་དང་འཁྲུངས་སྐར་གྲ་སྒྲིག་བྱེད་མི་རྣམས་ཁུམ་ཆུང་དུ་བསྐྱོད། ཚེས་ ༦ ཉིན་སྔ་དྲོ་ཆུ་ཚོད་ ༨ ཐོག་སེར་སྐྱ་མི་མང་སྤྱི་དང་ཁུལ་དེར་གནས་སྡོད་ཤར་པ་མི་མང་དང་སྐུ་མགྲོན་བཅས་ནས་སྐུ་དཔར་མཐོང་གྲོལ་རིན་པོ་ཆེ་བཞུགས་ཁྲིར་མངའ་གསོལ་རྗེས་རང་བདེན་ཚོགས་ཆུང་གི་ཚོགས་གཙོ་དབང་ཕྱུག་ལགས་ཀྱིས་མཎྜལ་རྟེན་གསུམ་འདེགས་འབུལ་དང་སྐུ་མགྲོན་དང་མི་མང་རྣམས་ཀྱི་མཇལ་ཁ་ཞུས་པ་དང་རྟེན་འབྲེལ་གྱི་གསོལ་ཇ་འབྲས་སིལ་ཕུལ། དེ་ནས་ལྷ་མོའི་འཁྲབ་གཞུང་སྣང་ས་ཉིན་གང་འཁྲབ་སྟོན་རྗེས་བོད་མི་དང་ཡུལ་མི་ཐུན་མོང་ནས་སྒོར་གཞས་འཁྲབ་སྟོན་ཞུས། སྐུ་མགྲོན་བལ་གཞུང་སྐོར་སྲུང་དཔོན་ཆེ་དང་ཡུལ་མི་འགོ་དཔོན་རྣམས་ལ་ཉིན་གུང་གསོལ་ཚིགས་དང་མི་མང་ཡོངས་ལ་གསོལ་ཇ་ཞལ་ཏོག་ཕུལ།
ཝ་ལུང་བསམ་གླིང་གཞིས་ཆགས་སུ་སྐུའི་འཁྲུངས་སྐར་སྲུང་བརྩི་ཞུས་པ།
དེ་ཉིན་སྔ་དྲོ་གཞིས་དགོན་བཀྲིས་ཆོས་འཕེལ་གླིང་དགོན་དུ་སེར་སྐྱ་མི་མང་ཚང་འཛོམས་ཐོག་དར་ཆེན་དང་སྐུ་རླུང་དར་འཛུགས་དང་གཞིས་དགོན་གནས་བླ་མ་དང་སྒར་འཐུས་བཅས་སྐུ་དཔར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས་རྗེས་མི་མང་དང་སློབ་ཕྲུག་ལ་རྟེན་འབྲེལ་གྱི་གསོལ་ཇ་འབྲས་སིལ་ཕུལ། དེ་རྗེས་སློབ་ཕྲུག་རྣམས་ཀྱིས་གཞས་སྣ་འཁྲབ་སྟོན་དང་། ཉིན་དགུང་སྐུ་མགྲོན་ས་གནས་སྐོར་སྲུང་དཔོན་རིགས་དང་བལ་དགེ་རྣམས་ལ་ཉིན་གུང་གསོལ་ཚིགས་ཕུལ། སྔར་ལམ་ལྟར་ཉིན་ལྔའི་རིང་དབྱར་སྐྱིད་བཏང་སྲོལ་བཞིན་ཚེས་ ༩ ཉིན་སླར་ཡང་སྐུ་མགྲོན་རྣམས་གདན་ཞུས་ཀྱི་ཞལ་ལག་དང་། དེ་བཞིན་དགུན་ས། ཝ་ལུང། ཡང་དམག་བཅས་ཁ་ཐོར་གནས་སྡོད་མི་མང་ནས་སྐུའི་འཁྲུངས་སྐར་སྲུང་བརྩི་ཟབ་རྒྱས་གནས་བ་བཅས་སུ།
ར་སུ་ཝ་དགེ་རྒྱས་གླིང་དུ་སྐུའི་འཁྲུངས་སྐར་སྲུང་བརྩི་ཞུས་པ།
དེ་ཉིན་སྔ་དྲོ་ཆུ་ཚོད་ ༨ ཐོག་ར་སུ་ཝ་དགེ་རྒྱས་གླིང་ཤབ་རུ་གཞིས་གྲོང་ནང་མི་མང་སློབ་ཕྲུག་འདུ་འཛོམས་ཀྱི་ཤབ་རུ་གྲོང་སྡེར་སྐོར་བསྐྱོད་ཀྱི་ཚོགས་ཁང་ནང་སྐུ་དཔར་མཐོང་གྲོལ་རིན་པོ་ཆེ་བཞུགས་ཁྲིར་མངའ་གསོལ་རྗེས་འབྲེལ་མཐུད་པ་དང་ས་གནས་རང་བདེན་ཚོགས་གཙོ་དང་དགེ་ཆེ་བཅས་ཀྱིས་མཎྜལ་རྟེན་གསུམ་འདེགས་འབུལ་རྗེས་རྟེན་འབྲེལ་གྱི་གསོལ་ཇ་འབྲས་སིལ་རྗེས་མི་མང་རྣམས་ལྷན་འཛོམས་ཀྱི་འཁྲུངས་སྐར་དུས་ཆེན་སྲུང་བརྩི་ཞུས་ཡོད་པ་བཅས་སུ།།