༄༅། །ཀུན་གྱི་དགོངས་པར་མངའ་གསལ་བཞིན་བོད་ཟླ་ ༦ ཚེས་ ༤ ཉིན་བདག་ཅག་གི་སྟོན་པ་མཉམ་མེད་ཐུབ་པའི་དབང་པོས་སྔོན་ཡུལ་ཝ་ར་ཎ་སིར་དམ་པའི་ཆོས་ཀྱི་འཁོར་ལོ་ཐོག་མར་བསྐོར་བར་མཛད་པའི་བཀྲིན་རྗེས་སུ་དྲན་པའི་དུས་དྲན་སྲུང་བརྩི་ཞུ་བ་དང་འབྲེལ། དུས་ཆེན་ཁྱད་པར་ཅན་འདིར་སྤྱི་མཐུན་བསོད་ནམས་གོང་འཕེལ་བྱ་རྒྱུ་གལ་ཆེན་ཡིན་པ་མ་ཟད། ཐེངས་འདིར་ཆོས་འཁོར་བསྐོར་བའི་མཛད་པ་བསྐྱངས་ནས་མི་ལོ་ ༢༦༠༠ ཧྲིལ་པོ་འཁོར་གྱི་ཡོད། དེས་ན་བོད་རྒྱལ་ལོ་ ༢༡༣༨ ཟླ་ ༦ ཚེས་ ༤ ཕྱི་ལོ་ ༢༠༡༡ ཟླ་ ༨ ཚེས  ༣ ཉིན་ཞོགས་པ་ཆུ་ཚོད་ ༨།༣༠ ཐོག་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་མཆོད་སྤྲིན་སྣ་ལྔ་དང་། སྐུ་བཅར་རྣམ་གྲྭ་ཕན་བདེ་ལེགས་བཤད་གླིང་གི་འདུས་སྡེ་དབུས་པའི་འཕགས་ཚོགས་དགེ་འདུན་འདུས་པ་རྒྱ་མཚོར་བསྙེན་བཀུར་དང་འབྲེལ་མཆོད་འབུལ་སྨོན་ལམ་ཞིག་ཚོགས་གཏན་འཁེལ་བ་ལགས་ན། བཞུགས་སྒར་གནས་འཁོད་སེར་སྐྱ་མི་མང་རྣམས་ནས་སོ་སོའི་བཞེས་ཕོར་མཉམ་འཁྱེར་གྱིས་མཆོད་འབུལ་དུ་མཉམ་ཞུགས་གནང་སྐྱོང་ཡོང་བར་བསྐུལ་མ་ཞུ་བའི་གསལ་བསྒྲགས་སུ། ཆོས་རིག་ལས་ཁུངས་ནས་ཕྱི་ལོ་ ༢༠༡༡ ཟླ་ ༧ ཚེས ༢༥ ལ།།