༢༠༡༡ ཟླ་ ༧ ཚེས་ ༡༡ རེས་གཟའ་ཟླ་བ།
༄༅། །འདི་གར་སེར་བྱེས་ཏྲེ་ཧོར་དཀར་མཛེས་བ་པདྨ་ཚེ་དབང་ལགས་ཀྱིས་ཕྱི་ལོ་ ༢༠༡༡ ཕྱི་ཟླ་ ༧ པའི་ཚེས་ ༨ ཉིན་བཏང་གནས་ནང་འཁོད་དོན། ཕྱི་ལོ་ ༢༠༡༡ ལོའི་ཟླ་ ༦ པའི་ཚེས་༢༤ ཉིན་ བོད་ནང་དགོང་དྲོའི་ཆུ་ཚོད་ ༣།༤༥ ཙམ་ཞིག་ལ་བསོད་ནམས་ཆོོས་རྒྱལ་དང་། བསོད་ནམས་ཉི་མ་གཉིས་ཀྱིས་དཀར་མཛེས་རྫོང་གི་ཁྲོམ་གཞུང་དུ་ཞི་རྒོལ་སྐད་འབོད་བྱས་པར་བརྟེན། དྲག་ཆས་ཉེན་རྟོག་པ་དང་། དམག་མིས་ཉེས་རྡུང་བཏང་སྟེ་འཛིན་བཟུང་བཙོན་འཇུག་བྱས་ནས། ཕྱི་ལོ་ཟླ་ ༧ པའི་ཚེས་ ༥ ཉིན་དཀར་མཛེས་རྫོང་མི་དམངས་ཁྲིམས་ཁང་ཟེར་བ་ནས་ཁོང་གཉིས་ལ་དུས་བཀག་བཙོན་འཇུག་ལོ་ ༣ གྱི་ཁྲིམས་ཐག་བཅད་དེ་ད་ལྟ་བྲག་མགོ་རྫོང་གི་བཙོན་ཁང་ཞིག་གི་ནང་དུ་བཙོན་འཇུག་བྱས་ཡོད་འདུག རང་ལོ་ ༡༩ ཡིན་པ་བསོད་ནམས་ཆོས་རྒྱལ་ནི། སྐྱེས་ཡུལ་ཟི་ཁྲོན་ཞིང་ཆེན་དཀར་མཛེས་རྫོང་། ལྷོ་པ་ཤང་། ཁ་དཀར་གྲོང་ཚོ་རུ་ཕ་རྟ་མགྲིན་དབང་རྒྱལ་དང་། མ་བུ་མོ་ལྷ་དགའ་གཉིས་སུ་ཕྱི་ལོ་ ༡༩༩༢ ལོར་སྐྱེས། བསོད་ནམས་ཉི་མ་ནི། སྐྱེས་ཡུལ་དཀར་མཛེས་རྫོང་། ལྷོ་པ་ཤང་། ཁ་དཀར་གྲོང་དུ། ཕ་བློ་བཟང་ཉི་མ་དང་། མ་བསོད་ནམས་ལྷ་མོ་གཉིས་ལ་སྐྱེས། ཁོང་ཡང་རང་ལོ་ ༡༩ ཡིན་འདུག་པ་དང་། དེའི་ཉིན་ཁོང་གཉིས་ཀྱིས་གཙོས་འདི་ལོ་ཕྱི་ཟླ་དྲུག་པ་ནང་དཀར་མཛེས་རྫོང་གི་ཁྲོམ་གཞུང་དུ་ཞི་རྒོལ་སྐད་འབོད་བྱས་རྐྱེན་འཛིན་བཟུང་བཙོན་འཇུག་བྱས་པའི་ཁྲོད་བོད་མི་ ༡༣ ལ་ཁྲིམས་ཐག་བཅད་ཡོད་པ་བཅས།།
