༢༠༡༡ ཟླ་ ༧ ཚེས་ ༢༧ རེས་གཟའ་ལྷག་པ།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་ཕྱི་ལོ་ ༢༠༡༡ ཟླ་ ༧ ཚེས་ ༢༦ ཉིན་བཏང་གནས་ནང་འཁོད་དོན།  ཕྱི་ལོ་ ༢༠༡༡ ཟླ་ ༧ ཚེས་ ༢༥ ཉིན་བོད་མདོ་སྨད་ཨ་མདོ་རྔ་པ་ནས་འབྱོར་བའི་གནས་ཚུལ་ལྟར་ན། རྔ་པ་ཀིརྟི་དགོན་པའི་དགེ་འདུན་པ་དོན་ཡོད་རྡོ་རྗེ། རང་ལོ་ ༣༤ ཡིན་པ་ཁོང་ལ་ལོ་ ༣ གྱི་བཙོན་འཇུག་ཁྲིམས་ཐག་བཅད་དེ་ད་ལྟ་སི་ཁྲོན་གྱི་མེན་ཡངས་ཞེས་པའི་ས་གནས་ཀྱི་བཙོན་ཁང་ཞིག་ཏུ་བཙོན་འཇུག་བྱས་ཡོད་འདུག ཁོང་ལ་ས་གནས་གང་ཞིག་གི་ཁྲིམས་ཁང་ནས་ཇི་ལྟར་ཁྲིམས་ཐག་བཅད་པ་དང། དུས་ཚོད་ནམ་ཞིག་བཅད་པ་སོགས་ཤེས་དགོས་ངེས་ཀྱི་གནས་ཚུལ་མང་པོ་ཞིག་ད་ལྟའི་ཆར་ཞིབ་ཕྲ་ཤེས་རྟོགས་དཀའ་བའི་གནས་སུ་གྱུར།
ཁོང་འདི་ལོའི་ཕྱི་ཟླ་ ༤ ཚེས་ ༨ ཉིན་དགོན་པའི་ནང་ནས་འཛིན་བཟུང་བྱས་པ་ནས་ཡུན་རིང་གར་ཡོད་ཅི་བྱུང་གི་གནས་ཚུལ་གཅིག་ཀྱང་འབྲེལ་ཡོད་ཚོས་ཤེས་རྟོགས་མ་ཐུབ་པར་གྱུར་འདུག ཁོང་ནི་རྔ་པ་རྫོང་གཅའ་ཞང་རྭ་བའི་དཔལ་ཁོ་ཚང་ཞེས་པ་ནས་ཡིན་ཞིང་། ཕ་མིང་ལ་དཔལ་ཁོ་ཟེར། ཁོང་ཆུང་དུས་ནས་ཀིརྟི་དགོན་པར་ཆོས་ཞུགས་བྱས་པ་ཞིག་ཡིན་འདུག གཞན་ཡང་ཕོ་གསར་གསུམ་ལ་ཁྲིམས་ཐག་བཅད་དེ་མེན་ཡངས་སུ་བཙོན་འཇུག་བྱས་ཡོད་པའི་གནས་ཚུལ་འདུག་ཀྱང་ཁོང་རྣམས་ཀྱི་མིང་དང་ས་གནས་སོགས་ཤེས་རྟོགས་མ་ཐུབ། དེང་སྐབས་རྔ་པ་རང་སྐྱོང་ཁུལ་གྱི་རྫོང་ཁག་གཞན་གྱི་ལས་བྱེད་པ་སུམ་བརྒྱ་ཙམ་ཉིན་མཚན་གཉིས་ཀར་ཀིརྟི་དགོན་པའི་ནང་བསྡད་ཡོད་པ་མ་ཟད།   དེའི་སྟེང་དུ་རྔ་པ་རྫོང་ཁོངས་ཀྱི་ལས་བྱེད་པ་སུམ་བརྒྱ་ལྷག་ཙམ་གྱིས་ཉིན་རྟག་པར་ཀིརྟི་དགོན་པའི་དགེ་འདུན་པ་རྣམས་ལ་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བ་མུ་མཐུད་སྤེལ་བཞིན་ཡོད་ཅིང་། དགོན་པའི་ཕྱི་ནང་གཉིས་ཀར་དམག་མི་དང་ཉེན་རྟོག་པ། དམིགས་བསལ་ཉེན་རྟོག་པ་བཅས་ཀྱི་ལྟ་རྟོག་འོག་གནས་མུས་ཡིན་པ་དང་། དགེ་འདུན་པ་རྣམས་ཀྱི་འགྲོ་སྡོད་ཀྱི་རང་དབང་དང་བྱེད་སྒོ་ཆེ་ཕྲ་མཐའ་དག་རྒྱ་གཞུང་གི་མི་སྣས་བཙན་དབང་གིས་བཀག་སྡོམ་བྱས་དང་བྱེད་མུས་ཡིན་འདུག་པ་བཅས།