༢༠༡༡ ཟླ་ ༧ ཚེས་ ༡ རེས་གཟའ་པ་སངས།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༡ ཟླ་ ༧ ཚེས་ ༦ ཉིན་ཨ་རིའི་རྒྱལ་ས་ཝ་ཤིང་ཊོན་དུ་མང་ཚོགས་ཁྲི་ཕྲག་བརྒལ་བར་དཔལ་དུས་ཀྱི་འཁོར་ལོའི་བཀའ་དབང་བཀའ་དྲིན་སྩལ་རྒྱུ་དང་སྟབས་བསྟུན། པི་རིན་སི་ཊོན་(Princeton)དུ་རྟེན་གཞི་བྱས་པའི་རྒྱ་ནག་གི་སློབ་ཚོགས་ཞེས་པའི་གདན་ཞུ་ལྟར་མགོན་པོ་གང་ཉིད་མཆོག་མང་གཙོའི་རྒྱ་ནག་དང་མ་འོངས་བོད་ཅེས་པའི་རྒྱལ་སྤྱིའི་བགྲོ་གླེང་གི་ཚོགས་མགོན་དུ་ཆིབས་སྒྱུར་བསྐྱང་རྒྱུ་ཡིན་འདུག
དེ་ཡང་བགྲོ་གླེང་གོ་སྒྲིག་ཞུ་མཁན་པི་རིན་སི་ཊོན་གྱི་རྒྱ་ནག་སློབ་ཚོགས་ནས་གསར་འགོད་གསལ་བསྒྲགས་ཤིག་སྤེལ་བའི་ནང་འཁོད་དོན། ང་ཚོས་ཇི་ལྟར་གསོལ་འདེབས་ཞུས་དོན་ལྟར་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཕྱི་ལོ་ ༢༠༡༡ ཟླ་ ༧ ཚེས་ ༩ ནས་ ༡༠ བར་འཚོགས་རྒྱུའི་མང་གཙོའི་རྒྱ་ནག་དང་མ་འོངས་བོད་ཅེས་པའི་རྒྱལ་སྤྱིའི་བགྲོ་གླེང་ལྷན་ཚོགས་སུ་ཆིབས་སྒྱུར་བསྐྱང་སྟེ་ས་ཕྱོགས་འདྲ་མིན་ནས་ཕེབས་པའི་རྒྱ་རིགས་མཁས་དབང་དང་མང་གཙོ་དོན་གཉེར་བ་རྣམས་ཀྱི་ལྷན་རྒྱ་ནག་མང་གཙོའི་གནས་བབ། མ་འོངས་བོད་ཀྱི་ལས་དབང་། དེ་བཞིན་༸གོང་ས་ཏཱ་ལའི་བླ་མ་མཆོག་གིས་ཆབ་སྲིད་སྐུ་དབང་མི་མང་ནས་ཐད་ཀར་འོས་འདེམས་བྱས་པའི་འགོ་ཁྲིད་ཚོར་གསོལ་རས་སྩལ་བ། ཕྱོགས་མཚུངས་བོད་རྒྱའི་འབྲེལ་མོལ་དང་། ད་ལྟའི་བོད་ཀྱི་གནས་སྟངས་ཐོག་ལ་བཀའ་བསྡུར་མཛད་རྒྱུ་ཡིན་སྐོར་འཁོད་འདུག ད་དུང་གསལ་བསྒྲགས་དེའི་ནང་མི་མང་ནས་འོས་འདེམས་བྱས་པའི་འབྱུང་འགྱུར་བཀའ་ཁྲི་བློ་བཟང་སེང་གེ་མཆོག་དང་། ༸གོང་ས་མཆོག་གི་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་མཆོག ཨཱཀྱ་རིན་པོ་ཆེ་མཆོག ཨ་རིའི་མང་གཙོའི་ཐེབས་རྩ་ཚོགས་པའི་ཚོགས་གཞོན་བཅས་ནས་ཀྱང་གསུང་བཤད་གནང་རྒྱུ་ཡིན་པ་དེར་རྒྱ་རིགས་རྩོམ་པ་པོ་དང་ཆེད་ལས་མཁས་པ། བོད་དོན་ཉམས་ཞིབ་པ་སོགས་ཁྱོན་མི་གྲངས་བརྒྱ་སྐོར་ཞིག་མཉམ་ཞུགས་གནང་རྒྱུ་ཡིན་སྐོར་འཁོད་འདུག་པ་བཅས། །
༸གོང་ས་༸སྐྱབས་མགོན་ཆེན་པོ་མཆོག་མང་གཙོའི་རྒྱ་ནག་དང་མ་འོངས་བོད་ཅེས་པའི་བགྲོ་གླེང་གི་ཚོགས་མགོན་དུ་ཆིབས་སྒྱུར་བསྐྱང་རྒྱུ་ཡིན་འདུག
གསར་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)
འབྲེལ་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)