༢༠༡༡ ཟླ་ ༧ ཚེས་ ༢༩ རེས་གཟའ་པ་སངས།
༄༅། །རྒྱལ་སྤྱིའི་བོད་དོན་ལས་འགུལ་ཁང་གིས་གཙོས་ཨ་རིར་རྟེན་གཞི་བྱས་པའི་བོད་དོན་ལ་རྒྱབ་སྐྱོར་གནང་མཁན་གྱི་ཚོགས་པ་བཅུ་ཐུན་མོང་ནས་རིང་མིན་རྒྱ་ནག་ཏུ་ཨ་རིའི་གཞུང་ཚབ་ཀྱི་འགན་ཁུར་བཞེས་མཁན་སྐུ་ཞབས་(Gary Locke)གྷ་རི་ལོཀི་མཆོག་ལ་ཕྱག་བྲིས་ཤིག་ཕུལ་འདུག
དེ་ཡང་འཕྲིན་ཡིག་དེའི་ནང་འཁོད་དོན། སྐུ་ཞབས་གྷ་རི་ལོཀི་མཆོག་གིས་རྒྱ་ནག་ཏུ་ཨ་རིའི་གཞུང་ཚབ་གནང་ཡུན་རིང་བོད་མིའི་མངོན་འདོད་དང་རང་དབང་ཐོག་དུས་རྟག་ཏུ་ཐུགས་འགན་ཆེ་བཞེས་ཡོང་བའི་རེ་འདུན་ཞུས་ཡོད། སྐུ་ཞབས་གྷ་རི་ལོཀི་མཆོག་རྒྱ་ནག་གི་རྒྱལ་ས་པེ་ཅིང་དུ་ཡོད་པའི་ཨ་རིའི་གཞུང་ཚབ་ལ་མཚན་ཐོ་ཐོན་པར་འཚམས་འདྲི་ཞུ་རྒྱུ་དང་ཆབས་ཅིག་རྒྱ་ནག་གི་གཞུང་ཚབ་པར་བོད་ནང་གི་ཐུགས་འགན་གང་ཡོད་པ་རྣམས་ཞིབ་ཕྲ་བཀོད་གནང་འདུག
དེ་བཞིན་འཕྲིན་ཡིག་དེའི་ནང་ཉེ་ལམ་བོད་མདོ་སྨད་རྔ་པ་ཀིརྟི་དགོན་པར་ཛ་དྲག་གི་གནས་སྟངས་བྱུང་བ་དང་། མདོ་སྟོད་སྐྱེ་རྒུ་མདོར་རང་འབྱུང་གི་གནོད་འཚེ་བྱུང་རྗེས་རྒྱ་ནག་གཞུང་ནས་རིག་གནས་དང་རྩ་ཆེན་གནས་ས་དེ་ཡུལ་སྐོར་སྤྲོ་འཆམ་པའི་བསྟི་གནས་ཤིག་ཏུ་བསྒྱུར་རྒྱུའི་འཆར་གཞི་བཏིངས་བ། ཕྱོགས་མཚུངས་སྔ་ལོ་རྒྱ་ནག་གཞུང་གི་སློབ་གཞི་བཅོས་བསྒྱུར་གྱིས་སྲིད་བྱུས་འོག་བོད་མིའི་སྐད་ཡིག་རྩ་མེད་བཟོ་ཐབས་བྱས་རྐྱེན་བོད་མི་རྣམས་ནས་ཞི་རྒོལ་བྱས་ཡོད་པར་བརྟེན། སྐུ་ཞབས་གྷ་རི་ལོཀི་མཆོག་གིས་གནད་དོན་དེ་དག་ཐོག་དམིགས་བསལ་ཐུགས་ཞིབ་ཡོང་བའི་རེ་འདུན་ཡང་བཏོན་འདུག གཞན་ཡང་ཁོང་རྣམ་པས་ཨ་རིིའི་གཞུང་ཕྱོགས་ནས་བོད་ཀྱི་གནད་དོན་དེ་བཞིན་གལ་ཆེ་དོན་ཆེར་འཛིན་པའི་ཐོག་ཕྱི་ལོ་ ༢༠༠༢ ནས་ཕྱི་སྲིད་ལས་ཁུངས་སུ་བོད་དོན་དམིགས་བསལ་འབྲེལ་མཐུད་པ་ཞིག་བསྐོ་གཞག་གནང་ཡོད། དེ་སྔའི་ཨ་རིའི་གཞུང་ཚབ་པ་སྐུ་ཞབས་ཁལ་ལཀ་རན་(Clark Randt)དང་། སྐུ་ཞབས་ཧན་ཊི་སེ་མན་(Huntsman)བཅས་ནས་པེ་ཅིང་དུ་ཕྱག་ལས་གནང་རིང་བོད་ཀྱི་ཆབ་སྲིད་བཙོན་པ་ཁག་གཅིག་ཨ་རིར་རྩིས་སྤྲོད་གནང་ཡོད་པ་མ་ཟད། བོད་ནང་གི་དངོས་ཡོད་གནས་སྟངས་རྟོག་ཞིབ་ཆེད་བོད་ཀྱི་ས་ཁུལ་ཁག་གཅིག་ལ་ཆེད་ཕེབས་གནང་བ་སོགས་ལུང་འདྲེན་གནང་འདུག དེ་བཞིན་བོད་ཀྱི་གནད་དོན་ནི་འཚེ་མེད་ཞི་བ་ཡིན་སྟབས། ད་བར་ཨ་རིའི་གཞུང་ཕྱོགས་ནས་རྒྱབ་སྐྱོར་གནང་བཞིན་ཡོད། ཕྱོགས་མཚུངས་བོད་དེ་ས་བབ་ཆ་ནས་ཨི་ཤེ་ཡའི་བདེ་འཇགས་དང་ཐད་ཀར་འབྲེལ་བ་ཡོད་པ་མ་ཟད། འཛམ་གླིང་ཚང་མར་འབྲེལ་བ་ཆགས་ཡོད་པར་བརྟེན་བོད་ཀྱི་ཁོར་ཡུག་ཐོག་ཐུགས་སྣང་གནང་དགོས་ཀྱི་འདུག གཞི་རྩའི་རྒྱ་ནག་ཏུ་ཡོད་པའི་ཨ་རིའི་གཞུང་ཚབ་སུ་ཞིག་ཡིན་རུང་ཨ་རིའི་སྲིད་བྱུས་དང་བསྟུན་ནས་ཕྱག་ལས་གནང་དགོས་ཀྱི་ཡོད་སྟབས། ༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་རྒྱ་ནག་གི་སྐུ་ཚབ་ལྷན་གྲོས་མོལ་ཐོག་ནས་བོད་ཀྱི་གནད་དོན་སེལ་དགོས་པའི་རྒྱབ་སྐྱོར་གནང་རྒྱུ་དེ་ཨ་རིའི་གཞུང་ཕྱོགས་ཀྱི་སྲིད་བྱུས་ཤིག་ཡིན་པ་རེད། དེ་བཞིན་བོད་ཀྱི་ཆོས་དང་རིག་གཞུང་མི་ཉམས་གོང་འཕེལ་སྲུང་སྐྱོབ་ཆེད་རྒྱབ་སྐྱོར་གནང་རྒྱུ་དེ་ཡང་ཨ་རིའི་གཞུང་གི་སྲིད་བྱུས་ཡིན་སྐོར་སོགས་བཀོད་ཡོད་པ་བཅས། །