༢༠༡༡ ཟླ་ ༧ ཚེས་ ༢༠ རེས་གཟའ་ལྷག་པ།
༄༅། །དབྱིན་ཡུལ་དུ་རྟེན་གཞི་བྱས་པའི་(Pestalozzi International village Trust,East Sussex,UK)པེ་སི་ཊོ་ལོ་ཇི་རྒྱལ་སྤྱིའི་ཐེབས་རྩ་ནས་ལོ་ལྟར་འཛིན་རིམ་བཅུ་པ་ཐོན་པའི་བོད་མི་སྐྱབས་བཅོལ་བའི་སློབ་ཕྲུག་ཉུང་མཐར་ལྔ་ལ་        (Sussex Coast College, Hastings, East Sussex) ཞེས་པའི་མཐོ་སློབ་ཏུ་ལོ་གཉིས་རིང་(International Baccalaureate Diploma Course) སློབ་སྦྱོང་ཆེད་སློབ་ཡོན་གནང་རྒྱུའི་ཞལ་བཞེས་ཐོབ་ཡོད་པ་ལྟར། འདི་ལོར་ཕྱི་ལོ་ ༢༠༡༡ ཟླ་ ༧ ཚེས་ ༡༩ ནས་ ༢༢ བར་ཕྱི་འབྲེལ་ལྷག་པ་ཚེ་རིང་དྲན་རྟེན་ཚོགས་ཁང་དུ་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་དང་གོང་འཁོད་དབྱིན་ཡུལ་གྱི་ཐེབས་རྩ་གཉིས་ཐུན་མོང་ནས་གོ་སྒྲིག་ཐོག་དབྱིན་ཡུལ་དུ་ལོ་གཉིས་རིང་སློབ་བསྐྱོད་ཆེད་མཐའ་མའི་མི་འགྲོའི་འདེམས་རྒྱུགས་གཏོང་བཞིན་ཡོད།
འདེམས་རྒྱུགས་ཆེད་དབྱིན་ཡུལ་ཚོགས་པ་དེའི་སློབ་ཕྲུག་ལས་གཞིའི་འགན་འཛིན་(Student Program Manager)ལྕམ་སྐུ་མར་གྷ་རེ་ཊི་ཨེ་ལེ་སི་ཛེན་ཊར་(Ms.Margaret Alexander) ལགས་ཆེད་ཕེབས་གནང་ཡོད། འདི་ལོའི་འདེམས་རྒྱུགས་སུ་རྒྱ་གར་ནང་གི་བོད་མིའི་སློབ་གྲྭ་ཁག་བཅུ་ནས་སློབ་མ་ ༣༡ འདེམས་རྒྱུགས་ནང་ཆ་ཤས་བླངས་ཡོད་སྐོར་ལྕམ་སྐུ་མར་གྷ་རེ་ཊི་ཨེ་ལེ་སི་ཛེན་ཊར་ལགས་ཀྱིས་གསུང་དོན། པེ་སི་ཊ་ལོ་ཇི་རྒྱལ་སྤྱིའི་ཐེབས་རྩས་བོད་ཕྲུག་གཞོན་སྐྱེས་ཚོར་སློབ་ཡོན་གནང་རྒྱུ་ནི་གོ་སྐབས་བཟང་པོ་ཞིག་མཐོང་གི་འདུག ང་ཚོས་འདེམས་ཐོན་སློབ་མ་རྣམས་ཀྱིས་མ་འོངས་པར་བོད་མིའི་སྤྱི་ཚོགས་ཙམ་མིན་པར་འཛམ་གླིང་ཁྱོན་ཡོངས་ལ་ཕན་པའི་བྱ་བ་སྒྲུབ་པའི་རེ་བ་བྱེད་བཞིན་ཡོད། ཅེས་གསུངས་ཡོད།
སྤྱིར་སློབ་ཡོན་འདི་བཞིན་ཕྱི་ལོ་ ༡༩༦༣ ལོར་དབུ་འཛུགས་གནང་ཡོད། གོང་གསལ་མཐོ་སློབ་དེ་ནས་ཐོན་རྗེས་བོད་རིགས་སློབ་མ་ཕལ་ཆེ་བར་ཕྱི་རྒྱལ་ཡུལ་གྲུ་གཞན་ཁག་གི་ནང་མུ་མཐུད་སློབ་སྦྱོང་བྱ་རྒྱུའི་གོ་སྐབས་ཐོབ་ཀྱི་ཡོད་པ་ནི་དཔེར་ན་ཐུབ་བསྟན་སྒྲོལ་མ་དང་སངས་རྒྱས་ཡེ་ཤེས་ལྟ་བུ་རེད། སློབ་མ་ཐུབ་བསྟན་སྒྲོལ་མ་ལྟ་བུར་མཚོན་ན། ཨ་རིའི་སི་ཊེན་ཌི་ཕོར་ཌི་(Standford University) གཙུག་ལག་སློབ་གཉེར་ཁང་དུ་སློབ་སྦྱོང་བྱ་རྒྱུའི་སློབ་ཡོན་ཆ་ཚང་ཐོབ་ཡོད། སློབ་མ་སངས་རྒྱས་ཡེ་ཤེས་ལྟ་བུར་མཚོན་ན། ཨ་རིའི་ནང་རྟེན་གཞི་བྱས་པའི་ཌིའུ་གཙུག་ལག་སློབ་གཉེར་ཁང་(Drew University) དུ་སློབ་སྦྱོང་བྱ་རྒྱུའི་སློབ་ཡོན་ཆ་ཚང་ཐོབ་སྟེ་ད་ལྟ་སློབ་སྦྱོང་བྱེད་མུས་ཡིན། དེ་བཞིན་སློབ་མ་བསྟན་འཛིན་བསྟན་པ་ལྟ་བུར་མཚོན་ན། འཇར་མ་ནིའི་ཇེ་ཀོབ་གཙུག་ལག་སློབ་གཉེར་ཁང་(Jacob University)དུ་སློབ་སྦྱོང་བྱ་རྒྱུའི་སློབ་ཡོན་ཐོབ་ཡོད་སྐོར་སོགས་ཀྱི་གསལ་བཤད་གནང་ཡོད་པ་བཅས།།