༢༠༡༡ ཟླ་ ༧ ཚེས་ ༡༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༧ ཚེས་ ༡༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཀེ་པི་ཊོལ་ཧིལ་(Capitol Hill) དུ་ཆིབས་སྒྱུར་བསྐྱངས་ཏེ་གྲོས་ཚོགས་གོང་མའི་ཕྱི་འབྲེལ་ལས་དོན་ལྷན་ཚོགས་ཀྱི་ཚོགས་མི་རྣམས་དང་ལྷན་མཇལ་འཕྲད་མཛད་ཡོད། སྐབས་དེར་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་འདེམས་ཐོན་བཀའ་ཁྲི་བློ་བཟང་སེང་གེ་མཆོག ༸གོང་ས་མཆོག་གི་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག སྐུ་སྒེར་ཡིག་ཚང་གི་ཟུང་དྲུང་བསྟན་འཛིན་སྟག་ལྷ་ལགས་བཅས་ཀྱང་ལྷན་བཅར་ཞུས་ཡོད། དེ་བཞིན་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ལྷན་ཚོགས་ཀྱི་ཚོགས་གཙོ་སྐུ་ཞབས་ཇོན་ཀེ་རི་(John kerry ) མཆོག་གིས་གཙོས་ཚོགས་མི་བཅུ་གཅིག་ཙམ་ཕེབས་ཡོད། དེ་ཡང་ཐོག་མར་སྐུ་ཞབས་ཇོན་ཀེ་རི་མཆོག་གིས་༸གོང་ས་མཆོག་ལ་འཚམས་འདྲི་ཞུས་པ་དང་སྦྲགས་མགོན་པོ་གང་ཉིད་མཆོག་གིས་འཛམ་གླིང་ཁྱོན་ཡོངས་ལ་ཞི་བདེའི་བསླབ་བྱ་དར་སྤེལ་མཛད་པ་དེར་བསྔགས་བརྗོད་ཞུས་ཡོད་པ་མ་ཟད། ཨ་རིའི་གྲོས་ཚོགས་ཀྱིས་༸གོང་ས་མཆོག་ལ་གུས་བརྩི་ཆེན་པོ་ཞུ་བཞིན་ཡོད་སྐོར་སོགས་ཀྱི་གསུང་བཤད་གནང། དེ་བཞིན་ཁོང་གིས་སྐབ་དེར་འདེམས་ཐོན་བཀའ་ཁྲི་མཁས་དབང་བློ་བཟང་སེང་གེ་མཆོག་ལའང་འཚམས་འདྲི་དང་བོད་མི་མང་སྤྱི་འཐུས་ཚོགས་གཙོ་མཆོག་གྲོས་ཚོགས་ཀྱི་འཐུས་མི་རྣམས་ལ་ངོ་སྤྲོད་གནང་། དེ་རྗེས་ཨ་རིའི་གྲོས་ཚོགས་གོང་མའི་འཐུས་མི་རི་ཆར་ཌི་ལུ་གྷར་(Richard Lugar) མཆོག་གིས་༸གོང་ས་མཆོག་ལ་རྗེས་སུ་ཡི་རང་གི་བསྔགས་བརྗོད་ཞུས་པ་དང་སྦྲགས་ཨ་རིའི་གྲོས་ཚོགས་གོང་མའི་ནང་ (Senate) ༸གོང་ས་མཆོག་དང་བོད་མིར་སེམས་ཐག་ཉེ་བའི་གྲོགས་པོ་མང་པོ་ཡོད་སྐོར་ཞུས་ཡོད། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་སྐུ་དབང་ཡོངས་རྫོགས་མི་མང་གི་འོས་འདེམས་བྱས་པའི་འགོ་ཁྲིད་ཚོར་རྩིས་སྤྲོད་མཛད་དགོས་དོན་སྐོར་གྱི་བཀའ་སློབ་སྩལ་དོན། འཛམ་གླིང་འདི་འགྲོ་བ་མི་རིགས་ཡོངས་ལ་བདག་དབང་ཡོད་པ་བཞིན་རྒྱ་ནག་དེ་ཡང་རྒྱ་ནག་མི་མང་ཚོར་བདག་པ་ཞིག་ཡིན་ཞེས་བཀའ་སྩལ། དེ་བཞིན་༸གོང་ས་མཆོག་གིས་སྤྱིར་མང་གཙོའི་ལྟ་གྲུབ་དང་ལྷག་པར་ཨ་རིའི་མང་གཙོའི་རིང་ལུགས་ལ་བོད་མི་ཚོས་ཡིད་སྨོན་ཇི་ལྟར་བྱེད་ཚུལ། བོད་མི་ཚོས་རྒྱ་ནག་དང་ཁ་བྲལ་མ་རྩོད་པར་གཉིས་སྨན་གྱི་ཐབས་ལམ་ཞིག་འཚོལ་བཞིན་ཡོད་པ་དང་། བོད་ནང་རྒྱ་ནག་གཞུང་གིས་དབང་འོག་ཏུ་བོད་མི་ཚོས་རང་གི་ངོ་བོ་དང་རིག་གཞུང་སྲུང་སྐྱོབ་བྱེད་རྒྱུར་དམ་བསྒྲགས་ཤུགས་ཆེ་རུ་འགྲོ་བཞིན་ཡོད་པ་དང་། རྒྱ་ནག་གི་མི་མང་དུང་ཕྱུར་ ༡༣ ལ་དངོས་ཡོད་གནས་ཚུལ་ཤེས་རྒྱུའི་ཐོབ་ཐང་དང་བདེན་རྫུན་དབྱེ་བ་འབྱེད་རྒྱུའི་ནུས་པ་ཡོད་པར་བརྟེན། རྒྱ་ནག་ནང་དམ་བསྒྲགས་བྱེད་བཞིན་པ་དེ་ཚུལ་མིན་ཞིག་ཡིན་པ་དང་ཕྱི་གསལ་ནང་གསལ་དགོས་རྒྱུ་གལ་ཆེན་པོ་ཡིན་སྐོར་སོགས་ཀྱི་བཀའ་སློབ་སྩལ་རྗེས་༸གོང་ས་མཆོག་གིས་ཨ་རིའི་གྲོས་ཚོགས་ནས་བོད་དོན་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད། དེ་རྗེས་འདེམས་ཐོན་བཀའ་ཁྲི་བློ་བཟང་སེང་གེ་མཆོག་གིས་བོད་ཀྱི་གནས་སྟངས་སྐོར་དང་བོད་ནང་ཕྱི་ཚུལ་ཙམ་ལས་དོན་དངོས་ཐོག་བོད་མི་རྣམས་དམག་ཁྲིམས་འོག་གནས་བཞིན་ཡོད་པ་དང་། ད་ལྟ་བོད་མི་རྣམས་ཀྱི་ཤེས་ཡོན་ཐོག་རོགས་རམ་དགོས་གལ་ཡོད་སྐོར་སོགས་ཀྱི་གསུང་བཤད་གནང་ཡོད་པ་བཅས།།
