༢༢༠༡༡ ཟླ་ ༧ ཚེས་ ༢ རེས་གཟའ་སྤེན་པ།
༄༅། །འཛམ་གླིང་ཞི་བདེ་དེད་དཔོན་ཆེན་པོ་༸གོང་ས་ལྷ་མི་རྣམ་འདྲེན་༸སྐྱབས་མགོན་རྒྱལ་བའི་དབང་པོ་མཆོག་དང་རིས་མེད་བླ་ཆེན་རྣམ་པ། ཆོས་སྡེ་ཁག དེ་བཞིན་བོད་གཞུང་མང་རྣམས་ལ་ཆེད་ཞུ།
གུས་པ་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་ཡབ་དམ་པ་འདས་པོ་རྡོ་རྗེ་མཁའ་འགྲོའི་ནང་མི་རྣམས་ནས་ཞུ་སྙིང།
ད་ལམ་ཕྱི་ཟླ་ ༤ ཚེས་ ༣༠ ཉིན་གནམ་གྲུ་ལྡབ་སྐྱོན་ཤོར་བ་ནས་བཟུང་ཕྱི་ཟླ་ ༥ ཚེས་ ༡༠ སྐུ་ཕུང་སྦྱིན་སྲེག་མ་གྲུབ་ཀྱི་བར་དུ་༸གོང་ས་༸སྐྱབས་མགོན་ཆེན་པོས་གཙོས་བོད་གཞུང་མངས་དང་དེ་བཞིན་ཆོས་སྡེ་ཁག་རྣམས་ནས་ཐུགས་ཁུར་ཆེ་བཞེས་ཀྱི་སོ་སོའི་སྤུན་མཆེད་ཀྱིས་བརྩེ་བའི་སྒོ་ནས་དཀོན་མཆོག་ལ་གསོལ་འདེབས་སྨོན་ལམ་དང་འབྲེལ་བའི་མཆོད་འབུལ་རྒྱ་ཆེ་གནང་བ་མ་ཟད། གུས་པ་ནང་མའི་ཉེ་འཁོར་རྣམས་ལ་ཡིག་ངག་གཉིས་ཀྱི་སྒོ་ནས་སེམས་གསོ་ཚད་མེད་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་། ཕྱིན་ཆད་མ་འོངས་པར་ཡང་ཡབ་དམ་པ་དེ་ཉིད་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་དད་གུས་ཇི་ལྟར་ཞུས་པ་དེ་ལྟར་གུས་པ་ནང་མི་རྣམས་ནས་ཀྱང་དད་གུས་སོགས་ཚད་མེད་ཞུ་རྒྱུ་མ་ཟད། ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་བསྟན་འགྲོའི་དོན་དུ་སྐུ་ཚེ་ཞབས་པད་བརྟན་ཅིང་མཛད་འཕྲིན་མཁའ་མཉམ་ཡོངས་ལ་ཁྱབ་པའི་སྨོན་འདུན་ཞུ་རྒྱུ་དང། དེ་བཞིན་དུ་བོད་གཞུང་དམངས་དང་ཆོས་སྡེ་ཁག་རྣམས་ལ་ཡང་ཡབ་དམ་པས་འབྲེལ་བ་ཇི་ལྟར་ཞུས་པ་དེ་བཞིན་དུ་གུས་པ་ནང་མི་རྣམས་ནས་ཀྱང་ཞུ་རྒྱུ་ལགས་ན། གུས་པ་ནང་མི་རྣམས་ལ་ཡང་སྔར་བཞིན་བྱ་བ་ལམ་ལྷོང་ཡོང་བའི་ཐུགས་སྨོན་སྐྱབས་འཇུག་རྒྱ་ཆེ་གནང་རོགས་ཞུ་རྒྱུ་བཅས་ཨ་རུ་ནཱ་ཅལ་གྱི་མངའ་སྡེ་བློན་ཆེན་པདྨ་མཁའ་འགྲོ་ནང་མི་ཐུན་མོང་ནས་ཕྱི་ཟླ་ ༧ ཚེས་ ༡ ལ་ཕུལ།
༸གོང་ས་མཆོག་གི་དབུས་བླ་ཆེན་རྣམ་པར་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་འདས་པོའི་ནང་མི་ལྷན་རྒྱས་ནས་ཐུགས་རྗེ་ཆེ་ཞུའི་འཕྲིན་ཡིག་ཕུལ་བ།
གསར་གནས།
འབྲེལ་གནས།
