༢༠༡༡ ཟླ་ ༧ ཚེས་ ༡ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༧ ཚེས་ ༦ རེས་གཟའ་ལྷག་པའི་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་རྒྱལ་ས་ཝ་ཤིང་ཊོན་དུ་ཆིབས་སྒྱུར་བསྐྱངས་ཏེ་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༡ པ་དེ་སྩལ་གནང་མཛད་རྒྱུ་ཡིན་འདུག དེ་ཉིན་ཐོག་མར་མགོན་པོ་གང་ཉིད་མཆོག་གིས་བཀའ་ཆོས་མདོར་བསྡུས་ཤིག་སྩལ་རྒྱུ་དང་། དེ་རྗེས་༸གོང་ས་མཆོག་ཕྱི་ལུགས་ལྟར་དགུང་གྲངས་ ༧༦ ཕེབས་པའི་དགའ་སྟོན་རྟེན་འབྲེལ་གྱི་སྐུའི་འཁྲུངས་སྐར་མཛད་སྒོར་དབུ་ཞུགས་མཛད་རྒྱུ་ཡིན་འདུག
ཕྱི་ཚེས་ ༦ ནས་ ༨ བར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་རྣམ་གྲྭ་ཕན་བདེ་ལེགས་བཤད་གླིང་གི་དགེ་འདུན་པ་རྣམས་ཀྱིས་ས་ཆོག་དང་སྔོན་འགྲོའི་ཆོ་ག རྡུལ་མཚོན་དཀྱིལ་འཁོར་བཞེངས་གནང་མཛད་རྒྱུ་ཡིན་འདུག
ཕྱི་ཚེས་ ༩ ནས་ ༡༡ བར་མགོན་པོ་གང་ཉིད་མཆོག་གིས་སྔོན་འགྲོའི་བཀའ་ཆོས་སུ་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མ་དང་སློབ་དཔོན་ཀ་མ་ལ་ཤི་ལས་མཛད་པའི་སྒོམ་རིམ་བར་པ་བཅས་ཀྱི་ཆོས་འབྲེལ་སྩལ་གནང་མཛད་རྒྱུ་ཡིན་འདུག
ཕྱི་ཚེས་ ༩ ཉིན་སྔ་དྲོ་མགོན་པོ་གང་ཉིད་མཆོག་གིས་འཛམ་གླིང་ཞི་བདེ། ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་སྩལ་གནང་མཛད་རྒྱུ་དང་།
ཕྱི་ཚེས་ ༡༢ ཉིན་རྣམ་གྲྭ་ཕན་བདེ་ལེགས་བཤད་གླིང་གི་དགེ་འདུན་པ་རྣམས་ཀྱིས་དཔལ་དུས་ཀྱི་འཁོར་ལོའི་གར་ཆམ་གྱི་ཆོ་ག་གནང་རྒྱུ་དང་། ཕྱི་ཚེས་ ༡༣ ནས་ ༡༥ བར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་འཁོར་གྱི་དབང་དངོས་གཞི་དེ་སྩལ་གནང་མཛད་རྒྱུ་ཡིན་འདུག ཕྱི་ཚེས་ ༡༦ ཉིན་ཚེ་དབང་སྩལ་གནང་མཛད་རྗེས་མགོན་པོ་གང་ཉིད་མཆོག་ལ་བརྟན་བཞུགས་སྟར་འབུལ་ཞུ་རྒྱུ་ཡིན་འདུག
གོང་འཁོད་མཛད་འཕྲིན་རྣམས་གཟིགས་བློ་ཡོད་ཚེ་ (www.dalailama.com) དྲ་རྒྱའི་ཐོག་ཐད་ཀར་རྒྱང་སྲིང་ཞུ་རྒྱུ་ཡིན་འདུག་པས་ཚང་མས་དེ་དོན་དགོངས་འཇགས་ཞུ།།
