༢༠༡༡ ཟླ་ ༦ ཚེས་ ༢༠ རེས་གཟའ་ཟླ་བ།དཀར་མཛེས་རྫོང་ཐོག་ཏུ་ཞི་རྒོལ་བྱས་པ།
༄༅། །འདི་གར་སེར་བྱེས་ཏྲེ་ཧོར་དགེ་འདུན་པདྨ་ཚེ་དབང་ལགས་ཀྱིས་ཕྱི་ལོ་ ༢༠༡༡ ཟླ་ ༦ ཚེས་ ༢༠ ཉིན་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༦ ཚེས་ ༡༩ རེས་གཟའ་ཉི་མའི་ཉིན་དཀར་མཛེས་རྫོང་ཉི་མོ་དགེ་ཚུལ་དགོན་གྱི་བཙུན་མ་བྱམས་ཕྲུག་སྒྲོལ་མ་དང་། སྒྲོལ་མ་དཔལ་མོ་གཉིས་ཀྱིས་དཀར་མཛེས་རྫོང་ཐོག་ཏུ་ཞི་རྒོལ་བྱས་པར་བརྟེན། རྒྱ་ནག་གཞུང་གི་དྲག་ཆས་ཉེན་རྟོག་པ་དང་། དམག་མིས་ཁོང་གཉིས་ལ་ཉེས་རྡུང་ཚད་མེད་གཏོང་བཞིན་འཛིན་བཟུང་བཙོན་འཇུག་བྱས་འདུག
བཙུན་མ་བྱམས་ཕྲུག་སྒྲོལ་མ་ནི། སྐྱེས་ཡུལ་ཟི་ཁྲོན་ཞིང་ཆེན་དཀར་མཛེས་རྫོང་། ལྷོ་པ་ཤང་། གྲོང་གཞུང་ནང་གྲོང་ཚོ་ནས་ཡིན་ཞིང། ཕ་ཡ་མ་ཕུན་ཚོགས་དང་། མ་བཀྲ་ཤིས་ལྷ་མོ་གཉིས་སུ་སྐྱེས་པ་དང་། ད་སྐབས་ཁོང་རང་ལོ་ ༢༠ ཡས་མས་ཤིག་ཡིན་འདུག
དེ་བཞིན་རང་ལོ་ ༢༠ ཟིན་ལ་ཉེ་བའི་བཙུན་མ་སྒྲོལ་མ་དཔལ་མོ་ནི། སྐྱེས་ཡུལ་དཀར་ མཛེས་རྫོང་། ལྷོ་པ་ཤང་། ལྭ་སྒང་སྟེང་གྲོང་ཚོ་ནས་ཡིན་ཞིང། ཁོང་གིས་ཕ་མ་གཉིས་སྔོན་མ་ནས་འདས་གྲོངས་གྱུར་འདུག
ད་ལྟའི་ཆར་ཁམས་དཀར་མཛེས་ཁུལ་བོད་མི་ཚོས་ཞི་བའི་རྔམ་སྟོན་ཁྲོམ་སྐོར་གནང་བཞིན་པར་རྒྱ་ནག་གཞུང་ཕྱོགས་ནས་དམ་བསྒྲགས་ཤུགས་ཆེན་བྱེད་མུས་ཡིན།
ཕྱི་ཚེས་ ༡༨ ཉིན་ནས་དཀར་མཛེས་ཁུལ་ཉ་རྒྱས་བཙུན་དགོན་གྱི་གཙོས་ཞི་རྒོལ་བ་དགེ་བཙུན་རྣམས་ཀྱི་བཞུགས་གནས་དགོན་སྡེ་ཁག་ནང་རྒྱ་མིའི་དྲག་ཆས་ཉེན་རྟོག་པ་བཙན་འཛུལ་གྱིས་ཤག་ཁང་ནང་གང་བྱུང་སྔོག་བཤེར་བྱས་དང་བྱེད་བཞིན་པ་མ་ཟད། དགེ་བཙུན་རྣམས་ཀྱི་ལག་ཐོགས་ཁ་པར་དང། ཁྱིམ་སྤྱོད་ཁ་པར་སོགས་ཀྱི་ཨང་གྲངས་ལ་ཞིབ་བཤེར་གྱིས་ཐོ་འགོད་བྱས་པ་སོགས། ལས་འགུལ་འདྲ་མིན་སྣ་ཚོགས་ཤིག་སྤེལ་བཞིན་འདུག་པ་བཅས།