༢༠༡༡ ཟླ་ ༦ ཚེས་ ༢༧ རེས་གཟའ་ཟླ་བ།
༄༅། །འདི་གར་ཆབ་སྲིད་བཙོན་ཟུར་དོན་འགྲུབ་བཀྲིས་ལགས་ཀྱིས་ཁུངས་ལྡན་གྱི་གནས་ཚུལ་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༦ ཚེས་ ༢༦ ཉིན་བོད་ཁམས་དཀར་མཛེས་རྫོང་མདའ་མདོ་ཤང་གི་བུད་མེད་བདེ་དབང་དང་དཔའ་མོ་གཉིས་ཀྱིས་དཀར་མཛེས་རྫོང་ཐོག་གི་ཁྲོམ་གཞུང་དུ་༼བོད་རང་བཙན་གཙང་མ་ཡིན། ༸རྒྱལ་བ་རིན་པོ་ཆེ་མཆོག་སྐུ་ཚེ་ཁྲི་ལོར་བརྟན་པ་ཤོག ༸རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས༽ཞེས་སོགས་ཀྱི་སྐད་འབོད་བྱས་པ་དང་ལྷན་བོད་དོན་དྲིལ་བསྒྲགས་ཀྱི་ནང་དོན་འཁོད་པའི་ཡིག་ཆ་གནམ་ལ་གཏོར་ནས་ཞི་བའི་སྐད་འབོད་བྱེད་སྐབས། རྒྱ་གཞུང་གི་ཉེན་རྟོག་མི་སྣ་འབྱོར་ཏེ་འཛིན་བཟུང་བྱས་འདུག
བདེ་དབང་གི་ཕ་མིང་ལ་མཁོ་སྒྲུབ་དང་མ་མིང་ལ་བསོད་ནམས་དབྱངས་ཅན་བརྗོད་ཀྱི་འདུག དེ་བཞིན་དཔའ་མོའི་ཕ་མིང་ལ་དགྲ་འགུལ་དང་མ་མིང་ལ་རིན་ཆེན་སྒྲོལ་མ་བརྗོད་ཀྱི་འདུག དཔའ་མོའི་ཕ་དམ་པ་སངས་རྒྱས་བཀྲ་ཤིས་སམ༼དགྲ་འགུལ༽ལགས་ཀྱིས་ཕྱི་ལོ་ ༢༠༠༨ ལོར་དཀར་མཛེས་རྫོང་ཐོག་ཏུ་ཞི་རྒོལ་གྱི་སྐད་འབོད་ཤུགས་ཆེ་བྱས་རྐྱེན་རྒྱ་ནག་གཞུང་གིས་འཛིན་བཟུང་བྱས་རྗེས་ཕལ་ཆེར་ལོ་དྲུག་གི་ཁྲིམས་ཐག་བཅད་དེ་ད་ལྟའང་རྒྱ་སྡེ་ཁྲིན་ཏུའུ་མན་ཡང་བཙོན་ཁང་དུ་གནས་མུས་ཡིན་འདུག
སངས་རྒྱས་བཀྲིས་སམ་༼དགྲ་འགུལ༽ལགས་ཀྱི་གཅུང་པོའམ་བཙུན་པ་བསོད་ནམས་དངོས་གྲུབ་ཀྱང་དེ་སྔོན་ལོ་མང་རིང་བཙོན་དུ་ཚུད་དེ་ཉེ་སྔོན་གློད་བཀྲོལ་ཐོབ་ནས་ལོ་ངོ་གཉིས་ཙམ་སོང་ཡོད་པ་དང་། ཁོང་གློད་བཀྲོལ་ཐོབ་སྐབས་ལུས་པོ་གཅོང་ནད་ཅན་དུ་གྱུར་ཡོད། ད་ལྟའི་ཆར་སངས་རྒྱས་བཀྲིས་ཀྱི་ནང་དུ་ཤུགས་ལས་བྱེད་མཁན་ཁྱིམ་གྱི་མནའ་མ་ཁོ་ན་ལས་མེད་པ་མ་ཟད། གཞན་ཡང་ཕྲུ་གུ་ཆུང་ཆུང་དང་གཅོང་ནདཅན་དུ་གྱུར་བའི་བཙུན་པ་བསོད་ནམས་དངོས་གྲུབ་བཅས་ལ་གཡོག་བྱེད་དགོས་ཀྱི་ཡོད། དེ་བཞིན་དགྲ་འགུལ་གྱི་ཁྱིམ་གྱི་ས་ཞིང་ཡོངས་རྫོགས་གྲོང་པ་ཁྱིམ་མཚེས་ཚོས་རོགས་སྐྱོར་འོག་འདེབས་ལས་བྱེད་བཞིན་ཡོད་པ་དང་། དེང་སྐབས་ཁོང་ལ་ཡ་ང་བའི་གནས་སྟངས་དེའི་འོག་དཀའ་ངལ་མང་དག་ཅིག་འཕྲད་དང་འཕྲད་མུས་ཡིན་འདུག་པ་བཅས། །