༢༠༡༡ ཟླ་ ༦ ཚེས་ ༧ རེས་གཟའ་མིག་དམར།
༄༅། །སུད་སི་བོད་གཞུང་དོན་གཅོད་ཁང་གི་འགྲོ་བ་མིའི་ཐོབ་ཐང་འབྲེལ་མཐུད་པ་བསྟན་འཛིན་བསམ་འཕེལ་ལགས་ཀྱིས་ཕྱི་ལོ་ ༢༠༡༡ ཟླ་ ༦ ཚེས་ ༣ ཉིན་སུད་སིའི་གྲོང་ཁྱེར་འཇི་ནི་ཝའི་ནང་འཚོགས་བཞིན་པའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་བཅུ་བདུན་པའི་ཐོག་རྒྱལ་ཚོགས་ཀྱི་ངོས་ནས་བོད་ནང་རྒྱ་ནག་གཞུང་གི་སྡུག་སྦྱོང་སྣ་ཚོགས་མྱངས་དང་མྱོང་བཞིན་པའི་ཆབ་སྲིད་བཙོན་པ་རྣམས་སྐྱོབ་གནང་ཡོང་བའི་འབོད་སྐུལ་ཞུས་འདུག
དེ་ཡང་གོང་ཚེས་ཉིན་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཉིན་ལྔ་པའི་ལས་རིམ་དུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་གཏམ་བཤད་རང་དབང་ཐོག་ཆེད་ལས་ཞིབ་འཇུག་པ་ཞིག་གིས་ཕྱི་ལོ་ ༢༠༡༠ ཟླ་ ༣ ནས་ ༢༠༡༡ ཟླ་ ༣ བར་གྱི་ལོ་འཁོར་སྙན་ཐོ་ཞིག་ཕུལ་འདུག ལོ་འཁོར་སྙན་ཐོ་དེའི་ནང་བོད་ཀྱི་ཆབ་སྲིད་བཙོན་པ་འཇིགས་མེད་རྒྱ་མཚོ་ལགས་དང་བོད་ཀྱི་གློག་བརྙན་འཇིགས་བྲལ་གྱི་བཟོ་སྐྲུན་པ་དོན་གྲུབ་དབང་ཆེན་ལགས་གཉིས་རྒྱ་ནག་གཞུང་གི་བཙོན་ཁང་དུ་སྡུག་སྦྱོང་མྱངས་དང་མྱོང་མུས་ཡིན་པའི་ཞིབ་ཕྲའི་གནས་ཚུལ་བཀོད་ཡོད་པ་མ་ཟད། སྙན་ཐོ་དེ་བརྒྱུད་རྒྱལ་ཚོགས་ཀྱི་ངོས་ནས་ཁོང་རྣམ་པའི་གནད་དོན་ཐོག་ངེས་པར་དུ་དགོངས་བཞེས་གནང་དགོས་པའི་འབོད་སྐུལ་ཞུས་འདུག དེ་བཞིན་བོད་ཀྱི་ཆབ་སྲིད་བཙོན་པ་ཁོང་རྣམ་པ་གཉིས་ཀྱིས་གཙོས་བོད་མདོ་དབུས་ཁམས་གསུམ་ནང་ཡོད་པའི་བོད་ཀྱི་ཆབ་སྲིད་བཙོན་པ་གཞན་རྣམས་ལའང་དེ་མཚུངས་ཀྱི་དགོངས་བཞེས་གནང་སྐྱོང་ཡོང་བའི་འབོད་སྐུལ་ཞུས་འདུག་པ་བཅས། །