༢༠༡༡ ཟླ་ ༦ ཚེས་ ༢ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༦ ཚེས་ ༢ ཉིན་རྡ་ས་བཞུགས་སྒར་དབུས་སྨན་རྩིས་ཁང་གི་མཐོ་སློབ་ཚོགས་ཁང་དུ་བོད་གཞུང་སྨན་རྩིས་མཐོ་སློབ་ཁང་དབུ་བརྙེས་ནས་ལོ་ངོ་ལྔ་བཅུ་འཁོར་བའི་དུས་དྲན་སྲུང་བརྩི་ཞུས་པ།
དེ་ཉིན་སྔ་དྲོ་ཆུ་ཚོད་ ༡༡།༣༠ ཐོག་སྐུ་མགྲོན་གཙོ་བོ་དཔལ་རྒྱལ་བ་ཀརྨ་པ་རིན་པོ་ཆེ་མཆོག་དང་། བཀའ་ཁྲི་རིན་པོ་ཆེ་མཆོག་གིས་དབུས་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། དབུས་སྨན་རྩིས་ཁང་གི་ངེས་སྟོན་པ་ཚེ་དབང་རྟ་མགྲིན་ལགས་ཀྱིས་གཙོས་སྨན་རྩིས་ཁང་གི་ཚན་པ་ཁག་གི་འགན་འཛིན་རྣམ་པ། སྨན་པ་དང་སྨན་རྩིས་སློབ་མ་རྣམ་པ། བདེ་ལེགས་སྨན་ཁང་གི་འགན་འཛིན་རྣམ་པ། སློབ་གྲྭ་ཁག་གི་སློབ་སྤྱི་དང་ཕྱི་རྒྱལ་མཐོ་སློབ་ཁག་གི་སྐུ་མགྲོན་སློབ་དཔོན་ཁག་གཅིག་བཅས་ཁྱོན་མི་གྲངས་ ༢༠༠ བརྒལ་བ་ལྷན་འཛོམས་ཀྱིས་ཐོག་མར་གཡུ་ཐོག་གསོལ་འདེབས་བཏོན་རྗེས་གསོལ་ཇ་འབྲས་སིལ་ཕུལ། དེ་ནས་སྨན་རྩིས་ཁང་གི་ངེས་སྟོན་པ་དང། སྨན་རྩིས་མཐོ་སློབ་ཀྱི་སློབ་སྤྱི་བསྟན་པ་ཆོས་འཕེལ་ལགས། ་སྨན་རྩིས་མཐོ་སློབ་ཀྱི་སློབ་སྤྱི་གཞོན་པ་སྨན་པ་མཁྱེན་རབ་རྒྱ་མཚོ་ལགས་བཅས་ཀྱིས་རྒྱལ་བ་ཀརྨ་པ་རིན་པོ་ཆེ་མཆོག་ལ་རྟེན་གསུམ་འདེགས་འབུལ་ཞུས་རྗེས་སྣང་གསལ་ཞལ་ཕྱེ་གནང་གྲུབ་བསྟུན་སློབ་སྤྱིས་དུས་ཆེན་ངོ་སྤྲོད་དང་འབྲེལ་ལས་བསྡོམས་སྒྲོགས་སྦྱང་གནང། དེ་རྗེས་སྨན་རྩིས་མཐོ་སློབ་ཁང་ནས་དཔར་སྐྲུན་ཟིན་པའི་དཔེ་དེབ་ཁག་གསུམ་འཕྲོད་བསྟེན་བཀའ་བློན་དཔལ་འབྱོར་ཚེ་རིང་མཆོག་གིས་དབུ་འབྱེད་གནང་མཚམས་གངས་རིའི་ལང་ཚོའི་དུས་དེབ་རྩོམ་སྒྲིག་ཚོགས་ཆུང་གི་
ཚོགས་མི་དང་རྩོམ་ཡིག་ལེགས་གྲས་དྲུག་ལ་བཀའ་ཁྲི་མཆོག་གི་བྱ་དགའ་གནང་། དེ་ནས་སྨན་རྩིས་ཁང་གི་ངེས་སྟོན་པས་གསུང་བཤད་གནང་རྗེས་བཀའ་ཁྲི་ཟམ་གདོང་རིན་པོ་ཆེ་མཆོག་གིས་སྨན་རྩིས་མཐོ་སློབ་དང་སློབ་ཐོན་སློབ་མ་རྣམས་ཀྱི་ལག་འཁྱེར་ཁྲིམས་མཐུན་ཞུ་དགོས་སྐོར་གསུང་བཤད་གནང་དོན། ང་ཚོ་རྒྱ་གར་ལ་བསླེབས་ནས་ལོ་ངོ་ ༥༠ ཡན་མན་རིང་རྒྱ་གར་ནང་དུའང་རྒྱ་གར་གྱི་ཚིག་དེ་དག་དང་བོད་པའི་གསོ་བ་རིག་པ་གཉིས་པོ་རིག་གནས་ཐ་དད་ཡིན་པ་གསལ་པོ་བཟོ་མ་ཐུབ་པར་ལྷག་པ་རེད། འདས་པའི་ལོ་ཤས་ནང་ཝར་ཎ་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་ནས་ཐུགས་འགན་རྐང་བཞེས་གནང་བ་ལྟར། རྒྱ་གར་གཞུང་གི་འབྲེལ་ཡོད་ལས་ཁུངས་ཁག་ནས་མཐུན་འགྱུར་གནང་བར་བརྟེན། རྒྱ་གར་གཞུང་གི་ཁྲིམས་མཐུན་གྱི་ཐོག་ནས་བོད་ཀྱི་གསོ་བ་རིག་པ་དེ་ཐུན་མོང་མ་ཡིན་པའི་རིག་གཞུང་ཡིན་པ་དང། རྒྱ་གར་ལ་ཁུངས་གཏུགས་ནའང་རྒྱ་གར་གྱི་ཚིག་དེ་དག་དང་གཅིག་གྱུར་མིན་པ་ཟུར་དུ་ངོས་འཛིན་ཐོབ་སྟེ། རྒྱལ་སྤྱིའི་ནང་བོད་ཀྱི་གསོ་བ་རིག་པ་ཡར་རྒྱས་འགྲོ་རྒྱུར་ཕན་ཐོགས་བྱུང་ཡོད། གལ་ཏེ་ཁྲིམས་མཐུན་ངོས་འཛིན་འདི་ལྟར་ཐོབ་མེད་ན། བོད་ནང་གསོ་བ་རིག་པའི་སློབ་སྦྱོང་དར་ཁྱབ་ཆེན་པོ་བྱུང་ཡོད་པ་དེ་བོད་པའི་རིག་གནས་ཀྱི་ངོ་བོར་མ་གནས་
པར་རྒྱ་ནག་གི་རིག་གནས་ངོ་བོར་བརྩི་རྒྱུ་དང་། རྒྱལ་སྤྱིའི་ནང་སྨན་གྱི་ཐོན་སྐྱེད་ཀྱང་རྒྱ་སྨན་གྱི་ཁྱབ་ཁོངས་སུ་འགྲོ་རྒྱུའི་གནས་སྟངས་ཤིག་རེད། རིག་གནས་འདི་རྒྱ་གར་གྱི་རིག་གནས་མིན་པར་བོད་པའི་ཐུན་མིན་གྱི་རིག་གནས་ཤིག་ཡིན་པ་གསལ་པོ་ཆགས་པ་དེ་ཆབ་སྲིད་ཀྱི་དོན་སྙིང་དང་ལྡན་པ་བྱུང་ཡོད། རྒྱ་གར་གྱི་ཁྲིམས་ཐོག་ནས་གསོ་བ་རིག་པར་ངོས་འཛིན་ཐོབ་ཟིན་པར་བརྟེན། ད་ཆ་མཐོ་སློབ་འདི་ཡང་རྒྱ་གར་གྱི་གཙུག་ལག་སློབ་གཉེར་ཁང་གི་སྒྲིག་འཛུགས་ནང་ངོས་འཛིན་ཡོད་པ་ཞིག་དང། མཐོ་སློབ་འདི་ནས་ཐོན་པའི་སྨན་པ་ཁག་གི་ལག་འཁྱེར་དེ་དག་རྒྱ་གར་སྤྱི་ཡོངས་ཀྱི་གཙུག་ལག་སློབ་ཁང་གི་སྒྲིག་འཛུགས་ཀྱི་ངོས་ནས་ངོས་འཛིན་ཡོད་པའི་ལག་འཁྱེར་གནང་ཐུབ་པ་བྱེད་རྒྱུ་གལ་ཆེན་པོ་ཡིན། ཞེས་སོགས་ཀྱི་གསུང་བཤད་གནང་།
དེ་རྗེས་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་མཛད་སྒོར་ཕེབས་མི་ཚང་མར་འཚམས་འདྲི་ཞུས་པ་དང་ཆབས་ཅིག་དེ་སྔ་སྨན་རྩིས་ཁང་དབུ་བརྙེས་ཏེ་ལོ་ངོ་ ༥༠ འཁོར་བའི་མཛད་སྒོའི་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་པ་དེ་དག་མུ་མཐུད་མཇུག་སྐྱོང་དང་ལག་ལེན་འཁེལ་བ་བྱེད་རྒྱུ་གལ་ཆེན་པོ་ཡིན་པ། དེ་བཞིན་སྨན་རྩིས་སློབ་མ་རྣམས་ནས་སོ་སོའི་དགེ་རྒན་ལ་གུས་བརྩི་དང་། དུས་ཚོད་དམ་འཛིན་གྱིས་སློབ་སྦྱོང་ཡག་པོ་བྱེད་དགོས་པ་སོགས་ཀྱི་གསུང་བཤད་གནང་ཡོད།
དེ་ནས་རྒྱལ་བ་ཀརྨ་པ་རིན་པོ་ཆེ་མཆོག་གིས་འདས་པའི་ལོ་ངོ་ ༥༠ ནས་སྨན་རྩིས་སློབ་མ་གང་ཙམ་སྐྱེད་སྲིང་བྱེད་ཐུབ་པ་དང། སློབ་མ་དེ་ཚོ་བརྒྱུད་རང་གཞན་ལ་ཕན་པ་ཇི་ལྟར་བསྒྲུབས་ཡོད་པ་དེ་ཕྱོགས་གཅིག་ནས་ང་ཚོས་སྤོབས་པ་སྐྱེས་འོས་པ་དང། ཕྱོགས་གཞན་ཞིག་ནས་ང་ཚོས་དེ་ལ་ཆོག་ཤེས་བྱས་ཏེ་སྡོད་རྒྱུ་མེད། ལྷག་པར་དུས་ཚོད་མགྱོགས་པོ་འགྲོ་གི་ཡོད་པ་མ་ཟད། བོད་པའི་ཆོས་དང་རིག་གཞུང་གི་གནས་སྟངས་ཛ་དྲག་གི་གནས་སུ་གྱུར་ཡོད་པར་བརྟེན། ང་ཚོ་བློ་འཚབ་ཆེ་རུ་འགྲོ་དགོས་རྒྱུ་དང། ང་ཚོའི་ལས་ཀའི་མྱུར་ཚད་མགྱོགས་སུ་གཏོང་དགོས་པའི་དུས་ཚོད་ཞིག་ལ་བབས་ཡོད། ཅེས་སོགས་ཀྱིས་གསུང་བཤད་གནང་ཡོད། དེ་རྗེས་སློབ་སྤྱི་གཞོན་པ་སྨན་རམས་པ་མཁྱེན་རབ་རྒྱ་མཚོ་ལགས་ཀྱིས་ཐུགས་རྗེ་ཆེ་ཞུས་ཏེ་མཁྱེན་པའི་རང་གཟུགས་ཀྱི་ཤིས་སྨོན་འདོན་བཞིན་མཛད་སྒོ་རྒྱལ་ཁའི་ངང་གྲོལ་བ་བཅས།།།
