༢༠༡༡ ཟླ་ ༦ ཚེས་ ༢༡ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༦ ཚེས་ ༢༣ ནས་ ༣༠ བར་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་ལ་དྭགས་སླེ་དང་བྱང་ཐང་ཁུལ་གཞུང་འབྲེལ་འཚམས་གཟིགས་གནང་གཏན་འཁེལ་ཡོད།  དེ་ཡང་འདི་ཟླའི་ཕྱི་ཚེས་ ༢༣ བཀའ་ཁྲི་མཆོག་རྡ་ས་ནས་ཕེབས་ཐོན་གྱིས་ཕྱི་ཚེས་ ༢༤ ཉིན་ལ་དྭགས་སླེ་རུ་ཕེབས་འབྱོར་གནང་རྒྱུ། ཕྱི་ཚེས་ ༢༥ ཉིན་བསོད་ནམས་གླིང་མི་མང་གི་ཚོགས་ཆེན་ཐོག་གསུང་བཤད་གནང་རྒྱུ་མ་ཟད། དེ་ཉིན་ས་གནས་འགོ་འཛིན་གྱིས་གཙོས་མཉམ་སྦྲེལ་འགན་འཛིན་དང། ས་འཐུས། བོད་ཁྱིམ་དབུ་འཛིན། སློབ་སྤྱི་བགྲེས་གཞོན། རྒྱ་བོད་སྨན་ཁང་ཁག་གི་འགན་འཛིན། རང་བདེན་ཚོགས་ཆུང་གི་ཚོགས་གཙོ། གཞོན་ནུ། བུད་མེད། སྤྱི་དཔོན་བཅས་མཉམ་འཛོམས་ཐོག་བཞུགས་མོལ་ཚོགས་འདུ་འཚོགས་རྒྱུ་ཡིན་འདུག  ཕྱི་ཚེས་ ༢༦ ཉིན་ལ་དྭགས་མཚན་ཉིད་སློབ་གྲྭའི་གོ་སྒྲིག་ཐོག་བཀའ་ཁྲི་མཆོག་གིས་སླེ་ཇོ་ཁང་དུ་ལ་དྭགས་མང་ཚོགས་ལ་གསུང་བཤད་གནང་རྒྱུ་དང་། ཕྱི་ཚེས་ ༢༧ ཉིན་བྱང་ཐང་ཉི་མའི་མི་མང་དང་དགེ་ལས་སློབ་ཕྲུག་རྣམས་ལ་གསུང་བཤད་གནང་རྒྱུ། དེ་བཞཱིན་ལ་བྱང་ཧེལ་ལེ་དང། བཀག་གཞུང་། རྒུད་ཡུལ། ཉི་མ་བཅས་ཀྱི་འགོ་བ་དང། འཐུས་མི། སློབ་གྲྭའི་དགེ་རྒན་ལས་བྱེད་བཅས་ལྷན་འཛོམས་ཐོག་བཞུགས་མོལ་ཚོགས་འདུ་འཚོགས་རྒྱུ་དང། ཕྱོགས་མཚུངས་ལ་བྱང་གསུམ་མདོའི་མི་མང་དང་དགེ་ལས་སློབ་ཕྲུག་རྣམས་ལ་གསུང་བཤད་གནང་རྒྱུ་ཡིན་འདུག
ཕྱི་ཚེས་ ༢༩ ཉིན་སླེ་བོད་ཁྱིམ་དང་མཚན་ཉིད་སློབ་གྲྭའི་དགེ་ལས་སློབ་ཕྲུག་ཡོངས་ལ་གསུང་བཤད་གནང་རྗེས་ ཕྱི་ཚེས་ ༣༠ ཉིན་སླེ་ནས་ལྡི་ལི་བརྒྱུད་རྡ་སར་ཕེབས་འབྱོར་གནང་རྒྱུ་ཡིན་འདུག་པ་བཅས།།