༢༠༡༡ ཟླ་ ༦ ཚེས་ ༡༣ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༦ ཚེས་ ༡༢ ཉིན་གྱི་སྔ་དྲོ་ཐོག་མར་༸གོང་ས་༸སྐྱབས་མགོན་ཆེན་པོ་མཆོག་གིས་ཨོ་སི་ཊོ་ལི་ཡའི་ནང་གནས་སྡོད་བོད་རིགས་དང་རྒྱ་རིགས། འབྲུག་པ་བཅས་ལ་མཇལ་ཁ་དང་བཀའ་སློབ་སྩལ་དོན། ད་ཆ་ང་ཚོས་ནང་ཆོས་ལ་དད་པ་ཙམ་གྱི་མི་ཆོག་པར་ནང་ཆོས་ལ་སློབ་སྦྱོང་བྱས་ནས་ནང་ཆོས་ཀྱི་གོ་དོན་ཆ་ཚང་ཤེས་པའི་ཐོག་ནས་དུས་རབས་ ༢༡ ནང་པ་ཞིག་བྱེད་ཐུབ་དགོས་ཞེས་སོགས་ཀྱི་བཀའ་སློབ་སྩལ་ཡོད་པ་མ་ཟད། གཞན་ཡང་སྐབས་དེར་བོད་རིགས་ཚོར་བཀའ་སློབ་སྩལ་དོན། ང་ཚོ་བཙན་བྱོལ་དུ་འབྱོར་དགོས་དོན་ནི་རང་གི་ལུང་པར་འབྱུང་བའི་གོད་ཆག་དང་ནང་འཁྲུག་ཤོར་ནས་ཡོང་དགོས་བྱུང་བ་ཞིག་མིན་པར་ཕྱི་ནས་ང་ཚོར་བཙན་འཛུལ་བྱས་པར་བརྟེན་བཙན་བྱོལ་དུ་ཡོང་དགོས་ཆགས་པ་རེད། དེར་བརྟེན་ང་ཚོས་སོ་སོའི་ཕ་མེས་ནས་ཡོད་པའི་བོད་ཀྱི་སྐད་ཡིག་དང་ནང་ཆོས།
ཨོ་སི་ཊོ་ལི་ཡའི་ཕྱི་སྲིད་བློན་ཆེན་ཟུར་པ་མཆོག་དང་ལྷན།
དེ་དང་འབྲེལ་ནས་ཐུན་མིན་ལེགས་བྱང་ཕྱུག་པོ་ཡོད་པ་དེ་དག་གཅེས་འཛིན་བྱེད་རྒྱུ་ཧ་ཅང་གལ་ཆེན་པོ་ཡིན་དེ་ནི་ང་ཚོའི་འགན་ཞིག་ཀྱང་ཆགས་ཡོད་ཅེས་བཀའ་སློབ་སྩལ་ཡོད། དེ་བཞིན་མགོན་པོ་གང་ཉིད་མཆོག་གིས་ཆབ་སྲིད་ཀྱི་སྐུ་དབང་མི་མང་གིས་འོས་འདེམས་བྱས་པའི་འཛིན་སྐྱོང་དང་གྲོས་ཚོགས་སོགས་ལ་རྩིས་སྤྲོད་མཛད་པ་དེར་མང་ཚོགས་ཀྱི་སེམས་འཚབ་བྱེད་དགོས་དོན་གང་ཡང་མེད་སྐོར་དང་། ༸གོང་ས་མཆོག་གིས་དེ་ལྟར་མཛད་པ་དེས་མ་འོངས་བོད་མི་ཚོའི་མདུན་ལམ་ཆེད་དགོངས་བཞེས་མཛད་པ་ཞིག་ཡིན་པ་ལས་བོད་ཀྱི་རྩ་དོན་ཡལ་བར་དོར་རྒྱུའི་དགོངས་བཞེས་རྩ་བ་ནས་མཛད་ཀྱི་མེད་སྐོར་སོགས་ཀྱི་བཀའ་སློབ་སྩལ་གྲུབ་བསྟུན། ༸གོང་ས་མཆོག་གིས་སྤྱོད་འཇུག་གི་ཆོས་འབྲེལ་མུ་མཐུད་བཀའ་དྲིན་བསྐྱངས།
ཉིན་གུང་ལྗགས་སྨིན་སྐབས་མགོན་པོ་གང་ཉིད་མཆོག་གིས་རྒྱ་རིགས་གཞོན་སྐྱེས་དང་ནང་པ།
བོད་རྒྱ་འབྲུག་གསུམ་གྱི་དད་ལྡན་ཚོར་བཀའ་སློབ་སྩོལ་བཞིན་པ།
དེ་བཞིན་རྒྱ་རིགས་མང་གཙོ་དོན་གཉེར་བ་རྣམས་ལ་མཇལ་ཁ་སྩལ་བ་མ་ཟད་ད་དུང་མགོན་པོ་གང་ཉིད་མཆོག་ཐུགས་དགྱེས་ཚོར་ཆེན་པོས་བཀའ་སློབ་སྩལ་ཡོད། རྒྱ་རིགས་ཚོགས་བཅར་བ་མང་ཆེ་བ་ཨོ་སི་ཊོ་ལི་ཡའི་གྲོང་ཁྱེར་མེལ་བྷོན་ནང་རྟེན་གཞི་བྱས་པའི་རྒྱ་བོད་མི་རིགས་མཐུན་སྒྲིལ་ཚོགས་པའི་ཚོགས་མི་ཡིན་པ་མ་ཟད། རྒྱ་བོད་མི་རིགས་མཐུན་སྒྲིལ་ཚོགས་པ་དེ་ནི་༸གོང་ས་༸སྐྱབས་མགོན་ཆེན་པོ་མཆོག་གིས་ཚོགས་པ་དེ་འདྲ་ཞིག་འཛུགས་ཐུབ་ན་དགེ་མཚན་ཆེན་པོ་ཡོད་སྐོར་བཀའ་སློབ་ཕེབས་པ་ལྟར་བཙུགས་པ་ཞིག་ཡིན་འདུག སྐབས་དེར་མགོན་པོ་གང་ཉིད་མཆོག་གིས་རྒྱ་མི་རིགས་ཚོས་ཕེབས་
བསུའི་སྣེ་ལེན་གཟབ་རྒྱས་ཞུས་པར་ཐུགས་དགྱེས་ཚོར་ཆེན་པོ་མཛད་ཡོད་པ་དང། ལྷག་པར་ཚོགས་བཅར་བ་རྒྱ་རིགས་བུད་མེད་ཁག་གཅིག་གིས་བོད་སྐད་ཐོག་གཤིས་བརྗོད་སྨོན་ལམ་བཏོན་པར་མགོན་པོ་གང་ཉིད་མཆོག་སྐུ་གཞོན་ནུའི་དུས་སུ་སྨོན་ལམ་དེ་ཉིན་ལྟར་འདོན་གནང་མཛད་ཀྱི་ཡོད་པ་ཐུགས་དྲན་གསོ་མཛད། ཕྱོགས་མཚུངས་རྒྱ་རིགས་ཚོར་བཀའ་སློབ་སྩལ་དོན།
རྒྱ་བོད་མི་རིགས་གཉིས་ཀྱི་འབྲེལ་བ་དེ་ལོ་ངོ་ ༡༠༠༠ ལྷག་ཕྱིན་པའི་ལོ་རྒྱུས་ཤིག་ཆགས་ཡོད། ནང་ཆོས་ལྟ་བུར་མཚོན་ན་བོད་ནང་དུ་ནང་ཆོས་མ་དར་བའི་ལོ་མང་པོའི་གོང་ནས་རྒྱ་ནག་ནང་དར་ཚར་བ་རེད། དེར་བརྟེན་རྒྱ་རིགས་ཚོ་བཅོམ་ལྡན་འདས་ཀྱི་དགེ་ཕྲུག་རྒན་པ་དང་ང་ཚོ་དགེ་ཕྲུག་གཞོན་པ་རེད། ཆབ་སྲིད་ཐོག་ནས་བརྗོད་ན་ང་ཚོ་ཕྱོགས་གཉིས་ཀས་གྲོས་མོལ་དང་གཉིས་སྨན་གྱི་ཐོག་ནས་དཀའ་ངལ་སེལ་དགོས་པ་ཞིག་ཡིན། དེར་བརྟེན་ང་ཚོས་རྒྱ་ནག་དང་ཁ་བྲལ་གྱི་རང་བཙན་མ་རྩོད་པར་བོད་མི་ཚོར་མིང་དོན་མཚུངས་པའི་རང་སྐྱོང་གི་གནས་བབ་ཞིག་ཐོབ་རྒྱུར་འབད་བརྩོན་བྱེད་བཞིན་ཡོད། བོད་མིའི་མང་གཙོའི་སྲིད་གཞུང་ཚད་དང་ལྡན་པ་ཞིག་ཡོང་ཆེད་ངོས་རང་ཆབ་སྲིད་དབུ་ཁྲིད་ཀྱི་འགན་དབང་ནས་རྒན་ཡོལ་ཆ་ཚང་ཞུས་པར་བརྟེན་ད་ཆ་རྒྱ་ནག་དམར་ཤོག་དབུ་ཁྲིད་ཚོས་ཀྱང་ལོ་ངོ་ ༦༠ ཙམ་ཆབ་སྲིད་འཛིན་སྐྱོང་བྱས་རྗེས་རྒས་ཡོལ་ཞུ་རྒྱུའི་དུས་ལ་བབ་ཡོད། རྒྱ་ནག་དེ་བཞིན་རྒྱལ་ཁབ་ཆེན་པོ་ཞིག་ཡིན་པར་བརྟེན་རྒྱ་ནག་ནང་མང་གཙོའི་བཅོས་བསྒྱུར་དེ་ཉིན་མ་གཅིག་ལ་ཡོང་རྒྱུ་དེ་འདྲ་མིན་པར་བརྟེན། མང་གཙོའི་ཕྱོགས་སུ་གོམ་པ་ག་ལེར་སྤོ་རྒྱུ་དེ་གལ་ཆེན་པོ་ཆགས་ཡོད། གོམ་པ་དང་པོ་དེ་གཞུང་གི་འཛིན་སྐྱོང་ལམ་ལུགས་དེ་ཕྱི་གསལ་ནང་གསལ་བཟོ་རྒྱུ་དེ་ཡིན་པ་དང་།
དེ་ནས་གསར་འགྱུར་དང་གསར་འགོད་རང་དབང་སོགས་སྤྲད་པའི་ཐོག་ནས་མང་གཙོའི་བཅོས་བསྒྱུར་ཞིག་གཏོང་ཐུབ་པ་བྱུང་ན་དགེ་མཚན་ཆེན་པོ་ཡོང་རྒྱུ་རེད་བསམ་བཞིན་ཡོད། ཅེས་སོགས་ཀྱི་བཀའ་སློབ་ཟབ་རྒྱས་སྩལ་ཡོད།།
