༢༠༡༡ ཟླ་ ༦ ཚེས་ ༦ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༦ ཚེས་ ༥ རེས་གཟའ་ཉི་མའི་ཉིན་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་ནས་ཨོ་སི་ཊོ་ལི་ཡ་དང་ནིའུ་ཛི་ལན་ཌིར་ཆིབས་སྒྱུར་སྐྱོང་སྐབས་དད་ལྡན་སེར་སྐྱ་མང་ཚོགས་ཀྱིས་ལག་ཏུ་དཀར་གཙང་མཇལ་དར་དང་དྲི་བཟང་སྤོས་སྣེ་ཐོགས་ཏེ་ཕེབས་སྐྱེལ་ཞུས་ཡོད།
དེ་ཡང་མགོན་པོ་གང་ཉིད་མཆོག་བདུན་ཕྲག་གཉིས་ཙམ་རིང་ཁུལ་དེར་མཛད་འཕྲིན་བསྐྱང་རྒྱུའི་ཐོག་མར་ནིའུ་ཛི་ལན་ཌིའི་ས་ཁུལ་ཁ་རི་སི་ཊི་ཆར་ཇ་(Christchurch)
ཞེས་པའི་ཁུལ་འདི་ལོ་ཕྱི་ཟླ་ ༢ ཚེས་ ༢༢ ཉིན་ས་ཡོམ་ཤུགས་ཚད་ ༦།༣ བརྒྱབ་པར་བརྟེན་མི་གྲངས་ ༡༨༡ ཙམ་འདས་གྲོངས་སུ་གྱུར་བ་དང་སྡོད་ཁང་སོགས་ལ་གནོད་སྐྱོན་ཤུགས་ཆེ་ཕོག་པའི་དྲན་རྟེན་མཛད་སྒོར་ཆིབས་སྒྱུར་བསྐྱང་རྒྱུ་ཡིན་འདུག དེ་རྗེས་མགོན་པོ་གང་ཉིད་མཆོག་ཨོ་སི་ཊོ་ལི་ཡའི་གྲོང་ཁྱེར་མེ་བྷོན་དང་བྷི་རི་སི་བྷེན་པཱར་ཐ་བཅས་སུ་མང་ཚོགས་ལ་བཀའ་སློབ་དང་ཝི་ཏི་ནམ་ནང་པའི་བསྟི་གནས་གསར་བཞེངས་ཞུས་ཡོད་པ་དབུ་འབྱེད་མཛད་རྒྱུ། ཨོ་སི་ཊོ་ལི་ཡའི་གསར་འགྱུར་བརྒྱུད་ལམ་ཁག་གི་གསར་འགོད་པ་དང་མཇལ་འཕྲད་ཀྱིས་གསར་འགོད་པའི་དྲི་བར་བཀའ་ལན་མཛད་རྒྱུ།  ཨོ་སི་ཊོ་ལི་ཡའི་ཁུལ་དུ་གནས་སྡོད་བོད་རིགས་དང་སོག་རིགས་རྣམས་ལ་མཇལ་ཁ་དང་བཀའ་སློབ་སྩལ་རྒྱུ་མ་ཟད། རྒྱལ་སྲས་ཆེན་པོ་ཞི་བ་ལྷས་མཛད་པའི་བྱང་ཆུབ་སེམས་དཔའི་སྤྱོད་པ་ལ་འཇུག་པའི་བཀའ་ཆོས་བཀའ་དྲིན་སྩལ་རྒྱུ་དང་། བོད་རིགས་དང་རྒྱ་རིགས་མཐུན་སྒྲིལ་ཚོགས་པའི་གོ་སྒྲིག་འོག་ཨོ་སི་ཊོ་ལི་ཡའི་རྒྱ་རིགས་ཁག་གཅིག་ལ་མཇལ་ཁ་དང་བཀའ་སློབ་སྩལ་རྒྱུ། ཨོ་སི་ཊོ་ལི་ཡའི་གྲོས་ཚོགས་ཀྱི་འཐུས་མི་ཁག་གཅིག་ལ་མཇལ་འཕྲད་མཛད་རྒྱུ་ཡིན་འདུག དེ་བཞིན་གྲོང་ཁྱེར་ཀེན་བྷེར་རའི་ (Canberra) ནང་ཨོ་སི་ཊོ་ལི་ཡའི་གྲོས་ཚོགས་འཐུས་མི་བོད་དོན་རྒྱབ་སྐྱོར་བ་རྣམས་དང་མཇལ་འཕྲད་མཛད་རྒྱུ་མ་ཟད།  ཨོ་སི་ཊོ་ལི་ཡའི་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པའི་གོ་སྒྲིག་འོག་ཨོ་སི་ཊོ་ལི་ཡའི་གྲོས་ཚོགས་གོང་འོག་གི་འཐུས་མི་ཁག་གཅིག་དང་ལྷན་འཛོམས་ཐོག་༸གོང་ས་མཆོག་གིས་བཀའ་སློབ་སྩལ་གནང་མཛད་རྒྱུ་ཡིན་འདུག  དེ་བཞིན་ཨོ་སི་ཊོ་ལི་ཡའི་གྲོང་ཁྱེར་བྷི་རི་སི་བྷེན་ནང་ (Brisbane) མང་ཚོགས་ལ་ཁོར་ཡུག་སྲུང་སྐྱོབ་ཐོག་བསམ་བློ་ཇི་འདྲ་གཏོང་དགོས་མིན་དང་ལག་ལེན་ཇི་འདྲ་བསྟར་དགོས་མིན་གྱི་བརྗོད་གཞི་དང་། དེ་བཞིན་མང་ཚོགས་ཁྲོད་དབུ་ཁྲིད་ཀྱི་རིན་ཐང་།  ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་མ་ཟད། དེ་རྗེས་བདེ་སྐྱིད་ལྡན་པའི་མི་ཚེ་སྐྱེལ་སྟངས་ཐོག་མང་ཚོགས་ལ་བཀའ་སློབ་སྩལ་རྒྱུ་ཡིན་འདུག་པ་བཅས།།