༢༠༡༡ ཟླ་ ༦ ཚེས་ ༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༦ ཚེས་ ༡ ཉིན་གྱི་ཕྱེད་ཡོལ་ཆུ་ཚོད་ ༢ པ་ནས་ཚེས་ ༣ བར་ཉིན་གྲངས་གཉིས་དང་ཕྱེད་ཀའི་རིང་འཚོགས་རྒྱུའི་འཆར་འགོད་ལས་གཞི་དང་འབྲེལ་བའི་ཟབ་སྦྱོང་གངས་སྐྱིད་སྤྱི་ཐབ་ཡང་སྟེང་ཚོགས་ཁང་དུ་དཔལ་འབྱོར་ལས་ཁུངས་ཀྱིས་གོ་སྒྲིག་ཐོག་དབུ་འཛུགས་གནང་ཡོད།
དེ་ཡང་ཐོག་མར་དཔལ་འབྱོར་ལས་ཁུངས་ཀྱི་དྲུང་ཚབ་ཟླ་བ་རྡོ་རྗེ་ལགས་ཀྱིས་ཟབ་ཁྲིད་པ་ཨ་རི་བོད་ཀྱི་ཐེབས་རྩའི་གཙོ་འཛིན་ལྕམ་སྐུ་རོ་བྷིན་བྷིརི་ཊེ་ནོ་(Robyn Bretano, Executive Director)དང་ལྕམ་སྐུ་རི་ཧཱ་ན་མར་ཕི་(Rhianna Murphy, Grants & Finance administrator)ལགས་རྣམ་གཉིས་ལ་འཚམས་འདྲི་དང་འབྲེལ་ངོ་སྤྲོད་གསུང་བཤད་གནང་ཡོད། དེ་ནས་སྒྲིག་འཛུགས་ཁག་གི་འཆར་འགོད་ལས་འཆར་གྱི་འབྲེལ་ཡོད་ལས་བྱེད་རྣམ་པས་སོ་སོ་ངོ་སྤྲོད་གནང་གྲུབ་བསྟུན་ཨ་རི་བོད་ཀྱི་ཐེབས་རྩའི་ལྕམ་སྐུ་རོ་བྷིན་བྷིརི་ཊེ་ནོ་ལགས་ཀྱིས་ཟབ་སྦྱོང་དང་འབྲེལ་བའི་གསུང་བཤད་གནང། ཐེངས་འདིའི་ཟབ་སྦྱོང་ཐོག་བོད་མིའི་སྒྲིག་འཛུགས་ཀྱི་འཆར་གཞི་འགོད་མཁན་ལས་ཁུངས་ཁག་གི་འབྲེལ་ཡོད་ལས་བྱེད་རྣམ་པ་དང་། སམ་བྷོ་ཊ་སྤྱི་ཁྱབ་ཡིག་ཚང་གི་འགན་འཛིན་གྱིས་གཙོས་འབྲེལ་ཡོད་ལས་བྱེད་རྣམ་པ། རྡ་ས་དང་མ་སུ་རི་བོད་ཁྱིམ་གཉིས་ཀྱི་རོགས་སྐྱོར་ཚན་པའི་འབྲེལ་ཡོད་ལས་བྱེད་རྣམ་པ། དེ་བཞིན་བལ་ཡུལ་གངས་ཅན་བདེ་རྩའི་འབྲེལ་ཡོད་ལས་བྱེད་བཅས་ཁྱོན་མི་གྲངས་ ༢༦ ཙམ་མཉམ་ཞུགས་བྱས་ཡོད་པ་བཅས།།