༢༠༡༡ ཟླ་ ༦ ཚེས་ ༨ རེས་གཟའ་ལྷག་པ།
༄༅། །འདི་གར་ཤེས་རིག་ལས་ཁུངས་ནས་བཏང་གནས་ནང་འཁོད་དོན། རྒྱ་གར་རྒྱལ་ཡོངས་འཛིན་རིམ་བཅུ་པའི་ཡིག་རྒྱུགས་གྲུབ་འབྲས་ཕྱི་ལོ་ ༢༠༡༡ ཟླ་ ༦ ཚེས་ ༤ ཉིན་གསལ་བསྒྲགས་གནང་ཡོད། འདི་ལོའི་ཡིག་རྒྱུགས་ཆེན་མོའི་ནང་བོད་པའི་སློབ་གྲྭ་ཁག་ ༢༨ ནས་སློབ་ཕྲུག་གྲངས་ ༡༨༧༩ ཡོད་པའི་ཁོངས་ནས་སློབ་ཕྲུག་གྲངས་ ༡༨༦༤ དངོས་སུ་འཛུལ་ཞུགས་བྱས་ཡོད། དེའི་ཁོངས་ནས་སློབ་ཕྲུག་གྲངས་ ༡༨༤༤ ཡིག་རྒྱུགས་འཕྲོད་ཡོད་པ་དང་། བསྐྱར་དུ་ཡིག་རྒྱུགས་གཏོང་དགོས་པའི་སློབ་མ་གྲངས་ ༢༠ ཡོད། འདི་ལོའི་འཛིན་རིམ་བཅུ་པའི་ཡིག་རྒྱུགས་འཕྲོད་ཚད་ཀྱི་བརྒྱ་ཆ་དེ་བོད་སློབ་ཁག་གི་ནང་བུ་ལས་བུ་མོའི་བརྒྱ་ཆ་མཐོ་བ་ལོན་ཡོད། བུའི་ཡིག་རྒྱུགས་འཕྲོད་ཚད་བརྒྱ་ཆ་ ༩༨་༨༢ ཡིན་པ་དང་། བུ་མོའི་ཡིག་རྒྱུགས་འཕྲོད་ཚད་བརྒྱ་ཆ་ ༩༩་༠༤ ཡིན་འདུག དེ་བཞིན་འདི་ལོ་བོད་སློབ་ཁག་ ༢༨ ཁོངས་ནས་སློབ་གྲྭ་ ༢༠ རྒྱུགས་འཕྲོད་བརྒྱ་ཆ་བརྒྱ་ནས་བརྒྱ་ལོན་ཡོད།
འདི་ལོའི་རྒྱ་གར་རྒྱལ་ཡོངས་ཡིག་རྒྱུགས་ཆེན་མོའི་བོད་སློབ་ཁག་གི་ནང་ནས་རྩེ་ཕུད་ཨང་དང་པོ་ལོན་པའི་ཁོངས་ཀོ་ལི་གྷལ་སློབ་གྲྭའི་སློབ་མ་བསྟན་འཛིན་དབང་ཕྱུག་དང། སིམ་ལ་གཏན་སློབ་ཀྱི་སློབ་མ་པར་ཏི་བྷ་ཇ་སི་ཝལ། སེ་ལ་ཁུ་བོད་ཁྱིམ་གྱི་སློབ་མ་བསྟན་འཛིན་དཔལ་སྒྲོན། སྦེལ་ཀོབ་སློབ་གྲྭའི་སློབ་མ་བསྟན་འཛིན་ནོར་འཛོམས་བཅས་ཡིན་པ་དང། དེ་ནས་རྩེ་ཕུད་གཉིས་པ་ལོན་མཁན་ཁོངས་མ་སུ་རི་གཏན་སློབ་ཀྱི་སློབ་མ་ས་པན་ཌན་ར་ཨོཊ་དང། སེ་ལ་ཁུ་བོད་ཁྱིམ་གྱི་སློབ་མ་བསྟན་འཛིན་ཀུན་ཁྱབ་དང་བསྟན་འཛིན་ལྷ་མཚོ། སྦེལ་ཀོབ་སློབ་གྲྭའི་སློབ་མ་བསྟན་འཛིན་དབང་གྲགས་བཅས་ཡིན།
སྤྱིར་འདི་ལོའི་ཡིག་རྒྱུགས་གྲུབ་འབྲས་ནི་སྔ་ལོའི་ཡིག་རྒྱུགས་འཕྲོད་ཚད་ལས་བརྒྱ་ཆ་ ༧་༣༨ མཐོ་བ་ཆགས་ཡོད།  དེ་བཞིན་ཕྱི་ལོ་ ༢༠༡༠ ལོ་ནས་བཟུང་འཛིན་རིམ་བཅུ་པའི་ཡིག་རྒྱུགས་གྲུབ་འབྲས་དེ་ཨང་ཐོབ་ཀྱི་ཚབ་ཏུ་སྡེ་ཚན་གྲལ་རིམ་ལམ་ལུགས་(Grading System) གསར་གཏོད་གནང་ཡོད་ཅིང། དེ་ཡང་འཛིན་རིམ་བཅུ་གཉིས་ཡོད་པའི་སློབ་གྲྭའི་ནང་འཛིན་རིམ་བཅུ་པའི་ཡིག་རྒྱུགས་སློབ་གྲྭ་རང་ཁོངས་ནས་གཏོང་རྒྱུ་དང། དེ་མིན་རྣམས་དབུས་ཡིག་རྒྱུགས་ལྷན་ཁང་ནས་གོ་སྒྲིག་ཞུ་གི་ཡོད་ཀྱང་རྒྱུགས་འཕྲོད་ལག་འཁྱེར་སྤྱི་མཚུངས་གནང་གི་ཡོད་པ་བཅས།།
བོད་སློབ་ཁག་གི་ཕྱོགས་བསྡོམས་གྲུབ་འབྲས་གཟིགས་འདོད་ན་འདིར་གནོན།    འཛིན་རིམ་བཅུ་པའི་ཕྱོགས་བསྡོམས་གྲུབ་འབྲས།