༢༠༡༡ ཟླ་ ༦ ཚེས་ ༡༧ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༦ ཚེས་ ༡༦ ཉིན་རྒྱ་ནག་གི་རྒྱལ་ས་པེ་ཅིང་དུ་རྟེན་གཞི་བྱས་པའི་ཡུ་རོབ་སྤྱི་མཐུན་ཚོགས་པའི་སྐུ་ཚབ་ཀྱིས་རྒྱ་ནག་གཞུང་ལ་བཙན་འཁྲིད་འོག་གར་སོང་ཆ་མེད་གྱུར་བའི་ཀིརྟི་དགོན་པའི་དགེ་འདུན་པ་ ༣༠༠ ཙམ་ད་ལྟ་གང་དུ་ཡོད་མེད་དང་ཁོང་ཚོའི་གནས་སྟངས་ཇི་ཡིན་ཞིབ་ཕྲ་གསལ་གཤད་དགོས་པའི་རེ་འདུན་ཤུགས་ཆེ་བཏོན་ཡོད། ཡུ་རོབ་སྤྱི་མཐུན་ཚོགས་པ་དང་རྒྱ་ནག་དབར་གྲོས་མོལ་ཐེངས་ ༣༠ པ་དེ་བཞིན་རྒྱ་ནག་གི་གྲོང་ཁྱེར་པེ་ཅིང་དུ་ཚོགས་པ་དང་སྟབས་བསྟུན།  ཡུ་རོབ་སྤྱི་མཐུན་ཚོགས་པའི་སྐུ་ཚབ་མཆོག་གིས་རྒྱ་ནག་གཞུང་ལ་རེ་འདུན་བཏོན་པ་ཞིག་ཡིན་འདུག
གྲོས་མོལ་ཚོགས་འདུའི་སྐབས་ཕྱོགས་གཉིས་ཀྱི་འགྲོ་བ་མིའི་ཐོབ་ཐང་དང་གྲངས་ཉུང་མི་རིགས་སོགས་ཀྱི་གནས་སྟངས་སྐོར་བགྲོ་གླེང་བྱས་ཡོད། རྒྱ་ནག་ནང་གྲངས་ཉུང་མི་རིགས་བོད་དང་སོག་པོ།  ཤིང་ཅང་སོགས་ཀྱི་གནས་སྟངས་ཙམ་མ་ཟད། རྒྱ་ནག་ནང་ཁྲིམས་ཀྱི་གནས་སྟངས་དང་དེ་བཞིན་དེབ་སྐྱེལ་མ་བྱས་པའི་ཡེ་ཤུའི་ལྷ་ཁང་གི་ཆོས་པ་སོགས་ལ་ཆོས་དད་རང་དབང་སྐོར་དང་གསར་འགྱུར་རང་དབང་། འགྲོ་བ་མིའི་ཐོབ་ཐང་གི་ཁྲིམས་རྩོད་པའི་ཐོབ་ཐང་བཅས་ཀྱི་གནད་དོན་ཐོག་ཕྱོགས་གཉིས་དབར་བགྲོ་གླེང་བྱས་ཡོད་པ་བཅས།།