༢༠༡༡ ཟླ་ ༦ ཚེས་ ༩ རེས་གཟའ་ཕུར་བུ།
༄༅།  །དབྱིན་ཡུལ་གྱི་རྙིང་ཞེན་ཆབ་སྲིད་ཚོགས་པས་དབྱིན་ཡུལ་གཞུང་ཕྱོགས་ནས་བོད་དང་རྒྱ་ནག་ནང་གི་འགྲོ་བ་མིའི་ཐོབ་ཐང་ཐོག་ལངས་ཕྱོགས་བརྟན་བཟུང་དགོས་སྐོར་བརྗོད་འདུག
ཕྱི་ལོ་ ༢༠༡༡  ཟླ་ ༦ ཚེས་ ༧ ཉིན་རྙིང་ཞེན་ཚོགས་པའི་འགྲོ་བ་མིའི་ཐོབ་ཐང་རྟོག་ཞིབ་སྡེ་ཚན་གྱི་འགན་འཛིན་སྐུ་ཞབས་(Robert Buckland)རོ་བྷར་ཊ་བྷཀལན་ཌེ་ལགས་ཀྱིས་འཛམ་གླིང་ནང་ཆོས་དད་རང་དབང་སྐོར་དང་འབྲེལ་བའི་སྙན་ཐོ་ཞིག་དབྱིན་ཡུལ་གྱི་གཞུང་འཛིན་ལ་ཕུལ་ཡོད། སྙན་ཐོ་དེའི་ནང་དབྱིན་ཡུལ་གཞུང་ལ་བོད་དང་རྒྱ་ནག་ནང་འགྲོ་བ་མིའི་ཐོབ་ཐང་གཏན་ནས་མེད་པའི་སྐོར་ཞིབ་ཕྲ་བརྗོད་དེ་དབྱིན་ཡུལ་གཞུང་ཕྱོགས་ནས་རྒྱ་ནག་གཞུང་དང་ལྷན་དེ་དོན་དགོངས་བཞེས་བརྟན་བཟུང་དགོས་དོན་གལ་ཆེན་ཡིན་སྐོར་བརྗོད་ཡོད། དེ་བཞིན་དབྱིན་ཡུལ་གཞུང་འཛིན་ངོས་ནས་ད་བར་རྒྱ་ནག་དང་མཉམ་འགྲོ་བ་མིའི་ཐོབ་ཐང་ཐོག་གྲོས་མོལ་རིམ་པ་གནང་སྟེ། ལོ་བཅུ་བཞི་ཕྱིན་ཡོད་ཀྱང་དོན་དངོས་ཐོག་གྲུབ་འབྲས་ཐོན་པ་གང་ཡང་བྱུང་མེད་ཅེས་གསུངས་འདུག ཕྱོགས་མཚུངས་རྙིང་ཞེན་ཚོགས་པའི་ངོས་ནས་དབྱིན་ཡུལ་གཞུང་ལ་བོད་དང་རྒྱ་ནག་ནང་འགྲོ་བ་མིའི་ཐོབ་ཐང་མེད་པའི་གནས་ཚུལ་དེ་དབྱིན་ཡུལ་གྱི་མང་ཚོགས་རེ་ཟུང་བརྗོད་པ་ཙམ་མ་ཡིན་པ་དང། ལྷག་པར་རྒྱ་ནག་ཏུ་ཕེབས་སྐབས་གསར་འགོད་ལྷན་ཚོགས་དང་མང་ཚོགས་ལ་གཏམ་བཤད་བྱེད་སྐབས་གནད་དོན་དེ་ངེས་པར་དུ་གླེང་སློང་དགོས་ཀྱི་ཡོད་ཅེས་གསུངས་ཡོད།
རྩ་བའི་གསར་དུ་འདོན་སྤེལ་གནང་བའི་ (The Freedom to Believe) ཆོས་དད་རང་དབང་ཞེས་པ་དེའི་ནང་བོད་དང་རྒྱ་ནག་ནང་འགྲོ་བ་མིའི་ཐོབ་ཐང་མེད་པའི་སྐོར་ཙམ་མ་ཡིན་པར་རྒྱ་ནག་གཞུང་ནས་༸གོང་ས་༸སྐྱབས་མགོན་ཆེན་པོ་མཆོག་རྒྱལ་ཁབ་ཁ་བྲལ་གཏོང་མཁན་རེད་ཅེས་བརྗོད་དེ་མགོན་པོ་གང་ཉིད་མཆོག་ལ་གཞི་མེད་སྐྱོན་འཛུགས་དང་མཚན་སྨད་ཞུས་དང་ཞུ་བཞིན་ཡོད་པ་དེ་དག་ཀྱང་མཚམས་འཇོག་བྱེད་དགོས་ཞེས་གསུངས་ཡོད་པ་བཅས། །