༢༠༡༡༢ ཟླ་ ༦ ཚེས་ ༢༤ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༦ ཚེས་ ༢༣ ཉིན་ཡུ་རོབ་སྐུ་ཚབ་སྐལ་བཟང་རྒྱལ་མཚན་མཆོག་ལ་༸གོང་ས་མཆོག་གིས་སྐུ་དབང་རྩིས་སྤྲོད་མཛད་པའི་སྐོར་ནོར་ཝེ་བོད་ཀྱི་རླུང་འཕྲིན་ཁང་ནས་བཀའ་དྲི་ཞུས་པར་ཁོང་གིས་འགྲེལ་བརྗོད་གནང་དོན། ཉེ་ཆར་༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་དང་འཛིན་སྐྱོང་གི་སྐུ་དབང་ཡོངས་རྫོགས་མི་མང་ནས་ཐད་ཀར་འོས་འདེམས་བྱས་པའི་དབུ་ཁྲིད་ཚོར་གསོལ་རས་སྩལ་བ་དང་། དེ་བཞིན་བོད་སྐད་ནང་བཙན་བྱོལ་བོད་གཞུང་ཞེས་པའི་མཚན་བྱང་བརྗེ་སྒྱུར་གནང་རྒྱུའི་ཐོག་ལ་བོད་པའི་ནང་རྩོད་གླེང་དང་སྐད་ཆ་མང་དག་ཅིག་ཡོང་བཞིན་འདུག སྐད་ཆ་དེ་ཚོའི་ནང་ལྟ་སྐབས་དེ་དག་གནང་དགོས་པའི་རྒྱུ་མཚན་དང་གནད་འགག་གསལ་པོ་མ་རྟོགས་པའི་མཐོང་ཚུལ་བྱུང་། དེ་ཙམ་མ་ཟད་ད་ལྟའི་དུས་དེར་བོད་མི་མང་དག་ཅིག་བློ་ཕམ་བྱེད་རྒྱུ་དང་། དེ་བཞིན་གཞིས་ལུས་བོད་མི་རྣམས་ནས་གནས་ཚུལ་ཆ་ཚང་མ་རྟོགས་པའི་འགྲེལ་བཤད་དེ་དག་གསན་བ་ཡིན་ན། བློ་ཕམ་ཡོང་རྒྱུ་དང་སེམས་ཤུགས་རྒྱུ་དེ་འདྲ་ཡོང་གི་འདུག་བསམས་ཏེ། འགྱུར་བ་གཏོང་དགོས་པའི་རྒྱུ་མཚན་གང་ཡིན་པའི་ཐོག་ངས། ད་ལྟའི་ང་ཚོའི་སྤྱི་ཚོགས་ནང་འགྲོ་བཞིན་པའི་བགྲོ་གླེང་དང་རྩོད་གླེང་ནང་གཅིག་བྱས་ན་གནས་ཚུལ་ཁ་ཤས་གསལ་དུ་གཏོང་རྒྱུ་དང་། དངོས་ཡོད་གནས་ཚུལ་མཁྱེན་རྟོགས་ཆེད་ཐུགས་ཕན་གསོས་ཀྱི་རེད་སྙམ་ནས་དེ་སྔོན་རྩོམ་འབྲི་ལམ་ནས་གསལ་བཤད་བྱས་པ་ཡིན།
དེ་བཞིན་སྐད་ཆ་དེ་དག་ནང་བོད་མི་མང་གི་མིང་ཐོག་ལ་བཀའ་མོལ་གནང་རྒྱུའི་ཐོབ་ཐང་མེད་པ་ཆགས་པ་རེད་ཅེས་སོགས་ཀྱི་གནས་ཚུལ་ཡོང་གི་འདུག ད་ལྟའི་བཅའ་ཁྲིམས་བསྐྱར་བཅོས་གནང་བ་དེ་དག་ལ་གསལ་པོ་གཟིགས་ན། སྔོན་གླེང་ནང་བོད་མིའི་སྒྲིག་འཛུགས་ཀྱི་འབྱུང་ཁུངས་ག་རེ་ཡིན་པའི་ལོ་རྒྱུས་གསལ་པོ་བཀོད་འདུག སྔོན་གླེང་ནས་བོད་མིའི་སྒྲིག་འཛུགས་དེ་བོད་མི་ས་ཡ་དྲུག་གིས་ངོས་འཛིན་བྱས་པའི་སྐུ་ཚབ་ཡིན་པ་གསལ་པོ་ཡོད། བོད་མིའི་སྒྲིག་འཛུགས་ཀྱི་ལས་འགན་དེ་ཡང་བོད་མི་ས་ཡ་དྲུག་གི་བདེ་དོན་དང་མ་འོངས་པའི་ཆབ་སྲིད་སོགས་གང་གི་ཐོག་ལ་ཡིན་རུང་། དེ་བསྒྲུབ་རྒྱུ་ཡིན་པ་ཧ་ཅང་གསལ་པོ་འདུག་སྙམ་གྱི་ཡོད། ད་ལྟ་ང་ཚོའི་སྤྱི་ཚོགས་ནང་བགྲོ་གླེང་བྱེད་བཞིན་པའི་ཁྲོད་སྔོན་གླེང་ནང་བཀོད་ཡོད་པ་དེ་དག་ལ་དོ་སྣང་དང་གནད་འགག་རྩིས་མེད་པའི་མཐོང་ཚུལ་བྱུང།
ཕྱོགས་མཚུངས་ད་ལྟ་འགྱུར་བ་བཏང་བ་དེའི་ཐོག་ནས་བོད་མིའི་དབུ་ཁྲིད་རྣམས་ནས་བོད་པའི་བདེ་དོན་རྩོད་རྒྱུར་དུས་ཡུན་ག་ཚོད་འགོར་ཡང་མུ་མཐུད་གནས་རྒྱུར་དགོངས་པ་བཞེས་འདུག་སྙམ་གྱི་ཡོད། བོད་པའི་འཐབ་རྩོད་ཡུན་རིང་གནས་རྒྱུའི་ཆ་རྐྱེན་གཙོ་བོ་དེ་བོད་མིའི་སྒྲིག་འཛུགས་མུ་མཐུད་གནས་དགོས་པ་ཞིག་ཡིན། དེར་བརྟེན་བོད་པའི་འཐབ་རྩོད་དང་བོད་མིའི་སྒྲིག་འཛུགས་དེ་ཡུན་རིང་གནས་ཐབས་ཆེད་ད་ལྟའི་བསྒྱུར་བཅོས་དེ་བཏང་གནང་བ་རེད་སྙམ་གྱི་ཡོད། དེའི་ཐོག་ནས་རྒྱ་ནག་དང་རྒྱལ་སྤྱིའི་ནང་ནས་གོ་བརྡ་ག་རེ་ལེན་དགོས་པ་རེད་ཅེ་ན། བོད་མིའི་དབུ་ཁྲིད་དང་བོད་མིའི་སྒྲིག་འཛུགས་ཀྱིས་བོད་ཀྱི་འཐབ་རྩོད་ལ་དུས་ཡུན་ག་ཚོད་འགོར་ཡང་སྙིང་སྟོབས་ཞུམ་མེད་དང་ལྷག་བསམ་རྣམ་དག་གིས་བོད་ཀྱི་བདེན་དོན་རྩོད་རྒྱུའི་དམ་བཅའ་བརྟན་པོ་ཡོད་པ་ཞིག་མཐོང་གི་འདུག་སྙམ་གྱི་ཡོད་ཅེས་གསུངས་ཡོད་པ་བཅས།