༢༠༡༡ ཟླ་ ༦ ཚེས་ ༢༧ རེས་གཟའ་ཟླ་བ།

ཕྱི་ལོ་ ༢༠༡༡ ཟླ་ ༦ ཚེས་ ༡༤ ཉིན་སྐུ་ཞབས་བྷོབ་བྷོ་རོན་མཆོག་དང་ལྷན།

༄༅། །ཕྱི་ ༢༠༡༡ ཟླ་ ༦ ཚེས་ ༡༥ ཉིན་ཨོ་སི་ཊོ་ལི་ཡའི་ལྗང་ཁུ་ཚོགས་པའི་ཚོགས་གཙོ་གྲོས་ཚོགས་གོང་མའི་ཚོགས་མི་བོད་དོན་རྒྱབ་སྐྱོར་བ་སྐུ་ཞབས་བྷོབ་བྷོ་རོན་ (Bob Brown) མཆོག་དང་རང་དབང་ཚོགས་པའི་དབུ་ཁྲིད་སྐུ་ཞབས་ནིཀ་ཛེ་ནོ་ཕོན་ (Nick Zenophon) རྣམ་གཉིས་ཀྱིས་དབུ་ཁྲིད་དེ་གྲོས་ཚོགས་གོང་མའི་ (Australian Senate) ནང་༸གོང་ས་༸སྐྱབས་མགོན་ཆེན་པོ་མཆོག་བོད་དུ་གདན་ཞུ་དགོས་པའི་གྲོས་གཞི་བཏོན་པ་དེར་རྒྱབ་སྐྱོར་གནང་ཡོད། གྲོས་གཞི་དེའི་ནང་ཉེ་ལམ་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་༞ཨོ་སི་ཊོ་ལི་ཡའི་གྲོས་ཚོགས་སུ་ཆིབས་སྒྱུར་སྐབས་ཨོ་སི་ཊོ་ལི་ཡའི་སྲིད་བློན་མཆོག་དང་ཨོ་སི་ཊོ་ལི་ཡའི་ཕྱི་འབྲེལ་བློན་ཆེན་མཆོག་རྣམ་གཉིས་ཀྱིས་མཇལ་འཕྲད་མ་གནང་བ་དེར་བློ་ཕམ་བྱུང་ཚུལ་གསལ་བ་མ་ཟད། ལྗང་ཁུ་ཚོགས་པའི་ཚོགས་གཙོ་སྐུ་ཞབས་བྷོབ་བྷོ་རོན་མཆོག་གིས་ཨོ་སི་ཊོ་ལི་ཡའི་གྲོང་ཁྱེར་ཀེན་བྷེར་རའི་ (Canberra) ནང་གསུང་དོན། བོད་མིའི་ཆོས་ཀྱི་དབུ་ཁྲིད་༸སྐྱབས་མགོན་ཏཱ་ལའི་བླ་མ་མཆོག་བོད་དུ་གདན་ཞུའི་ཆེད་ང་ཚོས་རྒྱབ་སྐྱོར་ཞུ་ཐུབ་པ་དེེར་འཛམ་གླིང་གང་སར་བཙན་བྱོལ་དུ་གྱར་བའི་བོད་མི་དང་གཞིས་བཞུགས་བོད་མི་བཅས་བོད་མི་ས་ཡ་དྲུག་ཚང་མས་བསྔགས་བརྗོད་དང་དགའ་བསུ་ཞུ་རྒྱུ་རེད།།