༢༠༡༡ ཟླ་ ༥ ཚེས་ ༣ རེས་གཟའ་མིག་དམར།
༄༅། འདི་གར་ཨ་རི་བོད་གཞུང་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟུང་དྲུང་ཀུན་དགའ་བཀྲིས་ལགས་ཀྱིས་ཕྱི་ལོ་ ༢༠༡༡ ཟླ་ ༥ ཚེས་ ༢ ཉིན་བཏང་གནས་ནང་འཁོད་དོན། ཨ་མི་རི་ཁའི་གྲོང་ཁྱེར་ནིའུ་ཡོཀ་ཏུ་ཡོད་པའི་ཨ་རི་བོད་ཀྱི་ཐེབས་རྩ་ཁང་ནས་ཕྱི་ཚེས་ ༢༨ ཉིན་བོད་ཀྱི་ཐེབས་རྩ་ཁང་དབུ་བརྙེས་ནས་མི་ལོ་ཧྲིལ་པོ་ ༣༠ འཁོར་བའི་དགའ་སྟོན་གྱི་རྟེན་འབྲེལ་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་གསུང་འཕྲིན་ཞིག་རྩལ་ཡོད། འདུ་འཛོམས་དེར་ཨ་རི་བོད་གཞུང་སྐུ་ཚབ་དོན་གཅོད་བློ་བཟང་སྙན་གྲགས་ལགས་དང་། གྲགས་ཅན་གློག་བརྙན་འཁྲབ་སྟོན་པ་རི་ཅ་ཀྲི་གྷིར། རུ་པིན་འགྲེམས་སྟོན་ཁང་གི་སྦྱིན་བདག་ཤལ་ལི་དང་། ཌོ་ན་རུ་སྦིན། སྐུ་ཚབ་དོན་གཅོད་ཁང་གི་གཞུང་ཞབས་ལས་བྱེད། བོད་པའི་གཞུང་འབྲེལ་མིན་པའི་ཚོགས་སྐྱིད་ཁག་གི་སྐུ་ཚབ་སོགས་ཕྱི་ནང་སྐུ་མགྲོན་ཁག་མགྲོན་འབོད་ཞུས་ཡོད། དེ་ཡང་མཛད་སྒོའི་ཐོག་སྐུ་ཚབ་དོན་གཅོད་ཀྱིས་༸གོང་ས་མཆོག་གི་སུང་འཕྲིན་རིན་པོ་ཆེ་སྒྲོགས་སྦྱང་ཞུས་པའི་ནང་འཁོད་དོན། ཨ་རི་བོད་ཀྱི་ཐེབས་རྩ་ཁང་བཙུགས་ནས་ད་བར་ལོ་ ༣༠ ཙམ་རིང་གཙོ་བོ་ཨ་རི་གཞུང་དང་། ཚོགས་པ་འདྲ་མིན། སྒེར་པ་བཅས་ནས་བཙན་བྱོལ་བོད་མིའི་སྒྲིག་འཛུགས་དང་ཐག་ཉེ་པོའི་སྒོ་ནས་ལས་དོན་གནང་བ་དེས། བོད་མིའི་ཤེས་ཡོན་དང་། སྤྱི་ཚོགས། འཕྲོད་བསྟེན་སོགས་ཀྱི་ཐད་ཕན་ཐོགས་ཅི་ཆེ་བྱུང་ཡོད་པར་བརྟེན། ངོས་ནས་རོགས་རམ་བྱེད་མཁན་ཚང་མ་དང་། ལྷག་པར་ཨ་རིའི་གཞུང་ལ་གོ་སྐབས་འདི་བཟུང་སྟེ་ཐུགས་རྗེ་ཆེ་ཞུ་གི་ཡོད། ཅེས་འཁོད་ཡོད།
གཞན་ཡང་མཛད་སྒོ་དེར་ཨ་རིའི་སྙན་གྲགས་ཅན་གྱི་གློག་བརྙན་འཁྲབ་སྟོན་པ་སྐུ་ཞབས་རི་ཅ་ཀྲི་གྷིར་ལགས་ཀྱིས་དུས་ཡུན་རིང་པོའི་ནང་བོད་ཀྱི་རྩ་དོན་ཐོག་ལྷག་བསམ་རྣམ་དག་གི་རོགས་ཕན་གནང་བ་དང་། རུ་སྦིན་འགྲེམ་སྟོན་ཁང་གི་སྦྱིན་བདག་ཤལ་ལི་དང་། དྲོལ་ནལ་རུ་སྦིན་རྣམ་གཉིས་ནས་ཀྱང་བོད་ཀྱི་ཐུན་མོང་མ་ཡིན་པའི་ཆོས་དང་། རིག་གཞུང་ཉར་ཚགས་སྲུང་སྐྱོབ་ཐོག་ཨ་རི་བོད་ཀྱི་ཐེབས་རྩ་ཁང་ལ་ཡུན་རིང་རྒྱབ་སྐྱོར་གནང་བར་ལེགས་གསོའི་དྲན་རྟེན་གྱི་ཕྱག་རྟགས་རེ་ཕུལ་ཡོད། དེ་བཞིན་མཛད་སྒོ་དེ་དང་སྟབས་བསྟུན་བོད་ཀྱི་ཐེབས་རྩ་ཁང་གིས་ཞལ་འདེབས་བསྡུ་སློང་གནང་ཡོད་པ་དང་། རི་མོ་བ་ཁག་གཅིག་ནས་བོད་ཀྱི་ཐེབས་རྩ་ཁང་གི་ལས་དོན་ཆེད་རི་མོ་དང་། སྐུ་ཐང་། དཔར་རིགས་ཁག་གཅིག་ཞལ་འདེབས་ཕུལ་ཡོད།
འདུ་འཛོམས་སྐབས་བོད་པར་སྔ་རྗེས་སུ་རྒྱབ་སྐྱོར་གནང་མཁན་སྐད་གྲགས་ཅན་གྱི་མ་བྱན་ཨི་རིག་ཀྱིས་གཙོས་མ་བྱན་བཅུ་གཅིག་ལ་ཡང་བོད་པར་ཤ་ཚ་དང་། གདུང་སེམས་མཉམ་སྐྱེའི་རྒྱབ་སྐྱོར་གནང་བར་བོད་ཀྱི་ཐེབས་རྩ་ཁང་ནས་ཐུགས་རྗེ་ཆེ་ཞུས་ཡོད་པ་བཅས།
