༢༠༡༡ ཟླ་ ༥ ཚེས་ ༡༨ རེས་གཟའ་ལྷག་པ།
༄༅། འདི་གར་བོད་གཞུང་ཨ་རི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟུང་དྲུང་ཀུན་དགའ་བཀྲིས་ལགས་ཀྱིས་ཕྱི་ལོ་ ༢༠༡༡ ཟླ་ ༥ ཚེས་ ༡༧ ཉིན་བཏང་གནས་ནང་འཁོད་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ད་ཐེངས་ཨ་རིར་ཆིབས་སྒྱུར་བསྐྱངས་པའི་མཛད་འཕྲིན་ཁག་ལེགས་པར་གྲུབ་སྟེ། ཕྱི་ཟླ་ ༥ ཚེས་ ༡༥ རེས་གཟའ་སྤེན་པ་ཉིན་ཨ་རིའི་གྲོང་ཁྱེར་ནེ་ཝརཀ་ནས་རྒྱ་གར་དུ་ཆིབས་སྒྱུར་བསྐྱངས་རྗེས། ཕྱི་ཚེས་ ༡༧ རེས་གཟའ་མིག་དམར་ཉིན་སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་དོན་ཁང་ལས་བྱེད་རྣམས་ཚོགས་འདུ་སྐོང་ཚོགས་གནང་སྟེ་གསུང་དོན། ལས་བྱེད་ཚང་མས་རྒྱུན་གཏན་གྱི་ལས་འགན་ཁག་སྔར་བཞིན་སྒྲུབ་དགོས་པ་སྨོས་མེད་ཐོག ལོ་འདིའི་འབྱུང་འགྱུར་དུས་ཚོད་ལྷག་མའི་ནང་གི་ལས་དོན་ཆེ་ཁག དཔེར་ན། ཕྱི་ཟླ་ ༦ པའི་ནང་ཚུགས་རྒྱུ་ཡིན་པའི་དེང་དུས་སྒྱུ་རྩལ་རི་མོའི་འགྲེམས་སྟོན་དང་། ཕྱི་ཟླ་ ༧ པའི་དུས་འཁོར་དབང་ཆེན་དང་འབྲེལ་བའི་ལས་དོན། དུས་དབང་སྐབས་༸སྐུའི་འཁྲུངས་སྐར་དུས་ཆེན་གོ་སྒྲིག་ཞུ་ཕྱོགས། ཕྱི་ཟླ་ ༨ དང་ ༩ པའི་ནང་རྒྱ་རིགས་གྲོགས་པོ་དང་། ཝི་ཏི་ནམ་མི་རིགས། བོད་དོན་རྒྱབ་སྐྱོར་ཚོགས་པ། ཧི་མཱ་ལ་ཡའི་རི་རྒྱུད་ཀྱི་མི་རིགས་དང་ད་ཡོད་འབྲེལ་ལམ་ཡར་རྒྱས་གོང་འཕེལ་ཡོང་ཐབས་སུ་སྣེ་ལེན་འདུ་འཛོམས་གནང་ཕྱོགས། ཕྱི་ཟླ་ ༡༠ པའི་ནང་ཆོས་ཀྱི་ཟབ་སྦྱོང་གོ་སྒྲིག་བྱེད་ཕྱོགས། བྱང་ཨ་རིའི་ནང་གི་རེས་གཟའ་སྤེན་པ་དང་ཉི་མོའི་སློབ་གྲྭའི་བོད་ཡིག་སློབ་དེབ་གཅིག་གྱུར་བཟོ་ཐབས་ཀྱི་ལས་དོན་མཇུག་སྐྱོང་སྐོར། འདི་ལོ་ཕྱི་ཟླ་ ༢ པར་སྐོང་ཚོགས་གནང་བའི་བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༡༡ པའི་གྲོས་ཆོད་ཁག་ལག་བསྟར་ཡོང་ཐབས་ལ་དོན་ཁང་ནས་བྱེད་དགོས་པ་ཇི་ཡོད། ས་གནས་སོ་སོར་སྐུལ་ལྕག་བྱེད་དགོས་ཇི་ཡོད་བཅས་ཀྱི་ལས་དོན་ཐོག་ཚགས་ཚུད་ཡོང་ཐབས་སུ་འགན་འཁུར་ཆ་བགོས་དང་། ལས་དོན་རྣམས་དུས་ཐོག་ཏུ་སྒྲུབ་ཐུབ་པ་དགོས་པའི་ལམ་སྟོན་གནང་། ཚོགས་འདུ་དེའི་སྐབས་ཨ་རི་སྐུ་ཚབ་དོན་ཁང་གི་ལས་བྱེད་ཚེ་དབང་ཕུན་ཚོགས་དང་། ཀུན་དགའ་བཀྲིས། བསྟན་འཛིན་བདེ་སྐྱིད། ལྷག་པ་ཚེ་རིང་། བདེ་ཆེན་ཆོས་སྐྱིད་བཅས་མཉམ་ཞུགས་གནང་ཡོད། ཉེ་དུས་དོན་ཁང་དུ་གནས་སྤོ་བསྐོ་གཞག་གནང་བའི་ལས་བྱེད་གསར་པ་ངག་དབང་ཡོན་ཏན་ལགས་དོན་ཁང་དུ་ཕེབས་རྒྱུའི་ཁྲིམས་ཐོག་ཡིག་ཆ་གྲ་སྒྲིག་གི་ལས་དོན་འགོ་འཛུགས་ཟིན་པ་ལྟར། འབྲེལ་ཡོད་ཁྲིམས་རྩོད་པས་གནང་སྒོ་ཁག་གནང་མུས་སུ་ཡིན་པ་བཅས།།
