༢༠༡༡ ཟླ་ ༥ ཚེས་ ༣༠ རེས་གཟའ་ཟླ་བ།
༄༅། འདི་གར་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཨ་རིའི་གྲོང་ཁྱེར་ནིའུ་ཡོཀ་ནང་ཡོད་པའི་རྒྱ་སྐད་ཀྱི་བརྙན་འཕྲིན་ (NTDTV) ཞེས་པས་རྒྱ་ནག་གཞུང་གིས་བོད་ཞི་བས་བཅིངས་འགྲོལ་བཏང་སྟེ་ལོ་ ༦༠ འཁོར་བ་ཞེས་བཤད་པ་དེ་ངོ་མ་བཅིངས་འགྲོལ་ཡིན་ནམ་བྲན་གཡོག་ཡིན། ཞེས་པའི་བརྗོད་གཞིའི་ཐོག་ཆབ་སྲིད་ཉམས་ཞིབ་པ་རྒྱ་རིགས་གྲོགས་པོ་གཉིས་མགྲོན་འབོད་བྱས་ཏེ་བགྲོ་གླེང་སློང་བྱས་ཡོད། སྐབས་དེར་ཨ་རི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟུང་དྲུང་ཀུན་དགའ་བཀྲིས་ལགས་ཀྱིས་དྲྭ་ལམ་ཁ་པར་བརྒྱུད་རྒྱ་རིགས་བརྙན་འཕྲིན་གསར་འགོད་པས་དྲི་བར་ལན་འདེབས་གནང་ཡོད། (NTDTV) ཞེས་པའི་བརྙན་འཕྲིན་ཁང་དེས་རེས་གཟའ་པ་སངས་ནམ་ཡིན་ལ་བརྗོད་གཞི་སྣ་ཚོགས་ཐོག་རྒྱུས་མངའ་ཡོད་པའི་མི་སྣ་མགྲོན་འབོད་བྱས་ཏེ་དུས་ཡུན་ཆུ་ཚོད་གཅིག་རིང་བགྲོ་གླེང་གནང་བཞིན་ཡོད་པ་མ་ཟད། བརྙན་འཕྲིན་ལྟ་མཁན་གྱི་དྲི་བར་ཡང་ལེན་འདེབས་དང་བསམ་ཚུལ་ཐོག་བགྲོ་གླེང་ལྷུག་པོ་བྱས་ཏེ།
ཨ་རི་དང་རྒྱ་ནག་གཉིས་ཀའི་ནང་ལྟ་མཁན་མང་པོ་ཡོད་པའི་རྒྱ་སྐད་བརྙན་འཕྲིན་ཞིག་ལ་ངོས་འཛིན་བྱེད་ཀྱི་ཡོད།རྒྱ་རིགས་འབྲེལ་མཐུད་པ་ཀུན་དགའ་བཀྲིས་ལགས་ཀྱིས་ལེ་ཚན་གཙོ་སྐྱོང་པ་ཨན་ནཱ་དང་། བརྙན་འཕྲིན་ལྟ་མཁན་གྱི་དྲི་བར་དམིགས་ཏེ། ལན་འདེབས་གནང་སྐབས། ཕྱི་ལོ་ ༡༩༥༡ སྔོན་བོད་ཀྱི་སྤྱི་ཚོགས་གནས་བབ་དང་། བོད་ཞི་བའི་བཅིངས་འགྲོལ་བཏང་རྗེས་ཀྱི་སྤྱི་ཚོགས་ཀྱི་ཁྱད་པར། འདས་པའི་ལོ་ངོ་ ༦༠ རིང་དང་ལྷག་པར་དུ་མིག་སྔར་བོད་ལ་འཕྲད་བཞིན་པའི་དཀའ་ངལ། དེང་སྐབས་༸གོང་ས་༸སྐྱབས་མགོན་ཆེན་པོ་མཆོག་གི་བོད་རྒྱ་གཉིས་སྨན་གྱི་དགོངས་གཞི་གང་ཡིན་པ། རྒྱ་ནག་གཞུང་གིས་བོད་མི་མང་ལ་ལོ་རྒྱུས་ཐོག་མཐོང་དཀོན་པའི་སྡུག་པོ་བཏང་རྐྱེན་དེ་སྔ་ཡིན་ན་བོད་མི་ཁག་གཅིག་ནས་རྒྱ་མི་རིགས་ལ་མཐོང་ཚུལ་ཡོད་ཀྱང་། ༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་ལ་བརྟེན་ནས་དེང་སང་བོད་མི་ཚོས་རྒྱ་ནག་དམར་གཞུང་གི་སྲིད་བྱུས་ལ་མི་འདོད་པ་དང་། ངོ་རྒོལ་བྱེད་ཀྱི་ཡོད་པ་ལས། རྒྱ་མི་རིགས་ལ་འཁོན་འཛིན་བྱེད་ཀྱི་མེད་པའི་སྐོར་འགྲེལ་བརྗོད་གནང་ཡོད་པ་མ་ཟད། ལས་རིམ་གཙོ་སྐྱོང་བས་༸གོང་ས་མཆོག་གིས་ཆབ་སྲིད་ཀྱི་ཐུགས་འགན་མི་བཞེས་རྒྱུའི་ཐག་གཅོད་ཆེན་པོ་ཞིག་མཛད་པའི་དགོངས་གཞི་ཇི་ཡིན་གྱི་དྲི་བ་བཏོན་པར་རྒྱ་རིགས་འབྲེལ་མཐུད་པས་༸གོང་ས་༸སྐྱབས་མགོན་ཆེན་པོ་མཆོག་གིས་ཐག་གཅོད་དེ་འདྲ་ཞིག་མཛད་དགོས་པའི་རྒྱུ་མཚན་གཙོ་བོ་གསུམ་གྱི་ཐོག་སྙིང་བསྡུས་ལན་འདེབས་གནང་དོན། དང་པོ་བཙན་བྱོལ་བོད་མིའི་མང་གཙོ་སྔར་ལྷག་ཡང་དག་བཟོ་གནང་མཛད་རྒྱུ་དང་། ༸གོང་ས་༸སྐྱབས་མགོན་ཆེན་པོ་མཆོག་སྐུ་འཚོ་བཞུགས་རིང་བོད་མིའི་འཛིན་སྐྱོང་གི་ལས་དོན་ཐམས་ཅད་མགོན་པོ་གང་ཉིད་མཆོག་སྐུ་འཚོ་བཞུགས་མེད་པ་ལྟར་སྲ་བརྟན་ཡོང་ཐབས་ལ་གོམས་པ་བྱེད་རྒྱུ། བཙན་བྱོལ་བོད་གཞུང་གི་ལས་ཁུངས་ཁག་སྲ་བརྟན་བཟོ་རྒྱུ་དེ་གསུམ་རེད་ཅེས་ལན་འདེབས་གནང་ཡོད། ཕྱི་ཚེས་ ༢༧ དགོང་མོའི་ལས་རིམ་ནང་བོད་ཞི་བས་བཅིངས་འགྲོལ་བཏང་བ་ཟེར་བའི་བརྗོད་གཞིར་བགྲོ་གླེང་གནང་སྐབས་པེ་ཅིང་དཔྱིད་ཀའི་དུས་དེབ་ཀྱི་རྩོམ་སྒྲིག་པ་ཧུའུ་ཕིང་དང་། ཆབ་སྲིད་ཉམས་ཞིབ་པ་གྲན་པོ་ཁུང་གཉིས་ཀྱིས་གཙོ་བོ་ཆིངས་ཡིག་དོན་ཚན་ ༡༧ ནི་དྲག་པོའི་སྡིགས་སྐུལ་འོག་བོད་ཕྱོགས་ནས་མ་འཇོག་ཀ་མེད་ཀྱི་ཡིག་ཆ་ཞིག་ཡིན་པ་དང་། དེའི་ནང་གི་དོན་ཚན་ཁག་རྒྱ་གཞུང་ཁོ་རང་ཚོས་རྩིས་མེད་རྡོག་རོལ་བཏང་བ་ལས། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་། བོད་ཕྱོགས་ནས་རྩིས་མེད་བཏང་བ་ཞིག་མིན་པའི་སྐོར། བཅིངས་འགྲོལ་ཟེར་བ་ནི་མིང་ཙམ་ལས། དོན་དུ་བོད་མི་མང་ལ་དཀའ་ངལ་སྣ་ཚོགས་དང་། བོད་ཀྱི་ཆོས་དང་རིག་གཞུང་ལ་ཚབས་ཆེའི་གཏོར་བཤིག་ཕོགས་ཡོད་པའི་སྐོར་གླེང་སློང་གནང་བ་ཕུད། ད་དུང་། ཁོང་གཉིས་རྡ་སར་ལྟ་སྐོར་དུ་བསྐྱོད་ནས་ས་གནས་རང་གི་གནས་ཚུལ་རྣམས་མཐོང་དུས་བཙན་བྱོལ་བོད་མིའི་མང་གཙོའི་ལམ་ལུགས་དང་། གྲུབ་འབྲས་ནི་འཛམ་གླིང་ནང་གི་བཙན་བྱོལ་བ་སུ་གཅིག་ལ་མེད་པའི་ལམ་ལུགས་འཐུས་ཚང་ཚད་ལྡན་ཞིག་ཡིན་པ་མིག་མཐོང་ལག་ཟིན་བྱུང་བའི་སྐོར་ཡང་འགྲེལ་བརྗོད་གནང་ཡོད། རྣམ་ཀུན་གོང་གསལ་གྱི་ལས་རིམ་དེའི་ནང་བརྗོད་གཞི་ཁ་ཤས་ཐོག་ཁག་གཅིག་གིས་ཆེད་མངགས་ཁ་པར་བཏང་ནས་བསྙད་འདོགས་བྱེད་མཁན་དེ་འདྲ་ཡོང་གི་ཡོད་ཀྱང་། ཁ་སའི་ལས་རིམ་དེའི་ནང་ཁ་པར་གཏོང་མཁན་རྒྱ་རིགས་ཚང་མས་ཁ་གཅིག་གྲགས་ཐོག་༸གོང་ས་མཆོག་ལ་ཆེད་བསྟོད་དང་། བོད་ལ་བཅིངས་འགྲོལ་བཏང་བ་ཟེར་བ་ནི་གུང་ཁྲན་ཏང་གི་བཤད་ཕྱོགས་ཡིན་པས་དེ་ལ་མི་ཚོས་ཡིད་ཆེས་བྱེད་རྒྱུ་མེད་པ། སྲིད་དབང་གཅིག་སྡུད་ཀྱི་དབང་བསྒྱུར་འོག་བོད་མི་ཙམ་མ་ཟད། རྒྱ་རིགས་ལ་ཡང་བདེ་བ་མེད་པ་སོགས་ཀྱི་བདེན་རྒྱབ་གནང་ཡོད་པ་བཅས།