༢༠༡༡ ཟླ་ ༥ ཚེས་ ༡༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༡༧ རེས་གཟའ་མིག་དམར་ཉིན་ཡུ་རོབ་སྤྱི་མཐུན་ལྷན་ཁང་གི་ཚོགས་གཙོ་སྐུ་ཞབས་ཧར་མན་ཝན་རོམ་པེ་ (Herman Van Rompuy) མཆོག་གིས་རྒྱ་ནག་གི་སྲིད་བློན་ཝུན་ཅཱ་པོ་ (Wen Jiabao) ལ་རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་གཏོང་དགོས་པའི་སྐུལ་མ་གནང་ཡོད། སྐབས་དེར་སྐུ་ཞབས་ཧར་མན་ཝན་རོམ་པེ་མཆོག་གིས་གསུང་དོན། རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས་ཡག་པོ་མེད་པ་དེས་རྒྱལ་སྤྱིའི་ནང་རྒྱ་ནག་གི་མཚན་མཐོང་ལ་གནོད་རྒྱུ་རེད།  ང་ཚོ་ཡུ་རོབ་མི་མང་ཚོས་སེམས་འཚབ་ཆེ་ཤོས་ནི་འགྲོ་བ་མིའི་ཐོབ་ཐང་དེ་ཡིན་པ་དང་གནད་དོན་དེ་ང་ཚོས་ཕྱིའི་ཡུལ་གྲུ་སུ་འདྲ་ཞིག་དང་ལྷན་འབྲེལ་ལམ་སྐབས་གལ་གནད་ཆེ་ཤོས་སུ་འཛིན་བཞིན་ཡོད། རྒྱ་ནག་ནང་འགྲོ་བ་མིའི་ཐོབ་ཐང་དང་ཁྲིམས་ལུགས་ཀྱི་གནས་སྟངས་ཡར་རྒྱས་བཏང་བའི་ཐོག་རྒྱལ་སྤྱིའི་ནང་རྒྱ་ནག་གི་མཚན་མཐོང་གོང་མཐོར་གཏོང་ཐུབ་ཅེས་གསུངས་ཡོད་པ་མ་ཟད། རྒྱ་ནག་གཞུང་ནི་རྒྱལ་སྤྱིའི་ཐོབ་ཐང་གི་གྲོས་ཆོད་ (International Rights Covenants)ཅེས་པ་དེར་ས་རྟགས་འགོད་མཁན་ཞིག་ཡིན་པ་དྲན་གསོ་བཏང་བའི་ཐོག་དེར་ངེས་པར་དུ་བརྩི་འཇོག་བྱེད་དགོས་པའི་འབོད་སྐུལ་ཞུས་འདུག